Rahape Yasweka Ngendeshi

Muze ngendeshi A-Izalele ayile mu mbonge ya Yeriku, ayo yatulila ku zuwo lia pwo yoze te avuluka ngwo Rahape. Mwanangana wa Yeriku, yachinyingika, chocho yatuma maswalele ku zuwo lia Rahape. Iye yasweka ngendeshi ku fulumba ni kutuma maswalele kweka. Yalweza ngendeshi ngwenyi: ‘Yami mungunukwasa mumu ngunanyingika ngwami, Yehova kali hamwe ni yenu, nawa munukakumba chifuchi chino. Lisesa ngulakenyenu ngwo munukalamwina asoko jami.’

Ngendeshi yalweza Rahape ngwo: ‘Tunakulakenya ngwetu mutu mweswe makapwa mu zuwo lie kechi kalemana.’ Yamwamba nawa ngwo: ‘Kasa lwoji au muchila ku kapenda wa zuwo lie, chocho, asoko je makaalamwina.’

Rahape yatuhwishila ngendeshi ku lwoji ha kapenda wa zuwo lienyi. Ayo yachinyina ku milundu, koko yaswamako ha matangwa atatu mba yafuna kuli Yoshua. Hachino, A-Izalele yazauka Lwiji Yordau ni kuliluieka hanga atambule chifuchi. Yeriku yapwile mbonge yitangu yize ayo akumbile. Ha matangwa asambano Yehova yaalweza hanga ajinguluke mbonge chisuho chimuwika ha tangwa. Alioze ha tangwa lia muchishimbiali, ayo yajinguluka mbonge ha yisuho shimbiali. Mba asasendote yemba yitavwi, nawa maswalele yakololoka ni liji likolo. Chocho, yikalakala ya mbonge yiyipuzuka! Alioze zuwo lia Rahape lize atungile ha chikalakala cha mbonge kuliakapuzukile. Rahape ni asoko jenyi yaalamwina hamukunda wa ufulielo wo kuli Yehova.