Twatamba Kuzumbula Ngeji Mumu Chikwete Ulemu!

1. Yipikalo yika apwile nayo akwa-Kristu ku sekulu yitangu?

HA HAMWE mashimbu mukachi ka mwaka 62 ndo 64, postolo Petulu yasonekena waze te “anamwangashana mu yifuchi ya Ponto, Ngalashia, Kapatoshia, Azia, ni Mbitiniya.” (1 Petulu 1:1) Mandumbu jacho eswe kakatukile ku yihela yinji yalisa. Ayo kapwile ni kupalika mu “cheseko cha kahia,” hanji yihungumiona, chocho afupiwile utakamiso ni usongwelo. Ayo nawa katwamine ha limwe shimbu lipi chinji. Petulu yasoneka ngwenyi: “Songo lia yuma yeswe hilinakundama.” Kwasalile wika miaka kumi hanga Yerusaleme ayinongese. Yika te muyikwasa akwa-Kristu kweswako apwile mba akumbe kanawa mashimbu jacho akalu?—1 Petulu 4:4, 7, 12.

2, 3. Mumu liaka Petulu akolwezele mandumbu jenyi hanga apwe ni kuzumbula ngeji? (Tala chizulie ha uputukilo.)

² Chuma chize Petulu akolwezele mandumbu jenyi hanga alinge chapwile ‘kulizumbula umwe ni mukwo.’ (1 Petulu 4:9) Liji lia Ngregu lize liakuhanjika ha “kuzumbula ngeji” linalumbunuka “kusolola zango hanji keke hali yilambala.” Alioze Petulu kakolwezele mandumbu jenyi hanga alizumbule “umwe ni mukwo,” chipwe waze te hanalinyingika ni kukalakala hamuwika. Mba kuchi te kuzumbula ngeji muchaakwasa?

³ Chino te muchaakwasa kupwa ni usepa upema kuli umwe ni mukwo. Mba yena? Shina unewuluka tangwa lize umwe akusanyikine ku zuwo lienyi? Nawa muze wasanyikine umwe ku zuwo lie, chino chanukwashile kupwa ni usepa upema. Jila yipema yize muyitukwasa kunyingika kanawa mandumbu jetu yili kwaazumbula ku mazuwo jetu. Akwa-Kristu waze apwile ha mashimbu ja Petulu, kafupiwile kupwa ni usepa upema muze te ali mu yipikalo. Ha matangwa wano “a kusula” ni yetu tunafupiwa kulinga chochene.—2 Timoteu 3:1.

4. Yihula yika mutushimutwina ha mutwe uno?

⁴ Mu milali yika mutuhasa kuzumbwilamo “akwetu”? Yika muyihasa kutukwika kuzumbula ngeji, nawa kuchi mutuhasa kukumba yikwiko yacho? Yika muyihasa kutukwasa kupwa ngeji apema?

UHASHI UZE TUKWETE WA KUZUMBULA NGEJI

5. Kuchi mutuhasa kuzumbula ngeji ha kukunguluka chetu?

⁵ Ku kukunguluka: Yehova ni ululikiso wenyi kakutusanyika hanga tukunguluke hamuwika. Kashika twatamba kuzumbula kanawa waze meza ku kukunguluka, chipi-chipi atu aha. (A-Roma 15:7) Mumu ni ayo kali ngeji a Yehova, kashika katamba kulivwa kanawa mukachi ketu, chipwe ngwe masoloka cheswacho hanji mazala yeswayo. (Tiangu 2:1-4) Ha kukunguluka, nyi wamona umwe ngeji kali ukawenyi, shina muhasa kumusanyika hanga nutwame hamuwika? Mawahilila chinji nyi mumukwasa kunyingika chize kukunguluka muchenda hanji kuwana yisoneko yize tunatange ha kukunguluka. Yino muyihasa kupwa jila yipema ya ‘kuzumbwilamo ngeji.’—A-Roma 12:13.

