Yihula ya Waze Akutanga Mikanda Yetu

2 A-Tesalonika 3:14 unambe ngwo, senu chinyingi hali atu amwe. Shina chiyulo chino te machikwata kuli makulwana nyi kuli akwa-kwambujola?

Postolo Paulu kasonekenene Akwa-Kristu mu Tesalonika ngwenyi: “Nyi ngwe umwe keshi kwononoka ha yize tunambe ha mukanda uno, musenu chinyingi.” (2 Tesa. 3:14) Mutuhasa kwamba ngwetu, usongwelo uno wapwile wa makulwana a mu chikungulwila. Kunyima, makulwana te kakulinga jimwe pande mu chikungulwila nyi mumupwa umwe yoze wakununga ni kulengulula yiyulo ya shimbi ja Zambi. Hanyima, akwa-kwambujola ene masakula kwecha kulikata ni mutu yoze asa chinyingi.

Alioze, kunafupiwa chimwe kalumuka. Mumu haliapwila hitwanyingika ngwetu, maliji a Paulu kanatale ha chiyulo chize hita ndumbu mu chikungulwila atamba kukwata ha yuma yize yinalingiwa.Kashika kukushi nawa ulemu wa makulwana kulinga pande ja kukeyesa mandumbu mu chikungulwila. Mumu liaka twalumuna mutapu uze te twakulumbunwinamo mukanda 2 A-Tesalonika 3:14? Tunyonge ha yize te Paulo anahanjika muze ahanyine chiyulo chino.

Paulu kamwene ngwenyi, amwe mu chikungulwila chacho te keshi “kwononoka.” Iye yaaha yiyulo yinakatuka mu Mbimbiliya, alioze o yalitunayo. Hanyima, yahana chiyulo chino ngwenyi: “Nyi mutu umwe kazangile kukalakala, katambile kulia.” Alioze, amwe te keshi kutayiza kukalakala hanga alikwase ene, chipwe ngwe te kali ni uhashi wa kuchilinga. Ayo nawa te kakulinjisa mu yuma yambala. Kuchi Akwa-Kristu atambile kutwama ni mandumbu waze te keshi kwononoka?—2 Tesa. 3:6, 10-12.

Paulu yamba ngwenyi: “Musenu chinyingi.” Mu limi lia Ngregu, liji lino linalumbununa kukeya hali umwe hanga ahone kukupiangula. Paulu kahanyine chiyulo chino ku chikungulwila cheswe hi wika ko kuli makulwana. (2 Tesa. 1:1; 3:6) Hachino, hita Mukwa-Kristu yoze te mamona umwe ndumbu wa lunga hanji wa pwo yoze keshi kwononokena yiyulo ya mu Liji lia Zambi, mwene te masakula “kwecha kulikata nenyi.”

Shina chino chinalumbunuka ngwo, mutu wacho kapwile ni kumumona ngwe kamuchiza mu chikungulwila? Ka, Paulu yamba nawa ngwenyi: “Nungenu ni kumukanyamisa ngwe ndumbwenu.” Hachino, hita Mukwa-Kristu te manunga ni kupwa hamwe ni ndumbu yoze hanase chinyingi, ha kukunguluka ni mu mulimo wa kwambujola, alioze mwene te masakula kwecha kupwa nenyi ha yimwe yiwanyino. Mumu liaka? Mumu Paulu kambile ngwenyi: “Hanga akevwe sonyi.” Muze twakwecha kulikata ni ndumbu yoze keshi kwononoka, iye kakwivwa sonyi ja yize analingi, nawa chino chakumukwasa kwalumuna yitanga yenyi.—2 Tesa. 3:14, 15.

Kuchi Akwa-Kristu musono mahasa kukaula chiyulo chino? Chitangu, twatamba kupwa ni shindakenyo ngwetu, ndumbu yoze keshi “kwononoka” yitanga yenyi yili yipi, ngwe chize Paulu asonekene. Paulu te keshi kuhanjika hali waze alisa ni yetu ha yikuma ya shimbi ya mbunge hanji ha yize mutu mwene masakula kulinga. Chikwo nawa, te keshi kuhanjika hali mandumbu waze akutuvwisa kupihia. Iye te kanahanjika hali waze atambwile yiyulo ya Liji lia Zambi, alioze te keshi kuyononokena.

Musono, nyi mutumona umwe ndumbu yoze keshi kwononoka,a hita ndumbu mu chikungulwila makwata chiyulo cha kwecha kupwa nenyi ku yihela yimwe hanji ha yiwanyino. Amu chino chili chiyulo cha mutu ni mutu, kutwatambile kuchilweza atu akwo waze keshi mu usoko wetu. Chikwo nawa, mutuhasa kupwa hamwe ni ndumbu wacho ha kukunguluka ni mu mulimo wa kwambujola. Nyi malumuna yitanga yenyi, mba mutuputuka kulikata nenyi cheka.