Kufunga Chikungulwila Chipwe Chalinanga ni Kununga Kupwa ni Sambukila

HITA mwaka, atu anji kakunjila mu uwayilo walinanga wa Yehova, kulita ni umanunuko wa uprofeto wa Mbimbiliya. (Mika 4:1, 2) Twakuwahilila chinji kutambula atu jacho mu “chikungulwila cha Zambi”! (Yili. 20:28) Atu jacho kakuwahilila chinji kulichinga ni yetu ha kuwayila Yehova mujila yalinanga mu ululikiso wenyi wa sambukila. Spiritu yisandu ya Yehova ni shimbi jipema ja mu Liji lienyi je jakutukwasa kupwa alinanga ni sambukila.—Samu 119:105; Zeka. 4:6.

² Twakuzala “mutu mwaha,” muze twakukaula shimbi ja mu Mbimbiliya. (Kolo. 3:10) Twakwecha ndako ya kulitachika ni akwetu ha yuma yamokomoko. Kumona yuma ngwe chize Yehova akuyimona, chakutukwasa twehuke katonde ni kukalakala chimuwika ni mandumbu jetu a hashi heswe.—Yili. 10:34, 35.

³ Chipwe chocho, mashimbu amwe kwakupwa yimwe yize yakulingisa hanga tuhone kulivwashana ni kupwa ni sambukila mu chikungulwila. Mumu liaka? Kanji-kanji chino chakulingiwa mumu lia kuhona kukaula shimbi ja Mbimbiliya. Twakupinda nawa ni uhenge uze tukwete. (1 Yoa. 1:10) Mashimbu amwe mutu mahasa kulinga chuma cha luchisa chize muchihasa kupihisa kulinanga cha chikungulwila. Mutuhasa kulemeka akwetu ku mbunge ni maliji hanji yitanga yetu, ni kutalinga hamukunda wa yize ndumbu alinga hanji amba. (Roma 3:23) Kuchi twatamba kuhwisa kapinda wacho?

⁴ Yehova kananyingika kanawa yuma yeswe yize yakulingiwa mu chikungulwila. Kakutulweza kupalikila mu Mbimbiliya yize twatamba kulinga muze mukusoloka umwe kapinda. Makulwana, kali tufunga a zango waze atwaha hanga atukwase ha yize mutufupiwa. Nyi twakaula yiyulo ya mu Mbimbiliya, mutuhasa kulivwashana ni mandumbu jetu ni kupwa ni utayizo wa Yehova. Nyi matufumba ha chimwe chuma chipi twalinga, twiwulukenu ngwetu, fumbo liacho lili zango lia Yehova hali yetu.—Yishi. 3:11, 12; Hepre. 12:6.

CHIZE MUTUHASA KUHWISA TUMILONGA TUKEHE-TUKEHE

⁵ Ha mashimbu amwe mukuhasa kupwa yikokojola hanji milonga yikehe-yikehe mukachi ka mandumbu mu chikungulwila. Chino nyi chalingiwa, twatamba kuyihwisa kawashi ni zango. (Efwe. 4:26; Fwili. 2:2-4; Kolo. 3:12-14) Kanji-kanji weswawo mulonga muupwa hakachi ka mandumbu mu chikungulwila, mahasa kuuhwisa ha kukaula chiyulo cha postolo Petulu cha kupwa “nikulizanga umwe ni mukwo ni mbunge yeswe; mumu zango kuliakufuka milonga yinji.” (1 Petu. 4:8) Mbimbiliya yinambe ngwo: “Yetu eswe twakutalinga mu yuma yinji.” (Tia. 3:2) Nyi twakaula Shimbi ya Oru, ya kulingila akwetu yuma yize twakuzanga hanga atulingile, mutuhasa kulikonekena ni kuvulama milonga yetu.—Mateu 6:14, 15; 7:12.