6. Aya kevwe twatamba kuzumbula chinji?

⁶ Ha chiteleka hanji kulia: Ku shakulu kanji-kanji atu te kakuzumbula ngeji ha kwaasanyika ku mazuwo jo hanga alie hamuwika, ni kusolola ngwo kanazange kupwa masepa ni kulivwashana. (Uputukilo 18:1-8; Akwa Kuyula 13:15; Luka 24:28-30) Aya kevwe twatamba kuzumbula chinji? Twatamba kuzumbula chinji mandumbu jetu a mu ufulielo. Amu kapinda kanoko chinji hano hashi, mutufupiwa ukwaso wa mandumbu jetu ni kushishika kuli ayo. Ha mwaka 2011, Chizavu cha Tusongo kalumwine maola a Longeso lia Kaposhi wa Kutalila mu chisaka cha Mbetele mu Estados Unidos, yalichiza ha ola 18:45 ni kulisa ha 18:15. Mumu liaka? Mutambi atwile wambile ngwo, te chikwase ma Mbetelita hanga alizumbule umwe ni mukwo ha kuhwa cha longeso liacho. Mbetele jikwo nejo yijilinga chochene. Chino chapwile chiwape chinene kuli ma Mbetelita hanga alinyingike kanawa umwe ni mukwo.

7, 8. Kuchi mutuhasa kuzumbula mandumbu waze akwiza ni kuhanjika pande mu chikungulwila chetu?

⁷ Ha mashimbu amwe mandumbu amu yikungulwila yeka, tulayi a mambonge ni mandumbu waze akumanyinako Mbetele, kakwiza ni kuhanjika pande mu chikungulwila chetu. Shina mutuhasa kuzachisa mashimbu jacho hanga twaazumbule? (Tanga 3 Yoano 5-8.) Jila yimwe yize mutuhasa kwaazumbwilamo yili kwaasanyika ku zuwo lietu hanga tulie no hamuwika.

⁸ Umwe pangi mu Estados Unidos yamba ngwenyi: “Ha miaka yinji, ami ni mukwetu-lunga te twakuzumbula mandumbu ku zuwo lietu waze te akwiza ni kuhanjika pande mu chikungulwila chetu.” Iye kakwivwa ngwe hita yuma yakulingiwa ku mwono wo, yakukolesa ufulielo wo nawa kakuwahahilila chinji. Yamba ngwenyi: “Kutushi kuliseha ha yize twakulingila mandumbu jetu.”

9, 10. (a) Aya mahasa kutwama ku zuwo lietu ha mashimbu anji? (b) Shina waze akwete mazuwo akehe-akehe no mahasa kuzumbula akwo? Hana chilweza.

⁹ Kuzumbula atu ku zuwo ha mashimbu anji: Ku shakulu atu te kakwete chako cha kuzumbula ngeji ni kwaaha chihela cha kutwama. (Yombi 31:32; Fwilimu 22) Ni yetu musono, mutuhasa kuchilinga. Chakutalilaho, tulayi a mambonge muze akumeneka yikungulwila kanji-kanji kakufupiwa chihela kuze matwama. Chino muchihasa kulingiwa nawa kuli alongi a shikola ya milimo ya Zambi ni kuli mandumbu waze akutunga Mazuwo a Wanangana. Mba yika mutwamba hali mandumbu waze akuhona mazuwo mumu lia kakundukundu? Ayo mahasa kufupiwa chimwe chihela hanga atwamemo ndo haze matungulula mazuwo jo. Kutwatambile kunyonga ngwetu waze ali ni mazuwo anene-anene e wika mahasa kwaakwasa. Ayo hanji hanahane ukwaso ha yisuho yinji. Kutala muhasa kuhana chihela kuli umwe ndumbu, chipwe ngwe ukwete zuwo likehe?

¹⁰ Umwe ndumbu mu Korea ya ku Sule kanewuluka muze apwile ni kuzumbula alongi aku shikola ya milimo ya Zambi ku zuwo lienyi. Iye yasoneka ngwenyi: “Ku uputukilo te nakukakajana kuzumbula ngeji mumu te mutuchilimbata nawa zuwo lietu te likehe. Alioze muze twazumbwile alongi ku zuwo lietu chapwile chiseke chinji. Amu te mutuchilimbata, twamwene chize mutuhasa kuwahilila muze tunawayila Yehova ni kulinga mulimo wenyi hamuwika.”

