LONGESO 3
Rahape Yafuliela Yehova
Tunyongenu ngwe tuli mu mbonge ya Yeriku. Mbonge yacho te yatwama mu chifuchi cha Kanana, atu jamo te keshi kufuliela Yehova. Pwo yoze te akuvuluka ngwo Rahape te mwe atwama.
Muze te uchili kanuke, iye kevwile sango ja chize Mose atetele Kalunga-Lwiji-Muchila ni kusongwela A-Izalele hanga atuhuke mu Engitu. Iye kevwile nawa chize Yehova akwashile A-Izalele hanga akumbe jita kuli akwa kole jo. Haliapwila iye hevwa ngwo A-Izalele hasa chilombo cho hakamwihi ni Yeriku!
Rahape kaswekele ngendeshi mumu iye yafuliela Yehova
Ha umwe ufuku, A-Izalele aali yaya ni kwendesa mbonge ya Yeriku. Ayo yaheta ndo ku zuwo lia Rahape. Iye yaatambula kanawa, nawa ayo yatwama ku zuwo lienyi. Ha ufuku, mwanangana wa Yeriku yanyingika ngwo mu mbonge muli amwe ngendeshi, nawa ngwo ayo kaya ku zuwo lia Rahape. Kashika mwanangana yatumako amwe malunga hanga aakwate. Rahape yasweka ngendeshi jacho aali ha fulumba lia zuwo lienyi nawa yamba kuli malunga waze mwanangana atumine ngwenyi: ‘Ngendeshi te kuno ali, alioze atuhukanga kulu mu mbonge. Nyi nwaakaula haliapwila, munuhasa kwaakwata!’ Yena unanyingika mumu liaka Rahape anakasweka ngendeshi?— Mumu iye yafuliela Yehova nawa te kanyingika ngwo Yehova mahana chifuchi cha Kanana kuli A-Izalele.
Muze ngendeshi te kanda achikatuka ku zuwo lia Rahape, ayo yamulakenya ngwo iye ni asoko jenyi makaalamwina muze Yeriku mayinongesa. Yena unanyingika yize ayo ambile kuli Rahape hanga alinge?— Ayo yamba ngwo: ‘Kwata lwoji au muchila, hanga umukase haze lia kapenda wa zuwo lie. Nyi wachilinga, mweswao makapwa mu zuwo lie makamulamwina.’ Rahape yalinga nikulita ni chize ngendeshi amulwezele. Yena unanyingika yize yapwileko?—
Yehova yalamwina Rahape ni asoko jenyi
Ha kupalika cha amwe matangwa, A-Izalele yajinga mbonge ya Yeriku, ni kuhola kulu. Ayo yayijinga ha matangwa asambano, kamuwika ha tangwa. Alioze ha tangwa liamuchishimbiali, ayo yajinga mbonge ha yisuho shimbiali. Mba hi ayo eswe yakololoka chikolo. Hohene, Yehova yapuzula yipanga ya mbonge ya Yeriku. Alioze zuwo lili ni lwoji muchila haze lia kapenda liso kupuzuka! Yena muhasa kumona zuwo liacho ha chizulie?— Rahape ni asoko jenyi yaalamwina!
YiKa yena muhasa kulilongesa hali Rahape?— Rahape yafuliela Yehova ha mukunda wa kunyingika yuma yeswe ya ukomokeso yize Yehova alingile. Ni unalilongesa yuma yinji yaukomokeso hakutwala kuli Yehova. Ni yena unafuliela Yehova ngwe chize Rahape alingile?— Yetwe tunanyinga ngwo yena muhasa kuchilinga!