⁶ Nyi twamona ngwetu, ndumbwetu kevwile kuwaha ha yize twamba hanji twalinga, twatamba kusa tachi tuhwise kawashi kapinda wacho. Twatamba kwiuluka ngwetu, yeswayo mutulinga, muyikwata ha usepa wetu ni Yehova. Yesu katowezele tumbaji twenyi ngwenyi: “Kashika nyi kachi unalambula chawana che ku chilumbilo, ni kuze muwiwuluka ngwe mukwenu chuma chimwe a kuli nacho. Hichikako chawana che ku chilumbilo, uliange kuya ukawane ni mukwenu, mba ukeze, ukalambule chawana che.” (Mateu 5:23, 24) Nyi kunwalivwile kanawa ni ndumbwe, wanenu jila hanga nulivwashane. Nyi mandumbu mapwa ni kulivwashana, mu chikungulwila kumuchi kupwa yikokojola yinji. Mandumbu mapwa nawa ni kuhwisa kawashi yeswayo yikokojola muyisoloka hakachi ko hakupwa yihenge.

KUHANA CHIYULO CHA MU MBIMBILIYA

⁷ Ha mashimbu amwe, tulayi a mu chikungulwila kakukwasa mandumbu hanga alulike manyonga jo. Kanji-kanji chino hi chashi ko. Paulu kasonekenene akwa-Kristu a mu Ngalashia ngwenyi: “Mandumbu, nyi kachi mutu makwachika ni utanguko, enu nuli akwa Spiritu, nukamuhilwise ni mbunge ya kushimbika.”—Ngala. 6:1.

⁸ Makulwana nyi mafunga kanawa mapanga, makwasa mandumbu jo ehuke yitanga yize muyihasa kupihisa ufulielo wo ni kwehuka kuvulumuna milonga yinene. Makulwana kakusa tachi alinge mulimo wo mu chikungulwila kulita ni chize Yehova alakenyene muli Izaia ngwenyi: “Umwe mutu makapwa ngwe chiswamo ha fuji, ngwe uchinyino ha kangonga, makapwa ngwe tupila twa meya muma mumu, ngwe chizulie cha luliwe lunene mu chifuchi cha yikatalo.”—Iza. 32:2.

KUSA CHINYINGI WAZE ALUMBUKA

⁹ Postolo Paulu kahanyine utowezo hakutwala kuli atu waze mahasa kupiangula mandumbu mu chikungulwila. Paulu ngwenyi: “Shimbi tunanwehe, mandumbu, . . . nukalihandunune kuli ndumbu mweswe yoze menda ni kukolema, keshi kwenda nikulita ni ndongo yize nwatambwile kuli yetu.” Yanunga nawa ngwenyi: “Nyi kachi umwe kechi kwononoka ku liji lietu lia ku mukanda uno, nukamuse chinyingi, kanda nukaliendela nenyi, hanga akevwe sonyi. Hindu kanda numunyonga ngwe mukwa kole, alioze nukamukanjise ngwe ndumbwenu.”—2 Tesa. 3:6, 14, 15.

¹⁰ Mashimbu amwe, ndumbu mahasa kulinga yize kechi kuhasa kumusosolwela mu chikungulwila, yuma yize nihindu muyisolola ngwo keshi ni kusa vumbi shimbi ja Yehova. Yuma yacho muyihasa kupwa, uleya, kulinyenyeta hanji kulikisa. Muyihasa nawa kupwa kulinjisa mu yuma yambala ‘yize kuyamutalile.’ (2 Tesa. 3:11) Kuli nawa amwe waze akulionga kulikata ni mandumbu hanga azuke ko yimwe hanji waze akutala yiheho ya luchisa. Ndako jeswe aji mujihasa kupihisa lufuma mupema wa chikungulwila ni kupiangula mandumbu akwo.

¹¹ Mutu uli ni ndako jamutapu awu, chitangu, makulwana meseka kumukwasa ha kuzachisa Mbimbiliya. Alioze nyi mutu wacho manunga ni kulengulula shimbi ja mu Mbimbiliya hanyima lia kumukwasa chinji, makulwana mahasa kulinga pande mu chikungulwila hanga atoweze mandumbu. Makulwana katamba kumona pundu ngwo yize analingi mutu wacho yinapinjisa lume chikungulwila mba alinge pande jacho. Ndumbu mahanjika pande jacho mahana utowezo walita unatale ha ndako jacho, chakuhona kutongola jina lia mutu. Chocho, mandumbu waze ananyingika yoze anambila mu pande jacho mehuka kulikata ni ndumbu wacho, chipwe ngwe machinunga ni kukunguluka. Nihindu mandumbu katamba kununga ni kumumona ‘ngwe ndumbwo.’