11. Mumu liaka twatamba kuzumbula mandumbu aha mu chikungulwila chetu?

¹¹ Mandumbu aha mu chikungulwila: Mandumbu ni asoko amwe mahasa kukatuka ku yikungulwila yeka ni kwiza mu chikungulwila chenu. Ayo mahasa kwiza mu chikungulwila chenu mumu munafupiwa ukwaso. Amwe mahasa kupwa mapionelu waze atumine mu chikungulwila chenu. Chino chili kwalumuka chinene ku mwono wo. Ku chihela ni ku chikungulwila chaha kuze maya, ayo katamba kwalumuna yimwe ku mwono wo, hamukunda wa limi ni chako chaha. Shina muhasa kwaasanyika ku zuwo lie hanga nulie hamuwika? Nyi wachilinga, muchaakwasa kupwa ni masepa aha ni kwijilila ni chako chaha.

12. Chilweza chika chinasolola ngwo kutwatambile kupwa ni yuma yinji mba tuzumbule akwetu?

¹² Kuwafupiwile kupwa ni yuma yinji mba uzumbule ngeji. (Tanga Luka 10:41, 42.) Umwe ndumbu kanewuluka yize yalingiwile ku mwono wo muze iye ni mukwo-pwo te ali mu mulimo wa mishionaliu. Yamba ngwenyi: “Te tuchili akweze, kanda tuchinyingika yuma yinji, nawa te twakwivwa usona wa kumahetu. Ha umwe ufuku mukwetu-pwo te kananyonga chinji, yingumulembejeka alioze chahashile. Muze twaheta ha ola 19:30, yitwivwa umwe kanangongwela ku chikolo. Kumana umwe longi wa Mbimbiliya te unatunehena malala atatu. Kejile ni kututambwisa mu mulimo wetu wa mishionaliu mumu te tuchili aha. Chocho yitumulweza hanga anjile ni kumwaha meya akunwa. Mba yitumulingila kafe. Yetu te kutwanyingikine kuhanjika Swahili, nawa iye te kanyingikine kuhanjika Inglês.” Ndumbu yamba ngwenyi, yino yaakwashile kulinga usepa ni mandumbu jako ni kuwahilila.

KANDA WECHA NICHIMWE CHIKUKWIKE KUZUMBULA NGEJI

13. Kuchi kuzumbula ngeji muchihasa kukukwasa?

¹³ Kutala hi unakakajana kuzumbula ngeji? Nyi che walingile, nyingika ngwe walitunyine mashimbu apema nawa watokesele uhashi wa kulinga usepa uze te kuuchi keza kavulama. Kuzumbula ngeji yili jila yipema yize yakukwasa mutu kuhona kulivwa ngwe kali ukawenyi. Mba mumu liaka amwe akukakajana kuzumbula ngeji? Kuli yimwe yize yakwaakinda kuchilinga.

14. Yika mutuhasa kulinga nyi kutushi mashimbu ni tachi jakuzumbula akwetu?

¹⁴ Mashimbu ni tachi: Tuvumbi twa Yehova kakwete milimo ni yiteli yinji. Amwe mahasa kulivwa ngwe keshi ni mashimbu hanji tachi jakumbana mba azumbule akwo. Nyi che wakwivwa, watamba kululieka katalilo we hanga upwe ni kuzumbula akwenu. Chino chikwete ulemu mumu Mbimbiliya yakutukolweza hanga tupwe ni kuzumbula ngeji. (A-Hepreu 13:2) Kashika kuzumbula ngeji chapwa chuma chipema. Alioze mba tuzumbule ngeji, twatamba kutepulula mashimbu waze twakupalikisa ku yuma yize kuyishi ulemu.

