Shina Yela ja Yehova Kakuhandununa Asoko nyi Kakwanunga?

Ngwe Yela ja Yehova, twakusa tachi hanga asoko jetu ni enyembo jetu apwe alinunga. Twakuvumbika Zambi yoze Watangile usoko weswe. (Uputukilo 2:21-24; A-Efwesu 3:14, 15) Mu Mbimbiliya, iye kakulongesa yiyulo yipema yize yakukwasa atu a hashi heswe kupwa ni uwahililo mu usoko.

Chize Yela ja Yehova Akukwasa Asoko Kupwa Alinunga

Twakusa tachi hanga tukaule yiyulo ya mu Mbimbiliya, mumu chino chakutukwasa kupwa malunga, mapwo ni yisemi apema. (Yishima 31:10-31; A-Efwesu 5:22–6:4; 1 Timoteu 5:8) Mana waze twakuwana mu Mbimbiliya maahasa kukwasa chipwe asoko waze akwete uwayilo waliteta. (1 Petulu 3:1, 2) Tala yize atu amwe ambile muze atu waze alimbata no apwile Yela ja Yehova:

• Ha miaka yisambano yitangu ya ulo wetu twapwile ni kulizwelesa chinji. Alioze muze Ivete apwile Chela cha Yehova uhomboloji ni vumbi lienyi liangukwashile chinji. Yuma yize apwile ni kwalumuna ku mwono wenyi yatukwashile chinji mu ulo wetu.”—Clauir, wa mu Brazil.

• “Muze lunga liami Chansa aputukile kulilongesa Mbimbiliya ni Yela ja Yehova, nevwile kupiha chinji mumu napwile ni kunyonga ngwami, o kakuhandununa asoko. Alioze musono namona ngwami, Mbimbiliya yatukwasa mu ulo wetu.”—Agness, wa mu Zambia.

Mu mulimo wetu wa kwambujola, twakusolola kuli atu eswe chize Mbimbiliya muyihasa kwakwasa

• Kusakula kanawa mutu yoze mulimbata nenyi

• Kukumba kapinda yoze wakusoloka ha mwaka utangu nyi atu achilimbata

• Kutwama kanawa ni mako jo

• Kwecha kuzwela

• Kufunga kanawa mbongo

• Kulikonekena

• Kufumba ana

Shina kukatuka mu yingeleja yimwe ni kuya mu yikwo, muchihasa kuneha kapinda mu ulo?

Kwamba pundu, mashimbu amwe chino muchihasa kulingiwa. Chakutalilaho, ha mwaka 1998, chizavu cha akwa-kuhengwola avuluka ngwo Safres, kahengwile malo ja atu waze umwe wa kuli ayo uli Chela cha Yehova. Kuhengwola chacho chasolwele ngwo, hakachi ka malo 20, ulo 1 wapwile ni kapinda munji.

Yesu kambile ngwenyi, atu waze te makaula malongeso jenyi, maapinjisa kuli asoko jo. (Mateu 10:32-36) Umwe mukwa-kwambujola sango ja ku shakulu avuluka ngwo Will Durant kambile ngwenyi: “Ha mashimbu a chiyulo cha A-Roma, akwa-Kristu kapwile ni kwalamikiza ngwo, kakuhandununa asoko.”a Chipwe musono, Yela ja Yehova amwe no kakwalamikiza yuma yacho. Shina chamwenemwene lume mutu yoze wakupwa Chela cha Yehova mwe wakuneha mbwanja mu ulo?

Chota cha Akwa-Kuyula mu Europa chize chatala ha mulimo wa kukalila ulite wa atu, muze te chinasopo chikuma chakwamba ngwo, Yela ja Yehova kakuhandununa asoko, chambile ngwo: “Kanji-kanji atu waze hi Yela ja Yehova ko kakukoka mbwanja ha kulituna kutayiza ni kuvumbika ulite uze asoko jo akwete wa kusakula uwayilo uze ene maazanga.” Chota chacho yichamba nawa ngwo: “Yuma yino yakulingiwa mu malo anji waze lunga ni pwo akwete uwayilo walisa. Chino chinatale nawa ha malo ja Yela ja Yehova.”b Alioze, chipwe ngwe Yela ja Yehova kakwapinjisa mumu lia uwayilo wo, nihindu o kakulikwachilila ha chiyulo cha mu Mbimbiliya chakwamba ngwo: “Kanda nufwetesa niumwe yipi ha yipi. . . . Nyi kachi muchihasa kupwa nikulita ni tachi jenu, pwenu ni sambukila kuli atu eswe.”—A-Roma 12:17, 18.

Mumu liaka Yela ja Yehova akutayiza ngwo, katamba kulimbata wika ni Yela ni akwo?

Yela ja Yehova kakukaula chiyulo cha mu Mbimbiliya cha kulimbata “muli mwe Mwene wika”, hanji ngwetu kulimbata wika ni mutu yoze neye uli Chela cha Yehova. (1 A-Korindu 7:39) Achi chili chiyulo cha mu Mbimbiliya, chikwo nawa, chili chipema chinji. Chakutalilaho, ha mwaka wa 2010, umwe lusango watuhukile ha mukanda wa sango Journal of Marriage and Family kambile ngwo: “Malo waze lunga ni pwo akwete uwayilo umuwika ni kufuliela ha yuma yimuwika kakwete uhashi unji wa kupwa ni ulo upema.”c

Chikwo nawa, Yela ja Yehova keshi kusupula atu hanga alihandunune ni mutu yoze alimbata nenyi nyi hi Chela cha Yehova ko. Mbimbiliya yinambe ngwo: “Nyi ndumbu umwe mapwa ni mukwo-pwo yoze keshi kufuliela, iye matayiza kutwama nenyi, kanda amuhichika. Pwo yoze mapwa ni mukwo-lunga yoze keshi kufuliela, iye matayiza kutwama nenyi, kanda akahichika mukwo-lunga.” (1 A-Korindu 7:12, 13) Yela ja Yehova kakukaula chiyulo chino.