¹² Muze mandumbu jetu ashishika mahona kulikata ni yoze unalumbuka, mutu wacho hanji mevwa sonyi ha yize akulinga ni kwalumuna yitanga yenyi. Nyi mutu wacho malumuna yitanga yenyi, kutwatambile kumumona nawa ngwe chilumbuke.

MWAKUHWISHILA YIMWE MILONGA YINENE

¹³ Kuliula tupalia akehe-akehe a akwetu ni kwakonekena, kuchalumbunukine ngwo, kutushi kupala tupalia twacho hanji ngwo twakutayiza yuma yipi yize akulinga. Shili yimwe hi mulonga wa uhenge uze twahingile ko. Kashika kutwatambile kulengulula shili yinene. (Levi 19:17; Samu 141:5) Usendo wa Shimbi wasolwele ngwo, kwatwama shili yinene kuhiana yikwo. Yino ye yakulingiwa ni mu chikungulwila cha akwa-Kristu.—1 Yoa. 5:16, 17.

¹⁴ Yesu kambile yize mandumbu atamba kulinga nyi kalilinga yimwe hakachi ko. Tutalenu majila waze ambile: “Nyi kachi ndumbwe makuvulumuna, [1] yako umukumike hakachi kenu ukawenu; nyi makwivwa, hiwazuka ndumbwe. Alioze nyi kakuvwile, [2] twala hamwe ni yena umwe hanji aali akwo, hanga mu kanwa lia yela aali hanji atatu maliji eswe akakole. Nyi kachi maapangula, [3] chambulule ku chikungulwila: nyi mapangula chikungulwila nawa, akapwe kuli yenu ngwe mukwa mavungu ni mukwa kufwetesa lijimu.”—Mateu 18:15-17.

¹⁵ Nyi twanyonga ha chishima cha Yesu chili ha Mateu 18:23-35, kota shili yimwe yize ahanjikile ha Mateu 18:15-17 te yinatale ha mbongo hanji yikumba, ngwe kuhona kufweta kongo hanji kwiya mbongo. Chikwo nawa, Yesu hanji kapwile ni kuhanjika hakutwala ku mahuza, shili yize yakupihisa lufuma wa mutu.

¹⁶ Nyi wamona ngwe ndumbwe kavulumuna mulonga wa mutapu awu kuli yena, kanda ulipupula kulweza makulwana hanga akutalile ha lusango wacho. Ngwe chize Yesu ambile, chitangu hanjika ni ndumbwe. Esekenu kuhwisa pande jacho yenwene chakuhona kunjisa ko atu eka. Nyingika ngwe Yesu kakambile ngwenyi ‘yako kamuwika ukakumike’ hanji ukahanjike ni mutu wacho. Kashika, nyi mutu wacho katayijile mulonga wenyi ni kulikonyeka, muchiwaha kuhanjika nenyi cheka nawa. Nyi munuhwisa sango jacho mujila ya mutapu au, yoze walinga shili makusakwilila chinji mumu lia kuhona kupihisa lufuma wenyi ha kuhanjika ni atu akwo hakutwala ku chikuma chacho. Hakulinga chocho ‘wazuka ndumbwe.’

¹⁷ Nyi mutu yoze wavulumunanga matayiza uhenge wenyi, malikonyena ni kwalumuna yitanga yenyi, kuchichi kufupiwa nawa kununga ni kusopa mulonga wacho. Mandumbu waze alivulumunanga mahasa kuhwisa mulonga wo ene chipwe ngwe wapwanga unene.

¹⁸ Nyi nwahona kulivwashana kwa ukawenu ni mutu wakulinganga umwe mulonga, muhasa kukaula chiyulo cha Yesu chinambe ngwo, “twala hamwe ni yena umwe hanji aali akwo,” ni kweseka nawa kuhanjika ni ndumbwe. Atu waze muoya no katamba kunyingika ngwo, chikuma chilemu chili kunukwasa nulivwashane ni ndumbwe. Muchipema chinji nyi mapwa atu waze ananyingika kanawa lusango wacho. Alioze nyi kukushi atu jacho, muhasa kusanyika mutu umuwika hanji aali hanga evwe chize munushimutwina. Nyi muchilita, atu musanyika katamba kupwa waze anyingika kanawa chize sango jacho jakupwa, waze mahasa nawa kumona nyi yize yalingiwa yili lume shili nyi ka. Nyi nwasanyika umwe mukulwana wa mu chikungulwila apwe chela, iye katambile kumanyinako chikungulwila, mumu kamutumine ku chizavu cha makulwana.

