Ululikiso Uze Unalingi Upale wa Yehova

HASHI heswe hali maululikiso anji a uwayilo, a mafwefwe, a mingoso ni maululikiso akwo. Hita ululikiso uli ni shimbi jawo ni milimo yize wakulinga. Alioze kuli ululikiso umuwika uze walisa ni maululikiso wano eswe. Liji lia Zambi linasolola pundu ngwo ululikiso wacho uli ululikiso wa Yela ja Yehova.

² Chapema chinji muze wapwa mu ululikiso wa Yehova. Hiwaputuka kulinga upale wa Zambi mumu hiwanyingika chize wapwa. (Samu 143:10; Roma 12:2) Uli kavumbi ka Zambi hamuwika ni mandumbu a zango a hashi heswe. (2 Kori. 6:4; 1 Petu. 2:17; 5:9) Ngwe chize hanalakenya mu Liji lia Zambi, kulinga chino muchikuyukisa ni kukunehena uwahililo unji. (Yishi. 10:22; Marku 10:30) Nyi unashishika ni kulinga upale wa Yehova haliapwila, unalilulieka hanga ukapwe ni mwono wa mutolo kulutwe lia matangwa.—1 Timo. 6:18, 19; 1 Yoa. 2:17.

³ Yehova, Sakatanga yetu Munene kali ni ululikiso umuwika hashi heswe uze mwene akuyula. Chinalumbunuka ngwo, iye kali Mutwe wa ululikiso wacho. Yetu twafuliela chinji muli iye. Iye Ngaji yetu, Mukwa-kutwaha shimbi nawa Mwanangana wetu. (Iza. 33:22) Hakupwa Zambi yoze wakululieka yuma kanawa, kanalulieka yuma hanga ‘tukalakale hamwe nenyi’ muze tunalingi upale wenyi.—2 Kori. 6:1, 2.

⁴ Amu songo lia miaka yino linakundama, mutununga mu chiyulo cha Mwanangana yoze atongola, Kristu Yesu. (Iza. 55:4; Uso. 6:2; 11:15) Yesu mwene kambile ngwenyi, tuvumbi twenyi makalinga milimo yinji kuhiana yize iye alingile hano hashi. (Yoa. 14:12) Uno uli umwenemwene, mumu tumbaji twa Yesu te moka chinji ni kukalakala shimbu lisuku, nawa ku yihela yinji. O te mambujola sango lipema lia Wanangana mu yifuchi yeswe ya hashi.—Mateu 24:14; 28:19, 20; Yili. 1:8.

⁵ Yino yeswe yinalingiwa. Alioze, ngwe chize ambile Yesu, mulimo wa kwambujola sango lipema muukahwa ha shimbu lize Yehova mwene atongola. Uprofeto wa mu Liji lia Zambi unasolola ngwo, tangwa linene lia ufwatulo wa Yehova hiliakundama.—Joele 2:31; Zefa. 1:14-18; 2:2, 3; 1 Petu. 4:7.

⁶ Nyi twanyingika kanawa yize Yehova anazange ha matangwa wano a kusula, twatamba kusa tachi hanga tulinge yize Zambi anazange. Kulinga yuma yacho, ndo tunyingike kanawa chize ululikiso wa Zambi wakukalakala ni kuukaula kanawa. Ululikiso wacho wakukaula malongeso ni shimbi jeswe jize jatwama mu Liji lia Zambi.—Samu 19:7-9.

⁷ Atu ja Yehova kakutwama kanawa mu sambukila ni kukalakala hamuwika ni akwo, hakukaula usongwelo wa mu Mbimbiliya. (Samu 133:1; Iza. 60:17; Roma 14:19) Yika yakutukwasa mba tupwe alinunga ni mandumbu jetu a hashi heswe? Zango. Zango lize tukwete lie liakutukwasa. (Yoa. 13:34, 35; Kolo. 3:14) Kusolola zango liacho chakutukwasa nawa kupwa ni sambukila ni chihanda cha ululikiso wa Yehova chize chili mu malilu.

