Shina Lamba Muliza Kahwa?

YIKA MBIMBILIYA YINAMBE

‘Zambi. . . makakusumuna masoji eswe ku meso jo. Kufwa kuchichi kapwa ko nawa; kukuchi kapwa nawa miteto, chipwe yikola, ka.’—Usolwelo 21:3, 4, Mukanda Usandu wa Zambi.

YIKA MALIJI WANO MAHASA KULUMBUNUKA KULI YENA

Kanahana ushindakenyo ngwo hi Zambi ko wakuneha lamba hali yetwe.—Tiangu 1:13.

Kakutakamisa hakunyingika ngwo Zambi kananyingika chize yetwe twakwivwa muze twakumona lamba.—Zekaria 2:8.

Kanahana kutalatala ngwo lamba lieswe muliza kahwa.—Masamu 37:9-11.

CHAMWENEMWENE YETWE MUTUHASA KUTAYIZA YIZE MBIMBILIYA YINAMBE?

Ewa, mutuhasa kuyitayiza, ha mukunda wa yitela yaali:

• Zambi keshi kuzanga lamba ni uhenge. Nyonga chize Yehova Zambi te akwivwa muze atu jenyi te akwaamwesa lamba ha mashimbu a shakulu. Mbimbiliya yinambe ngwo iye te kakwivwila atu jenyi yinyengo ‘ha mukunda wa waze te akwaapinjisa ni kwahungumiona.’—Akwa Kuyula 2:18, Tradução do Novo Mundo.

  Zambi keshi kuzanga yitanga ya waze akumwesa akwo lamba. Ngwe chilweza chino, Mbimbiliya yinambe ngwo, ‘moko waze a kushaha mutu yoze keshi chitela’ kali chizelwokeso kuli iye.—Yishima 6:16, 17.

• Zambi kakutufunga mutu ni mutu. Hi mutu wika ko ‘unanyingika lamba ni yikola yenyi mwene’ alioze ni Yehova neye kanayinyingika!​—2 Sango ja Mianangana 6:29, 30.

  Mu Wanangana wenyi, kwasala hakehe hanga Yehova ahwise lamba lia mutu ni mutu. (Mateu 6:9, 10) Ha mashimbu wano, iye kakuhana utakamiso kuli waze akushimbwila kuli iye ni ungunu weswe.—Yilinga 17:27; 2 A-Korindu 1:3, 4.