¹⁹ Nyi nihindu kunwahashile kulivwashana hanyima lia kuhanjika ukawenu, ni muze nwapwanga ni chela umuwika hanji aali, mba wamona ngwe kuchi kuhasa kuliula yize yalingiwa, watamba kuhanjika ni makulwana a mu chikungulwila. Iwuluka ngwe chuma chilemu mafupa makulwana chili kuneha sambukila ni kupemesa chikungulwila. Muze muhanjika ni makulwana, hichika chikuma chacho mu moko jo ni kufuliela muli Yehova. Kuwatambile kwecha hanga yitanga ya akwenu yikutalingise ni kukekemesa zango lize ukwete lia kulingila Yehova.—Samu 119:165.

²⁰ Makulwana mahengwola chikuma chacho. Mba nyi mamona ngwo ndumbu wacho kalinga lume shili yinene chakuhona kulikonyeka ni kusa tachi hanga nuhwise mulonga wacho, mahasa kutunga komite muyisopa pande jacho ni kusosolola mutu wacho mu chikungulwila. Kulinga chino, muchifunga mapanga akwo ni chikungulwila hanga chinunge kupwa chalinanga.—Mateu 18:17.

CHIZE AKUSOPA MILONGA YINENE

²¹ Shili yinene ngwe, utanji, upangala, utumwa, kushililika Zambi, utanganyanyi ni kukombelela mahamba kuyatambile kusulila wika ha kwita ukonekeno. (1 Kori. 6:9, 10; Ngala. 5:19-21) Milonga yacho katamba kuyambulula kuli makulwana mumu muyihasa kupihisa kulinanga cha chikungulwila. (1 Kori. 5:6; Tia. 5:14, 15) Mandumbu amwe kakwambulwila makulwana a mu chikungulwila shili yo ene hanji shili ya akwo yize ananyingika. (Levi 5:1; Tia. 5:16) Jila yeswayo makulwana manyingikinamo shili yize ndumbu alinga, chitangu makulwana aali katamba kuhengwola ha mulonga wacho. Nyi mapwa ni shindakenyo ngwo lusango atambula kali lume wamwenemwene nawa kuli uchela unasolola ngwo mutu kalinga shili yacho, chizavu cha makulwana muchitongola makulwana atatu apwe mu komite yakusopa hanga asope mulonga wacho.

²² Makulwana kakufunga kanawa mapanga ku chuma cheswacho muchihasa kupihisa ufulielo wo. Kakusa tachi nawa hanga azachise kanawa Liji lia Zambi ni kukwasa mutu yoze unayiji ku ufulielo. (Yunda. 21-23) Chino chinalite ni chiyulo chize postolo Paulu ahanyine kuli Timoteu ngwenyi: “Shimbi ngunakwehe kumeso ja Zambi ni Kristu Yesu, yoze makapatwila a mwono ni afu, . . . kumika, aambila, shinjila ni uhomboloji weswe ni longeso lieswe.” (2 Timo. 4:1, 2) Kulinga chino chakumbata mashimbu, alioze au uli mulimo wo. Mandumbu mu chikungulwila kakusakwilila chinji ha tachi jize akusa, ni kwamona ngwo “katela kuawezela ulemu.”—1 Timo. 5:17.

²³ Chipwe ngwe makulwana mawana ngwo ndumbu kalinga lume shili, hindu nyonga lio lili kumukwasa ahinduke ku ufulielo. Nyi kali ni mbunge ya kulikonyeka, makulwana kahasa kumukwasa. Fumbo lize mamwaha kutenga, hanji kulutwe lia yela waze ahananga uchela muze te anamusopesa, mulimukwasa ni kupwa nawa utowezo kuli mandumbu akwo mu chikungulwila. (2 Samue. 12:13; 1 Timo. 5:20) Kuli yuma yize atamba kukanjisa hita mutu yoze maaha fumbo. Kuhona kulinga yuma yimwe muchikunguwila muchikwasa yoze wavulumuna ‘ahinduke.’ (Hepre. 12:13) Ha kupalika cha mashimbu, mahasa kumutayiza alinge yize amukanjishile nyi kanase tachi akole ku ufulielo.

