KAPITULU 37
Shina katamba kungupapachisa?
Sako chilayi ha maliji amwenemwene ni waze amahuza ha yikuma yinahateho:
Upapachiso, chuma chize Akwa-Kristu eswe atamba kulinga.
□ Umwenemwene
□ Mahuza
Chuma chilemu chize mutu atamba kumupapachishila chili kupwa ni ufunge hanga ahone kulinga shili.
□ Umwenemwene
□ Mahuza
Upapachiso muukukwasa hanga akakulamwine.
□ Umwenemwene
□ Mahuza
Nyi kakupapachishile, kuchi kakumbulula kuli Zambi ha yuma yize wakulinga.
□ Umwenemwene
□ Mahuza
Nyi masepa je haapapachisa, chino chinalumbunuka ngwo ni yena hiwalilulieka hanga akupapachise.
□ Umwenemwene
□ Mahuza
NYI NGWE wakwononokena shimbi ja Zambi, unakolesa usepa we ni Yehova, ni kuhanjika ni akwenu hakutwala ku yize wakufuliela, kota hiwaputuka kunyonga ku upapachiso. Mba kuchi muhasa kunyingika nyi hiwajama hanga akupapachise? Chitangu tuhengwolenu yikuma ayi yili helu yinambe ngwo, umwenemwene nyi mahuza, mba uhase kukumbulula chihula chino.
● Upapachiso, chuma chize Akwa-Kristu eswe atamba kulinga.
Umwenemwene. Yesu katumine hanga tumbaji twenyi aapapachise. (Mateu 28:19, 20) Kwamba umwenemwene, chipwe Yesu mwene, katayijile hanga amupapachise. Nyi unazange kukaula Kristu, katamba kukupapachisa muze mujama ni kukwata chiyulo chino chilemu.
● Chuma chilemu chize mutu atamba kumupapachishila chili kupwa ni ufunge hanga ahone kulinga shili.
Mahuza. Upapachiso chili chilayi hanji ngwetu kusolola ku mbunge ngwetu, twalihana kuli Yehova. Upapachiso hi chuma ko chize chakukwika mutu kulinga yuma yize yili mu mbunge yenyi yize anazange mu usweke. Alioze, yena mulihana kuli Yehova mumu unazange kutwama kulita ni shimbi jenyi.
● Upapachiso muukukwasa hanga akakulamwine.
Umwenemwene. Mbimbiliya yinambe ngwo, upapachiso uli chuma chilemu mba mutu akamulamwine. (1 Petulu 3:21) Alioze, chino kuchalumbunukine ngwo, upapachiso uli chuma chize chakufunga mutu nyi kwalingiwa umwe luyinda. Katamba kukupapachisa mumu wakuzanga Yehova, chikwo nawa unazange kumulingila ni mbunge ye yeswe, ku miaka yeswe.—Marku 12:29, 30.
● Nyi kakupapachishile, kuchi kakumbulula kuli Zambi ha yuma yize wakulinga.
Mahuza. Mukanda wa Tiangu 4:17 unambe ngwo: “Kashika kuli yoze manyingika kulinga kanawa, alioze kechi kuchilinga, kuli iye kuchapwa shili.”—chino chinakwata hali mutu mweswe, chipwe hanamupapachisa hanji ka. Kashika, nyi unanyingika yuma yalita mba mumona ngwe hiwajama, muhasa kuhanjika ni yisemi je hanji Akwa-Kristu akwo waze ajama. Chino muchikukwasa kujama ni kukupapachisa.
● Nyi masepa je haapapachisa, chino chinalumbunuka ngwo ni yena hiwalilulieka hanga akupapachise.
Mahuza. Mutu ni mutu katamba kukwata mwene chiyulo cha kulihana ni kumupapachisa. (Samu 110:3) Watamba wika kulihana ni kukupapachisa, muze munyingika kanawa yize yinalumbunuka kupwa Chela cha Yehova ni kupwa ni shindakenyo ngwe hiwalilulieka hanga ulinge chuma chino chilemu.—Chilumbununyi 5:4, 5.
Upapachiso Wakwalumuna Mwono
Upapachiso wakwalumuna mwono wa mutu ni kuneha yiwape yinji. Alioze, chino chili chiteli chinene, kutwama kulita ni chilakenyo chize mutu alingile kuli Yehova.
Shina hiwalilulieka hanga ulinge chilakenyo chacho, hanji ngwetu ulihane kuli Yehova? Nyi chenacho, wahilila. Achi chili chiwape chinene, kulingila Yehova ni mbunge ye yeswe ni kutwama kulita ni shimbi jenyi hanga usolole ngwe walihana kuli iye.—Mateu 22:36, 37.
Mulilongesa chize muhasa kutesa yize mulinga ku mwono hanga uwahilile.
CHISONEKO CHINAKWATE MUTWE
“Nutumbikile mijimba yenu mulambu wa mwono, usandu, wa kupemena chikolo kuli Zambi. Chenacho we uvumbiko wenu wakulita ni kunyonga cha mana.”—A-Roma 12:1.
[Chikuma chilemu]
Kunyingika ngwami hanangupapachisa, chakungukwasa kwehuka majila amwe waze te mahasa kungutwala kulinga yuma yipi.”—Holly
[Chizulie]
Chizechene ngwe ulo, upapachiso wakwalumuna mwono wa mutu—kashika hi chuma ko chize twatamba kulelesa