Yehova Kakavulamine Yosefwe

Muze Yosefwe te uchili mu zuwo lia ususu, Falau, mwanangana wa mu Engitu, yalota yimwe yuma yize kakahashile kuyilumbununa kuli mutu niumwe. Umwe wa kuli tuvumbi twenyi yalweza Falau ngwenyi, Yosefwe mahasa kulumbununa yilota yacho. Hohene Falau yamutuma kusanyika Yosefwe.

Falau yamuhula ngwenyi: ‘Shina ena muhasa kulumbununa yilota yami?’ Yosefwe yakumbulula ngwenyi: ‘Mu Engitu mukazala too ni kulia ha miaka shimbiali, alioze miaka yikwo shimbiali yize muyikasulaho mu chifuchi mukapwa zala yinji. Kashika, sakulenu mutu wa mana yoze masongwela kanawa kulia hanga atu jenu akachine kufwa ni zala.’ Falau yamba ngwenyi: ‘Ami yena nasakula! Yena mupwa mutu wamuchiali wa ndundo mu Engitu!’ Kuchi Yosefwe ahashile kulumbununa yilota ya Falau? Yehova mwe wamukwashile.

Ha miaka yacho shimbiali, Yosefwe yafunga kanawa kulia. Chocho yikupwa zala hashi heswe, ngwe chize Yosefwe ambile. Atu te kakwiza ku yihela yeka ni yeka hanga alande kulia kuli Yosefwe. Tato, Yakomba, yevwa ngwo, mu Engitu mwapwile kulia, chocho yatuma ana jenyi kumi hanga ayeko ni kulanda kulia.

Ana ja Yakomba yaya kuli Yosefwe, hazehene Yosefwe yaanyingika. Alioze mandumbu jenyi kakanyingikine ngwo lunga wacho te Yosefwe. Ayo yafulamana kuli iye, ngwe chize alotele muze te uchili mukweze. Yosefwe kazangile kunyingika nyi mandumbu jenyi te achili ni mbunge yipi. Hachino yaamba ngwenyi: ‘Enu nuli ngendeshi. Nunazange nunyingike ulelu wa chifuchi chetu.’ Ayo yakumbulula ngwo: ‘Ka! Yetu tunakatuka ku Kanana. Katusemene 12. Umwe wa kuli yetu hanafu, kasulasongo ketu kasalanga ni tata.’ Hachino, Yosefwe yaalweza ngwenyi: ‘Nukeza ni kasulasongo kenu, mba ngunutayize.’ Chocho yafuna ku zuwo lio.

Muze kulia chahwile, Yakomba yaatuma nawa ku Engitu. Mu wenyi wacho ayo yaya hamwe ni kasulasongo kwo Mbenjamine. Mba eseke mandumbu jenyi, Yosefwe yatuma kusa musenge wa prata mu tuku ya Mbenjamine, ni kwaakunjika mulonga ngwo kawiya. Muze ndungo ja Yosefwe awanyine musenge wacho mu tuku ya Mbenjamine, mandumbu jenyi kevwile yikola yinji ku mbunge. Ayo yeta kuli Yosefwe hanga aalinge cheswacho mazanga mu chihela cha Mbenjamine.

Hachino, Yosefwe yanyingika ngwo mandumbu jenyi halumuna mbunge. Yosefwe kakahashile nawa kusweka yize apwile ni kwivwa ku mbunge. Yaputuka kulila ni kwaalweza ngwenyi: ‘Yami ndumbwenu, Yosefwe. Shina tata uchili ni mwono ndo haliapwila?’ Mandumbu jenyi yashimwoka. Iye yaalweza ngwenyi: ‘Kanda nwivwa yikola ku mbunge hamukunda wa yize nwangulingile. Zambi kangutumine kuno hanga ngulamwine mwono wenu. Haliapwila yenu hanga nwize hamwe ni tata.’

Ayo yaya ku zuwo yalweze lusango yono mupema kuli tato ni kuya nenyi ku Engitu. Kwapalikile miaka yinji, mba Yosefwe ni tato yapwa nawa hamuwika.