KAPITULU 35
Kuchi Munguhasa Kupwa Sepa lia Zambi?
Jeremy hanyima lia kupalika mu umwe luyinda, yamona ulemu wa kupwa sepa lia Zambi. Iye yamba ngwenyi: “Muze napwile ni miaka ni 12, tata yatuhichika.” Yanunga ni kwamba ngwenyi: “Tangwa limwe ufuku te ngunalembe ha muhela, yingwita kuli Yehova hanga akwase tata ahiluke ku zuwo.”
Muze te hahonga Jeremy yaputuka kutanga Mbimbiliya. Muze atangile Samu 10:14, maliji waze awanyineho yamukwata chinji ku mbunge. Mukanda wacho unambe ngwo: “Mwe mukwa luyinda kakulikunjika kuli yena. Yena uli chikwashi cha ana-ashiwa.” Jeremy yamba ngwenyi: “Namwene ngwami Yehova kanahanjika ni yami ni kusolola ngwenyi kali chikwashi chami kanda Tata. Kukwatwamine tata mukwo walifwa ni Yehova.”
CHIPWE ngwe unapalika mu yuma ngwe yize Jeremy apalikile hanji ka, Mbimbiliya yinasolola ngwo Yehova kanazange kupwa sepa lie. Kashika Mbimbiliya yinambe ngwo: “Kundamenu kuli Zambi, mba iye kumakakundama kuli yenu.” (Tiangu 4:8) Nyonga ha ulumbunwiso wa maliji wano: Chipwe ngwe kushi kuhasa kumona Yehova, chipwe ngwe iye kalisa chinji ni yena, nihindu Yehova kanakusanyika hanga upwe sepa lienyi!
Kupwa sepa lia Zambi chakufupiwa kusa tachi. Tutalenu chimwe chilweza: Nyi watumba chimwe chitemo, unanyingika ngwe chitemo kuchishi kulisokela ukawacho. Watamba kuchihinjila meya mashimbu eswe mba chisoke kanawa. Chino che chakulingiwa ni usepa wetu ni Zambi. Yika watamba kulinga hanga usepa wacho ukole?
Ulemu wa Kulilongesa Mbimbiliya
Usepa upema wakufupiwa yuma yaali yilemu, kupanjika ni kuhanjika. Ni usepa ni Zambi newo che chimuwika. Kutanga ni kulilongesa Mbimbiliya yili jila yakupanjikilamo yuma yize Zambi anazange kutulweza.—Samu 1:2, 3.
Hanji kuushi kuzanga chinji kulilongesa. Akweze anji kakuzanga kutala TV, kuheha, hanji kupalikisa mashimbu ni masepa jo. Alioze nyi unazange kupwa sepa lia Zambi, kukwatwamine jila yikwo. Jila yili wika kumupanjika ha kulilongesa Liji lienyi, Mbimbiliya.
Alioze kanda ulipikala. Kulilongesa Mbimbiliya kuchatambile kupwa ngwe yiteli yilemu. Hakehe-hekehe muputuka kuzanga kuchilinga, chipwe ngwe uli mutu yoze ushi kuzanga kulilongesa. Chuma chitangu chize watamba kulinga chili kusa mashimbu hanga ulilongese Mbimbiliya. Umwe mukweze avuluka ngwo Lais yamba ngwenyi: “Yami ngukwete katalilo wami.” Yanunga nawa ngwenyi: “Chuma chitangu chize nakulinga chimenemene chili kutanga kapitulu umuwika wa Mbimbiliya.” Maria uli miaka 15, kakwete katalilo walisa. Iye yamba ngwenyi: “Nakutanga Mbimbiliya ufuku shimbu kanda nguchiya ni kupomba.”
Nyi unazange kuputuka kulilongesa Mbimbiliya, tala mushete ha lifwo 292. Muhasa kusoneka mashimbu waze muhasa kuzachisa 30 a minutu hanga ulilongese Mbimbiliya.
․․․․․
Kulinga katalilo chili wika uputukilo. Muze muputuka kutanga Mbimbiliya, muhasa kumona ngwe, ha mashimbu amwe hi chashi ko kutanga Mbimbiliya. Hanji mutayiza maliji a Jezreel wa miaka 11 yoze wambile ngwenyi: “Yihanda yimwe ya Mbimbiliya yikalu kutanga, yakufupiwa kulihumikiza mba uwane ulumbunwiso.” Nyi ngwe mulivwa chocho, kanda uhonga. Muze unatange Mbimbiliya pwako ni nyonga ngwe, wano kali mashimbu waze waluliekanga hanga upanjike Yehova Zambi, sepa lie. Nyi muosa tachi, muputuka kuzanga chinji kulilongesa Mbimbiliya, chikwo nawa muyuka chinji!
