YIZE MUYIKUKWASA MUZE NDANDO YA YUMA MUYINYINA

Tayiza Yize Yinalingiwa

Nyi ndando ya yuma muyinyina ni falanga jize twakutambula ku mulimo hanji twakuzuka mujoka, kutushi kupinda. Alioze nyi ndando ya yuma muyinyina, falanga jize twakutambula ku mulimo keshi kujiwezela, mutuhasa kusakalala ni kulipikala, chipi-chipi nyi tukwete usoko uze twakufunga.

Yetu kutushi ni uhashi wa kukwika kunyina cha ndando ya yuma. Alioze nyi twatayiza ngwetu yuma yinayi ni kwalumuka, chino muchituyukisa chinji.

TAYIZA NGWE YUMA YALUMUKA

Nyi mutu mapwa ni nyonga lialita hakutwala ku kunyina cha ndando, muchipwa chashi kuli iye . . .

kulihumikiza. Muze twakulihumikiza, twakunyingika kanawa yuma yize yinalingiwa ni kukwata yiyulo ya mana.
kwehuka kulinga yuma ya uhepuke. Ngwe chilweza, keshi kwecha kufweta mapanza waze ali no, nawa keshi kukisa falanga jize ali najo.
kwehuka kuzwela ni asoko jenyi mumu lia falanga.
kunyingika chize mapalika mu kapinda wacho, chekwamba kakunyingika kanawa yize masa ha chihela chitangu ni yuma yize atamba kulanda.

YIZE MUHASA KULINGA

Ejilila ni kwalumuka cha ndando. Muze ndando yinayi ni kunyina, muchilita kutepulula yuma yize wakulanda. Nyi wachilinga, musolola mana. Mumu liaka tunambe chocho? Mumu atu anji kakufupa kulanda yuma ya falanga jize keshi najo, chino chakukalisa chinji yuma ku mwono wo. Mumu lia chino, o kakuhonga chinji. Nyi uli ni usoko, chinalite kulipikala ha kwaha yize o mafupa ku mwono wo! Alioze iwuluka ngwe, usoko we unafupu chinji zango lie ni kupalikisa no mashimbu kuhiana chuma chikwo cheswacho mwaha.

“Iya wa kuli yenu, ha kulipikala chinji, mahasa kuwezela matangwa ku mwono wenyi?”—Luka 12:25.

“Kanda nulipikala ni tangwa lia hamene, mumu tangwa lia hamene ni yipikalo yalio. Tangwa ni tangwa likwete yipikalo yalio.”—Mateu 6:34.

Atu anji kakufupa kulanda yuma ya falanga jize keshi najo, chino chakukalisa chinji yuma ku mwono wo