15. Mumu liaka atu amwe akulivwa ngwo keshi kuhasa kuzumbula ngeji?

¹⁵ Chize wakulivwa: Shina hiunazange kama kuzumbula ngeji alioze yiulivwa ngwe kuushi kuhasa? Kota wakwivwa sonyi ni kulipikala ngwo ngeji waze muzumbula kechi kuwahilila. Hanji kuushi ni mbongo jinji chocho mwivwa woma ngwo kuuchi kuhana ngeji je yuma yize mandumbu akwo mahasa kwaaha. Alioze iwuluka ngwe zuwo kuliatambile kupwa lia kayanda mba uzumbwilemo ngeji. Ngeji je makawahilila nyi zuwo linapeme, liakululieka kanawa nawa nyi ukwete chiseke.

16, 17. Yika muhasa kulinga nyi mulipikala ha kuzumbula ngeji?

¹⁶ Nyi wakulipikala ha kuzumbula ngeji, nyingika ngwe kuushi ukawe. Umwe mukulwana wa mu chikungulwila ku Grã-Bretánia yamba ngwenyi: “Muze unalilulieka hanga uzumbule ngeji, muhasa kuputuka kulihulumba. Alioze yize mulinga nyi yinatale ha mulimo wa Yehova, yiwape ni uwahililo uze muzukako yakukumba kulihulumba chacho. Nakuwahilila chinji kuzumbula ngeji ni kushimutwina hamuwika muze tunanu kafe.” Chili chipema kusolola zango lia ku mbunge kuli ngeji waze mutuzumbula. (A-Fwilipu 2:4) Atu anji kakuzanga kuhanjika yuma yize akupalika ku mwono. Mutuhasa kwivwa yize akwetu akupalika ku mwono wo muze mutupwa no hamuwika. Mukulwana mukwo yamba ngwenyi: “Kuzumbula masepa amu chikungulwila ku zuwo liami, chakungukwasa kwaanyingika kanawa, chipi-chipi chize ayo anyingikine umwenemwene.” Nyi musolola zango hali ngeji, muhasa kupwa ni shindakenyo ngwe yenu eswe munuwahilila chinji.

¹⁷ Umwe pangi pionelu yoze te wakuzumbula chinji alongi aku shikola ya milimo ya Zambi yatayiza ngwenyi: “Napwile ni kulihulumba chinji mumu te kuchishi ni yikwata yinji nawa yize te ngukwete yikulu. Pwo lia umwe longeshi ya shikola ya milimo ya Zambi yangukwasa hanga nguhone kulihulumba. Yamba ngwenyi, muze iye ni mukwo-lunga akumeneka yikungulwila, mashimbu apema kali muze akutwama ni mandumbu ajama ku ufulielo waze keshi yikumba yinji, alioze kali ni nyonga limuwika—kulihulikila mu mulimo wa Yehova ni kwashiwisa mwono. Maliji wano kangwiwulwile yize mama apwile ni kutwamba ku wanuke ngwenyi: ‘Shinoho kulia matamba kuze kuli zango.’” (Yishima 15:17) Kashika kutwatambile kulipikala, mumu chahiana ulemu chili kusolola zango kuli ngeji jetu.

18, 19. Kuchi kuzumbula ngeji muchitukwasa kukumba manyonga jetu api hakutwala kuli akwetu?

¹⁸ Chize wakwivwa hali akwenu: Shina kuli umwe ndumbu mu chikungulwila yoze wakukuvwisa kupiha? Nyi kuwahashile kukumba manyonga wano api, o kechi kwalumuka. Acho kuuchi kuhasa kusanyika mutu wacho ku zuwo lie nyi kuushi kuzanga yitanga yenyi. Hanji kuli umwe yoze wakulemekene ku mbunge, nawa chapwa chikalu kuvulama yize akwambile.