Kulemba Chili Chilemu
Yilemba yili jila ya kuhanjika ni Zambi. Kashika kulemba chili chawana chilemu! Muhasa kuhanjika ni Yehova Zambi ha mashimbu eswawo, mwalwa hanji ufuku. Shimbu lieswalio iye makwivwa. Chahiana ulemu, Yehova kanazange kupanjika yize unazange kumulweza. Kashika Mbimbiliya yakwamba ngwo: “Ha yuma yeswe ku kulemba ni kuliumba hamwe ni kusakwila, kwita chenu akachinyingike kuli Zambi.”—A-Fwilipu 4:6.
Ngwe chize chisoneko chasolola, kuli yuma yinji yize muhasa kuhanjika ni Yehova. Yuma yacho muyihasa kupwa kapinda, kusakalala che ni yuma yize muhasa kusakwilila. Kota wakuzanga kusakwilila masepa je ha yuma yipema yize ayo akukulingila. Chizechene nawa, muhasa kusakwilila Yehova yoze wakukulingila yuma yinji, kuhiana sepa mweswawo yoze ukwete.—Samu 106:1.
Soneka mushi yuma yize yena wakusakwilila Yehova.
․․․․․․
Kwamba umwenemwene kwatwama yuma yize yakutupinjisa ha mashimbu amwe. Samu 55:22 unambe ngwo: “Mbila chiteli che hali Yehova, iye makakukolesa. kechi kutayiza akwa ululi kukokoloka nilimwe tangwa.”
Mu mifunda yili mushi, sonekamo chuma cheswacho chize chinakusakalalisa chize unazange kuhanjika mu yilemba.
․․․․․
Lilongese ha Yuma Yize Yalingiwile ku Mwono we
Kuli yuma yimwe hakutwala ku usepa we ni Zambi yize kuwatambile kulengulula. Mukwa-kwimba masamu Ndawichi kasonekene ngwenyi: “Panjikenu nukambe ngwenu, Yehova iye mupema.” (Samu 34:8) Muze Ndawichi asonekene mukanda wa Samu kapitulu 34, iye te wachipalika mu umwe ukalu. Ha shimbu jacho te kanachina Mwanangana chingalwe Saulu, chino chapwile cheseko chinene. Hachino, yachinyina kuli akwa-kole jenyi, A-Filistea. Iye kamwene ngwe te kechi kukatukako ni mwono, kashika yasolola mana, yalionga ngwe kanazaluka mba yahasa kuchina.—1 Samuele 21:10-15.
Ndawichi kakalifumanyishine mwene ha kuhasa kuchina. Alioze, yafumanyisa Yehova. Ku uputukilo wa mukanda wa Samu uze twatongolanga, iye yasoneka ngwenyi: “Nafupile Yehova, iye wangukumbulwile, mba wangupulwile ku woma wami weswe.” (Samu 34:4) Kashika yuma yize Ndawichi apalikile ku mwono yamutwalile kukolweza akwo ngwenyi: “Panjikenu nukambe ngwenu, Yehova iye mupema.”a
Shina unewuluka kama chuma chimwe chalingiwile ku mwono we chize chinakwehe shindakenyo ngwe Yehova kakukufunga? Nyi chenacho, soneka yuma yacho mushi. Yize muhasa kulinga: Yakulitakana nayo ye, kuyatambile wika kupwa yize yakukomwesa. Muhasa kunyonga ha yiwape yikehe-yikehe yize wakuzuka ha hita tangwa. Yuma yimwe muyihasa kupwa yizeyene twakulelesa.
․․․․
Hanji yisemi je kakulongesele hakutwala ku Mbimbiliya. Nyi chenacho, chili chiwape chinene. Chipwe chocho, watamba kulilingila usepa we ni Zambi. Nyi kanda uchichilinga, sango jili ha kapitulu yono mujikukwasa kuputuka. Yehova mawahisa tachi je. Mbimbiliya yinambe ngwo: “Etenu, mba kumanwaha; fupenu, mba kumunuwana; ngongwelenu, mba kumanwazulwila.”—Mateu 7:7.
TANGA NAWA HAKUTWALA KU CHIKUMA CHINO HA VULUME 1, KAPITULU 38 NI 39
Shina chakukukaliwila kuhanjika ni akwenu hakutwala kuli Zambi? Nyingika chize muhasa kukalila yuma yize wakufuliela.
[Maliji mushi lia lifwo]
a Mbimbiliya jimwe jakulumbununa maliji “panjikenu nukambe ngwenu,” ngwo, “fupa kunyingika yena mwene,” “limwene yena mwene” hanji “yena mwene mulimwena.”—Bíblia na Linguagem de Hoje, O Livro: A Bíblia para Hoje ni The Bible in Basic English.
