Kuchi Mutuhasa Kulilulieka Kanawa ha Kuya ku yikungululo?

Nyi yena wakulilongesa Mbimbiliya ni Yela ja Yehova, kota wakulianga kweseka kutala yikuma yize munukalilongesa. Nawa nyi walilulieka chocho ha kuya ku chimwe chikungulwila chetu ni kulikungulula, mu kayuka chinji. Kuyuka chipema chakwiza ni twapwa ni ndako yipema ya kulilulieka.

Fupa chihela ni ola hanga ulilongese. Kuli muhasa kulihumikiza kanawa hanga ulilongese? Ha chimene? Nyi muze kanda uchiya ku milimo? Nyi chingoloshi? Nyi muze ana eswe haya ni kupomba? Chipwe ngwe hanji uchi kuhasa kulilongesa mashimbu anji, nyonga chize muhasa kufupa ola ya kulilongesa, nawa kanda wecha nichimwe chikupinjise. Fupa chimwe chihela cha uhumikizo, nawa chatela kuchiza yuma yeswe ize muyikupinjisa ngwe kuyika chisaji, ni chisaji cha yizulie, ni telefone. Muze kanda uchiputuka kulilongesa, chatela kulemba hanga akukwase kuhuzulula yipikalo ye ya tangwa ha tangwa, hanga uhase kulihumikiza mu Liji lia Zambi.—A-Fwilipu 4:6, 7.

Lulieka malongeso hanga ukakumbulule. Pwako ni unyingikiso wa chikuma cheswe. Nyonga hakutwala ha chishina cha chikuma hanji kapitulu, yoze mukalonga, tala chize yikuma yikehe-yikehe yinalita ni chishina cha chikuma, tala yimwe yizulie, nawa lihulikile ha yikuma yilemu ya yihula. Tanga ha mifunda, mba uwane kumbululo lia yihula ize hanayisoneka kulu. Fupa tupitulu waze ali ha Malongeso hanga watange, nawa nyonga chize analita ni malongeso. (Yilinga 17:11) Nyi yena muhasa kuwana kumbululo lia chihula, funjika ha mifunda hanga uwane kumbululo lia mu mbunge ye. Mba mu ukungululo yena muhasa kuzundula kwoko lie, nyi muzanga kuhana limwe kumbululo mu maliji je.

Ha kuhengula yikuma yeka ni yeka ize twakulilongesa ha pwoso jeswe mu yikungululo yetu, yena mukawezela manyonga aha ku “upite” wa yinyingi ya mu Mbimbiliya.—Mateu 13:51, 52.

• Ndako yika chatamba kupwa nayo muze kanda uchiya ku yikungululo?

• Kuchi yena muhasa kulilulieka hanga ukahane limwe kumbululo ku ukungululo?