¹⁹ Mbimbiliya yinambe ngwo nyi ukwete chako cha kuzumbula ngeji, yena muhasa kululieka usepa we ni akwenu chipwe ni akwa-kole je. (Tanga Yishima 25:21, 22.) Nyi musanyika umwe ku zuwo lie, muhasa kupwa ni uhashi wa kukumba manyonga api ni kulivwashana ni mutu wacho. Hachino, muputuka kumona yitanga yipema yize Yehova amwene muze akokele mutu wacho ku umwenemwene. (Yoano 6:44) Muze zango mulikulingisa hanga usanyike mutu yoze te keshi kushimbwila kumusanyika, chino muchikukwasa kuputuka usepa upema. Kuchi muhasa kunyingika ngwe unamusanyika hamukunda wa zango? Jila yimwe yakukawilamo chiyulo chino, yili ha A-Fwilipu 2:3: ‘Ni mbunge ya kulikehesa, mweswe anyonge ngwenyi, mukwetu kanguhiana.’ Twatamba kunyonga ngwetu mandumbu jetu kali alemu chinji kutuhiana. Mutuhasa kulilongesa ha ufulielo wo, kunyongonona cho, ni yitanga yikwo ya Ukristu. Kunyonga ha yitanga yo yipema muchikolesa zango lietu hali ayo ni kutukwasa kuzumbula ngeji.

PWAKO NGEJI MUPEMA

20. Mumu liaka twatamba kuhanjika umwenemwene muze mututayiza kuya kuze atusanyikanga?

²⁰ Mukwa-kwimba masamu Ndawichi yahula ngwenyi: “Yehova, iya matwama mu mbalaka ye?” (Samu 15:1) Kulutwe, Ndawichi yalumbununa ndako jize Yehova anazange hanga ngeji jenyi apwe najo. Ndako jacho, yimwe yili kuhanjika umwenemwene: “Chipwe halishinga ha kulinga chipi mwene, keshi kwalumuka.” (Samu 15:4) Nyi mukwetu matusanyika ku zuwo lienyi nawa twatayiza kutwatambile kuhona kuyako, nyi kukushi nichimwe chize muchikukwika. Mukwetu kota hanalilulieka kulu hanga atutambule, kashika nyi kutwayileko, tachi jeswe asanga mujipwa jangwaza. (Mateu 5:37) Atu amwe keshi kuya kuze aasanyikanga, mumu kanazange kuya kuze malivwa kanawa. Shina chino chili kusolola zango ni vumbi? Twatamba kusakwilila ni yeswayo matwaha kuli akwetu. (Luka 10:7) Nyi mutumona ngwetu kutushi kuhasa kuya kuze atusanyikanga, mutusolola zango ni vumbi nyi twalianga kulweza mukwetu shimbu tangwa liacho kanda lichiheta.

21. Kuchi ndako ja kuze twatwama mujitukwasa kupwa ngeji apema?

²¹ Chili nawa chilemu kuvumbika ndako ja kuze watwama. Ku yako yimwe, ngeji kakwiza ku zuwo susumuku, chipwe chocho kakumuzumbula kanawa. Ku yihela yikwo chili chipema ngeji kulianga kulweza waze maya ni kumeneka. Ku yihela yimwe, atu waze akuzumbula ngeji, kakulianga kwaaha kulia chipema, alioze asoko jo malia kasula. Ku yihela yikwo, eswe kakulia hamuwika. Ku yihela yeka, ngeji no kakumbata chimwe kulia hanga awezele ha chize mawana kuze anayi. Ku yihela yikwo, mutu yoze mazumbula ngeji keshi kuzanga ayo anehe kulia nichimwe. Ku yako yikwo, mutu ni vumbi lieswe mahasa kulituna kuya kuze amusanyika chipwe ha yisuho yaali. Alioze ku yako yeka, nyi mutu mahona kuya kuze amusanyika chili kuhona vumbi. Kashika twatamba kulinga yize mutuhasa hanga mutu yoze watuzumbula awahilile ni yetu.

22. Mumu liaka chili chilemu ‘kulizumbula umwe ni mukwo’?

²² Petulu kambile ngwenyi: “Songo lia yuma yeswe hilinakundama.” (1 Petulu 4:7) Musono, kwasala hakehe hanga tupalike mu luyinda munene yoze kanda achilingiwa kama hano hashi. Amu hano hashi hanayi ni kupiha, tunafupiwa kuzanga mandumbu jetu ni mbunge yeswe. Chiyulo cha Petulu chakwamba ngwo, “Lizumbulenu umwe ni mukwo” chinatutale chinji musono kuhiana kunyima. (1 Petulu 4:9) Chochene, kuzumbula ngeji chili chitanga chipema, kashika twatamba kuchisolola haliapwila ndo ku miaka yeswe.