MUTAMBI WA MUTU YOZE WATAMBULA FUMBO

²⁴ Nyi chizavu cha makulwana muchimona ngwo, mutu yoze walinga shili kalikonyeka, alioze lusango wa yize alinga malimwanga mu chikungulwila hanji ha mukala uze atwama, makulwana kali ni ulite wa kutoweza chikungulwila hakutwala kuli mutu wacho. Katamba kulinga mutambi ha kukunguluka cha hakachi ka poso, ngwo: “Ndumbu [Jina lia mutu] katambula fumbo.”

NYI MAASOSOLOLA MUTU MU CHIKUNGULWILA

²⁵ Ha mashimbu amwe, ndumbu wavulumuna hanji hanejilila kulinga shili yacho, mba keshi kutayiza ukwaso wa makulwana. Hanji muze anamusopesa keshi kusololola yitanga yalita yize muyisolola ngwo kanalikonyeka. (Yili. 26:20) Yika makulwana atamba kulinga? Nyi chapwa chocho, katamba kuchiza mu chikungulwila mutu yoze kasolo kulikonyeka hanga ahone kulikata ni tuvumbi alinanga a Yehova. Mutu wavulumuna katamba kumuchiza mu chikungulwila hanga ahone kupiangula mandumbu ni kupihisa jina lia chikungulwila. (Shimbi 21:20, 21; 22:23, 24) Muze postolo Paulu evwile lusango wa ndako jipi ja umwe wapwile mu chikungulwila cha A-Korindu, yatoweza makulwana “akunjike umwe wapwa ngwe yono kuli Satana . . . , hanga akalamwine spiritu” ya mu chikungulwila. (1 Kori. 5:5, 11-13) Paulu kahanjikile nawa hakutwala kuli atu akwo waze asosolwele ha kuhona kukaula umwenemwene ku sekulu yitangu.—1 Timo. 1:20.

²⁶ Muze mafupa kusosolola mu chikungulwila mutu yoze kalikonyekene, komite ya kusopa yatamba kulweza mutu wacho ni kumulumbunwina chikuma chize mamusosolwela kulita ni shimbi ja mu Yisoneko. Shimbu lize komite ya kusopa muyilweza mutu chiyulo chacho, katamba kumulweza nawa ngwo nyi kamona ngwenyi, kasopele kanawa mulonga wenyi, mba mazanga kwita hanga ausope cheka, mahasa kusoneka mukanda ni kulumbununa manyonga jenyi. Putu ha tangwa lize akwa-komite ya kusopa mamulweza chiyulo akwata, mamwaha poso yimuwika asoneke mukanda wacho. Nyi matambula mukanda wacho, chizavu cha makulwana mahanjika ni kalayi wa mbonge yoze masakula makulwana ajama waze mapwa mu komite yize muyisopa cheka mulonga wacho. Akwa-komite yacho katamba kusa tachi hanga asope mulonga wacho ha poso yize yene matambula mukanda. Nyi mutu keta asope cheka mulonga wenyi, kaatambile kulinga mutambi wa kumusosolola ha shimbu liacho. Mutu wacho mahasa kwambujola, alioze kechi kuhana makumbululo chipwe kulemba ha kukunguluka hanji kulinga milimo yikwo yalipwila.

²⁷ Kutayiza hanga asope cheka mulonga wa mutu chakukwasa mutu wacho ambe yeswayo yili ku mbunge yenyi. Nyi meseka yisuho yinji kusanyika mutu wacho alioze kasolo kuliwana ni komite yaha atongola, katamba kutwa mutambi wa kumusosolola mu chikungulwila.

²⁸ Mba nyi yoze wavulumuna, kazangile hanga asope cheka mulonga wenyi, komite ya kusopa muyimulweza ulemu wa kulikonyeka ni yize atamba kulinga mba akafune mu chikungulwila. Chino chili chipema, mumu muchihasa kukwasa mutu wavulumuna hanga alumune ndako jenyi, ni kufuna mu ululikiso wa Yehova ha kupalika cha mashimbu.—2 Kori. 2:6, 7.