CHISONEKO CHINAKWATE MUTWE
“Kawaha yiswale mu spiritu, mumu wanangana wa malilu niwo.”— Mateu 5:3.
YIZE MUHASA KULINGA
Hita tangwa, tanga wika mafwo awana a Mbimbiliya. Nyi wachilinga, mutanga Mbimbiliya yamuwundu ha mwaka umuwika.
UNACHINYINGIKA NYI . . . ?
Kusa mashimbu hanga utange mukanda uno ni kutayiza yiyulo yize yinakatuka mu Mbimbiliya chinasolola ngwo, Yehova kanasolola zango lienyi hali yena.—Yoano 6:44.
YIZE MUNGULINGA!
Nyi ngunazange kuyuka chinji ha longeso liami lia Mbimbiliya, natamba kulinga ․․․․․
Hanga nguhone kuvulama kulemba, natamba kulinga ․․․․․
Ngunazange kuhula yisemi jami hakutwala ku chikuma cha ․․․․․
KUCHI MUHASA KUKUMBULULA?
● Kuchi muhasa kulivwisa kuwaha ha longeso lie lia Mbimbiliya?
● Mumu liaka Yehova anazange kupanjika yilemba ya atu yihenge?
● Kuchi muhasa kupemesa yilemba ye?
[Chikuma chilemu]
Muze napwile kanuke, napwile ni kufunyina-funyina yilemba. Musono nakweseka kulemba hakutwala ku yuma yipema ni yipi ya hita tangwa. Amu matangwa alisa ni akwo, chino chakungukwasa kwehuka kufunyina-funyina yuma mashimbu eswe.’—Eve
[Mushete]
Hengwola kanawa Mbimbiliya ye
1. Sakula jimwe sango ja Mbimbiliya jize unazange kutanga. Lemba ni kwita spiritu yisandu hanga yikukwase kuwana ulumbunwiso wa yize unatange.
2. Tanga hakehe-hakehe. Kanda uzomboka. Nyonga ha yize unatange. Chakutalilaho, nyonga ha yuma yize yinalingiwa, panjika maliji ja atu waze anahanjika ha lusango wacho, evwa vumba lia yuma ni kupanjika kulia chize anatongola ha lusango ni yuma yikwo nawa. Livwise kuwaha muze unatange Mbimbiliya!
3. Nyonga ha yize watanga. Lihule yihula ngwe yino:
● Mumu liaka Yehova echele hanga sango jino jipwe mu Mbimbiliya?
● Atu aka waze natamba kwimbulula ni waze chatambile kwimbulula?
● Yuma yika munguhasa kulilongesa ha yize natanga?
● Yika lusango yono anangulongesa hakutwala kuli Yehova ni mulali wenyi wakulingilamo yuma?
4. Lemba kuli Yehova. Mulweze yize walilongesa ha longeso lie ni chize unazange kukaula yuma yacho ku mwono we. Pwako ni kusakwilila Yehova ha chawana chize hanakwehe, Liji lienyi, Mbimbiliya!
[Chizulie]
“Liji lie liapwa ndeya ku yiliato yami kanda lutemo ku jila yami.”—Samu 119:105.
[Mushete]
Lianga kulinga yuma yize yahiana ulemu
Shina uli mutu yoze katwamine ni shimbu lia kulemba ni kulilongesa Mbimbiliya? Kanji-kanji chino chinatale ha yuma yize wakusa kulutwe muze unatese yize mulinga.
Eseka kulinga chino: Anda chimwe chikashi musamo mawe anji anene-anene. Haliapwila, zalisa chikashi chacho ni mavu ndo ku mukomo. Chikashi hichazala too ni mawe ni mavu.
Haliapwila, chiza mawe ni mavu mu chikashi chacho, alioze kanda waambila. Linga chuma chizechene walinganga, alioze lianga kusa mavu mu chikashi mba musa mawe helu. Shina mawe eswe katamo? Ka. Mumu walianganga kusamo mavu.
Yika twalilongesa? Mbimbiliya yinambe ngwo: “Nukasele shindakenyo ha yuma yahiana kupema.” (A-Fwilipu 1:10) Nyi wasa yuma yikehe-yikehe ngwe, yiheho kulutwe lia yuma yeswe ku mwono we, mumona ngwe kuushi ni mashimbu a kulinga yuma yize yahiana ulemu, yuma ya ku ufulielo. Alioze, nyi wakaula chiyulo cha mu Mbimbiliya mumona ngwo uli ni mashimbu hanga ulinge yuma ya ku ufulielo ni mashimbu a kuheha. Yeswe yinatale ha yize mulianga kusa mu chikashi!
[Chizulie]
Chizechene ngwe chitemo chakufupiwa kuchifunga kanawa, ni usepa wetu ni Zambi newo che watamba kupwa mba ukole