Pwo Lia Lote Yatala Kunyima

LOTE ni asoko jenyi te katwama hamuwika ni Apalahama mu chifuchi cha Kanana. Limwe tangwa Apalahama yamba kuli Lote ngwenyi: ‘Hano heshi nawa chihela chinene chize muchikumbana ni yimuna yetu yeswe. Ngunaliumbu, tulihandunune. Nyi yena muuya sali ali, yami mungwiya sali likwo.’

Lote yatala kanawa chifuchi chacho. Iye yamona chimwe chihela chipema mu chifuchi muze te muli meya ni yambu yipema ya yimuna yenyi. Chino te chifuchi cha Yordau. Kashika Lote anakayako hamuwika ni asoko jenyi nawa ni yimuna yenyi. Ayo yatunga mu mbonge ya Sondome.

Akwa Sondome te atu api chinji. Yino yinakapinjisa chinji Lote, mumu iye te mutu mupema. Yinakaneha nawa yinyengo kuli Zambi. Hohene, Zambi yatuma angelo aali hanga atoweze Lote ngwo manongesa Sondome ni mbonge ya Ngomora mumu ha mukunda wa upi wo.

Angelo yahanjika ni Lote ngwo: ‘Kawashi! Kwata mukwenu-pwo ni ana je aali a mapwo tuhukenu mu limbo lino!’ Lote ni asoko jenyi te kanalaluka ha kutuhuka, kashika angelo yakwata ku moko jo yaatuhwisa haze lia mbonge. Umwe wa kuli angelo yamba ngwenyi: ‘Chinenu hanga nulamwine mwono wenu! Kanda nutala kunyima ka. Chinyinenu ku milundu, hanga nuchine kufwa.’

Lote ni ana jenyi a mapwo yononoka nawa yachina kusuku ni Sondome. Ayo kakamanyine nawa kakatalile kunyima. Alioze pwo lia Lote yehuka. Muze ayo te haheta ndambu kusuku ni Sondome, iye yamana yatala kunyima. Hohene pwo lia Lote yalumuka chingungu cha mungwa. Yena muhasa kumumona ha chizulie chino?

Yetwe ha chino mutuhasa kulifumba limwe longeso lipema. Yino yinatusolwela ngwo Zambi kakulamwina waze akumwononokena, alioze waze keshi kumwononokena kakutokesa mwono wo.