Yosefwe Yamuvwila Kole Kuli Mandumbu Jenyi

TALA chize mukweze yono ananyenganyana nawa kanahongo chinji. Kali Yosefwe. Hazehene mandumbu jenyi hamulanjisa kuli malunga waze anayi ku Engitu. Kuze anayi nenyi iye makapwa kapinji. Mumu liaka mandumbu jenyi alinga chuma chino chipi? Mumu te ayo kakwivwila Yosefwe ukwa.

Tato Yakomba te kakuzanga chinji Yosefwe. Yasolola uwahililo wenyi hali iye ha kumulingila chimwe chikuto chipema chinji. Muze 10 lia mandumbu jenyi yamona ngwo Yakomba te kakuzanga chinji Yosefwe, ayo yaputuka kwivwila Yosefwe ukwa ni kole. Alioze kuli nawa chitela chikwo chize te ayo akumuvwila kole.

Yosefwe kapwile ni yilota yaali. Mu yilota yeswe ni yaali mandumbu jenyi yaliumba kuli iye. Muze alwezele yilota yacho kuli mandumbu jenyi, ayo yamuvwila kole yinji.

Limwe tangwa, mandumbu ja Yosefwe te kanafungu mapanga ja tato Yakomba, mba Yakomba yatuma Yosefwe hanga aye atale chize ayo te ali. Muze mandumbu ja Yosefwe yamona iye kaneza, amwe yamba ngwo: ‘Tumushahenu!’ Alioze Rupene, mukulwana wa mandumbu eswe yamba ngwenyi: ‘Ka, kanda numushaha!’ Mba ayo yakwata Yosefwe yamusa mu wina uze te ushi ni meya. Hohene ayo yatwama hashi hanga anyonge yize te mamulinga.

Ha mashimbu waze ene, yikwiza amwe malunga a ku A-Ishemali. Yunda yamba kuli mandumbu jenyi ngwenyi: ‘Tumulanjisenu kuli A-Ishemali.’ Chenacho che ayo anakalinga. Ayo yalanjisa Yosefwe mu ndando ya 20 a mbongo ja prata. Chino chapwile chipi chinji hamwe ni uhenge!

Yika mandumbu jenyi makamba kuli tato? Ayo yashaha umwe pembe yakwata chikuto chipema cha Yosefwe yachichupika mu manyinga ja pembe wacho. Mba ayo yatwala chikuto chacho kuli tato Yakomba nawa yamba ngwo: ‘Yetwe twawana chikuto chino. Chitale kanawa nyi cha Yosefwe nyi ka.’

Yakomba yamona ngwo chili cha mwanenyi. Iye yakololoka ngwenyi, ‘Kota umwe kashitu wa mu yambu washaha Yosefwe.’ Chenacho che te mandumbu ja Yosefwe anazange hanga tato anyonge. Yakomba kanakapwa ni yinyengo yinji. Yalila ha matangwa anji. Alioze Yosefwe te kali ni mwono. Tutalenu yika yinakapwa kuli iye kuze anakamutwala.