MUTAMBI WA KUSOSOLOLA MUTU MU CHIKUNGULWILA

²⁹ Muze masosolola mutu mu chikungulwila yoze mahona kulikonyeka ha shili alinga, katamba kulinga mutambi ngwo: “[Jina lia mutu] keshi nawa Chela cha Yehova.” Mutambi wacho muutoweza mandumbu mu chikungulwila hanga eche kulikata ni mutu yacho.—1 Kori. 5:11.

KULISOSOLOLA MU CHIKUNGULWILA

³⁰ Liji “kulisosolola” kakulizachisa hali Chela cha Yehova wa kupapachisa yoze malituna mwene ngwenyi kasolo kupwa nawa Chela cha Yehova ku zango lienyi mwene. Mutu mahasa nawa kulisosolola mwene mu chikungulwila ni kulinjisa mu upatwilo wa Yehova Zambi kupalikila mu yitanga yenyi, ngwe kulinjisa mu chizavu chize chakulinga yuma yize yakulimika ni shimbi ja Yehova.—Iza. 2:4; Uso. 19:17-21.

³¹ Postolo Yoano kasonekene hakutwala kuli akwa-Kristu a ha mashimbu jenyi waze alisosolwele ene ngwenyi: “Atuhukile mukachi ketu, alioze kapwile a kuli yetu; mumu nyi te apwile a kuli yetu, kachi atwamine hamwe ni yetu.”—1 Yoa. 2:19.

³² Mutu yoze malisosolola mwene mu chikungulwila, kumeso ja Yehova, kanalise chinji ni ndumbu unahongo wika ku ufulielo yoze keshi kwambujola nawa. Atu amwe kakuhonga ku ufulielo mumu lia kwecha kulilongesa Mbimbiliya. Eka nawa hanji kanapalika mu umwe kapinda hanji mu yihungumiona, chocho mahonga ku ufulielo. Makulwana a mu chikungulwila ni mandumbu akwo katamba kununga ni kukwasa mandumbu waze ahonga ku ufulielo.—Roma 15:1; 1 Tesa. 5:14; Hepre. 12:12.

³³ Alioze nyi ndumbwetu umwe mazanga mwene kulisosolola mu chikungulwila, kaatamba kulinga mutambi mu chikungulwila ngwo: “[Jina lia mutu] keshi nawa Chela cha Yehova.” Mutu wacho, kaatamba kumumona ngwe chize akumona mutu yoze asosolola mu chikungulwila.

KUFUNYISA MUTU MU CHIKUNGULWILA

³⁴ Mutu asosolwele hanji yoze walisosolwele mwene mu chikungulwila, maahasa kumufunyisa, nyi hakupalika cha mashimbu, masolola pundu ngwenyi kalikonyeka ni kuhichika ndako jipi apwile najo. Katamba kusolola ngwenyi, kanazange nawa kupwa sepa lia Yehova. Makulwana katamba kukeya ni kwecha hanga kupalike tukweji anji hanji mwaka umuwika, chipwe miaka yinji, kulita ni mutu ni mutu, hanga mutu asolole lume ngwenyi kalikonyeka. Muze chizavu cha makulwana matambula mukanda wa mutu yoze unazange kufuna, komite yize makulwana matunga yatamba kuhanjika ni mutu wacho. Komite yacho muyitala nyi mutu yoze weta amufunyise kanasolola ‘yitanga yalita’ yize muyisolola ngwo kalikonyeka mba amone nyi mamufunyisa ha shimbu liacho nyi ka.—Yili. 26:20.

³⁵ Nyi mutu yoze meta hanga amufunyise kamu­sosolwele mu chikungulwila cheka, komite ya mu chikungulwila ali ye muyiliwana nenyi hanga atale ha chikuma chacho. Nyi makulwana a mu komite yacho mamona ngwo mutu wacho mahasa kufuna, maatuma mukanda ku chikungulwila kuze mutu wacho amusosolwelele ni kwalweza nyonga lio. Komite ya mu chikungulwila muze ali ni ya mu chikungulwila muze amusosolwele makalakala hamuwika hanga akwate chiyulo chalita. Komite ya mu chikungulwila muze amusosolwelele ye yatamba kutayiza nyi mutu wacho kaatamba kumuhilwisa nyi ka.

MUTAMBI WA KUFUNYISA MUTU MU CHIKUNGULWILA

³⁶ Nyi komite yize yatala ha chikuma cha mutu yoze asosolwele hanji walisosolwele mwene mamona ngwo mutu wacho kanalikonyeka mba kaatamba kumufunyisa, matwa mutambi mu chikungulwila muze amusosolwelele. Nyi mutu wacho hanalukila mu chikungulwila chikwo, nemo katamba kulinga mutambi wacho. Mutambi watamba kwamba wika ngwo: “[Jina lia mutu] kali nawa Chela cha Yehova.”

MILONGA YA TWANUKE AKEHE WAZE HANAPAPACHISA

³⁷ Nyi kanuke mukehe yoze hanapapachisa malinga shili yinene, makulwana katamba kwalweza chikuma chacho. Muze makulwana masopa milonga ya twanuke akehe waze hanapapachisa, muchilita hapwe ni yisemi jo waze hanapapachisa. Yisemi jacho katamba kukalakala hamuwika ni komite yize yinasopo mulonga wa mwano, chakuhona kukalila mwano hanga achine kutambula fumbo. Komite ya kusopa yatamba kusa tachi afumbe ni kukwasa kanuke wavulumuna, ngwe chizechene akulinga ni mandumbu waze hakola. Nyi kanuke katayijile fumbo, katamba kumusosolola mu chikungulwila.

MUZE MUKWA-KWAMBUJOLA YOZE KANDA APAPACHISA MAVULUMUNA

³⁸ Yika makulwana atamba kulinga muze mukwa-kwambujola yoze kanda apapachisa malinga shili yinene? Amu hi Chela cha Yehova wakupapachisa ko, kechi kumusosolola. Alioze maahasa kumwaha wika ukwaso hanga ‘ende mu majila alulama’ mumu hanji kanyingikine kanawa ulumbunwiso wa shimbi ja Mbimbiliya.—Hepre. 12:13.

³⁹ Nyi mukwa-kwambujola wakuhona kupapachisa yoze walinga shili kalikonyekene hanyima lia kumukwasa kuli makulwana aali, muchilita kulweza chikungulwila. Katamba kulinga mutambi ukehe, ngwo: “[Jina lia mutu] keshi nawa mukwa-kwambujola wa mu chikungulwila.” Mandumbu maputuka kumona mutu wacho ngwe mukwa-mavungu. Chipwe ngwe mutu wavulumuna kamusosolwele, nihindu mandumbu katamba kukanyama ha kulikata nenyi. (1 Kori. 15:33) Mutu wacho katambile nawa kuhana maola a mu mulimo wa kwambujola.

⁴⁰ Ha kupalika cha mashimbu, mutu yoze wapwile mukwa-kwambujola wakuhona kupapachisa, mahasa kwita apwe cheka mukwa-kwambujola. Chocho, makulwana aali maliwana nenyi amone nyi kanalikolweza ku ufulielo. Nyi mamona ngwo kanatela kupwa cheka mukwa-kwambujola, malinga mutambi ngwo: “[Jina lia mutu] kamutayiza nawa kupwa mukwa-kwambujola wakuhona kupapachisa.”

YEHOVA KAKUWAHISA UWAYILO WA SAMBUKILA, UZE WALINANGA

⁴¹ Atu eswe akwiza mu chikungulwila cha Zambi mahasa kuwahilila mumu lia chize Yehova akukwasa atu jenyi apwe alinanga ku ufulielo. Tuli ni kulia chinji ku ufulielo ni umwenemwene akutwaha kuli Yehova uze wakutuhuzulula ngwe meya. Yehova kakutufunga nawa kupalikila mu ululikiso wenyi uze ali ni kusongwela kuli Kristu. (Samu 23; Iza. 32:1, 2) Ha matangwa wano akusula, kupwa mu ululikiso wa sambukila wa Yehova muchitufunga chinji.

⁴² Nyi twafunga sambukila ni kulinanga mu chikungulwila, mutwecha hanga pangu lietu lia umwenemwene wa Wanangana litemuke. (Mateu 5:16; Tia. 3:18) Chocho, Yehova matupala hanga tukwase atu anji amunyingike ni kulinga upale wenyi.