CHIHANDA CHA ULULIKISO WA YEHOVA CHA MU MALILU

⁸ Aprofeta Izaia, Ezekiele ni Daniele, kamwene mu usolwelo chihanda cha ululikiso wa Yehova chize chili mu malilu. (Iza., kap. 6, Eze., kap. 1; Danie. 7:9, 10) Ni postolo Yoano neye yamusolwela ululikiso wacho, mba yatulumbunwinawo hakehe mu mukanda wa Usolwelo. Kamwene Yehova kali ha ngunja ya uhenya kuze kwapwile angelo waze te anambe ngwo: “Musandu, musandu, musandu, Mwene Zambi ya Ndundo-Jeswe, yoze wapwile, kwali, meza kupwa.” (Uso. 4:8) Yoano yamona nawa “mukachi ka ngunja [muli] . . . umwe mwana-panga,” mwe Mwana-panga wa Zambi, Yesu Kristu.—Uso. 5:6, 13, 14; Yoa. 1:29.

⁹ Amu usolwelo wacho unasolola Yehova kanatwama ha ngunja, chinalumbunuka ngwo iye we Mutwe wa ululikiso uno. Hakutwala kuli iye ni chihela atwama nacho, mukanda 1 Sango ja Mianangana 29:11, 12 unambe ngwo: “Unene weswe wa mbala wa yenu Yehova, ni ndundo, ni uhenya, ni kukumba, ni wanangana. Mumu cheswe chili mwilu ni hashi nichenu. We wanangana wa yenu Yehova, ni yenu kunwatunda ngwe mutwe helu lia yuma yeswe. Upite ni ulemu kuli yenu unakatuka, ni yenu nwakuyula yuma yeswe. Ngolo ni ndundo jili mu chiyulo chenu, ni poko ya kulemesa atu ni kuhana tachi kuli eswe.”

¹⁰ Yesu Kristu kali ha chihela chinene mu malilu nawa hanamwehe chiyulo chilemu mumu kali mukwa-milimo-ni-mukwo wa Yehova. Ewa, Zambi hanase ‘yuma yeswe kushi lia yiliato yenyi. Nawa hanamuse mutwe wa yuma yeswe mu chikungulwila.’ (Efwe. 1:22) Postolo Paulu yamba hakutwala kuli Yesu ngwenyi: “Zambi hanamunangamisa chikolo, hanamwehe jina lize lili helu lia majina eswe; hanga mu jina lia Yesu, makungunwa eswe akaliumbe, ni a mwilu, ni a hashi, ni a kushi lia hashi, hanga malimi eswe akatayize ngwo, Yesu Kristu iye mwe Mwene, chocho akachichimieke Zambi Tata.” (Fwili. 2:9-11) Kashika, twatamba kujikijila mu chiyulo cha ululi cha Yesu Kristu.

¹¹ Profeta Daniele yamona mu usolwelo Mukulu-wa-Matangwa kali ha ngunja yenyi mu malilu ni unji wa angelo “kanunu ka tununu [waze] amuvumbikile, ni kumi lia tununu twa yisuho ya kumi lia tununu amanyine kumeso jenyi.” (Danie. 7:10) Mbimbiliya yinatongola unji wa angelo jacho ngwo “maspiritu a kuvumbika tuhu, a kutumiwa mukuvumbika waze makahinga ulamwino.” (Hepre. 1:14) Maspiritu wano eswe kaalulieka mu ‘ngunja ja wanangana, wene, mawanangana ni yiyulo.’—Kolo. 1:16.

¹² Nyi twapukuna chinji ha chize chihanda cha ululikiso wa Yehova cha mu malilu chapwa, mutuhasa kunyingika chize evwile Izaia ha kumona “Mwene kanatwama ha ngunja kwilu,” mba “helu lienyi hamanyine aserafime.” Izaia yamba ngwenyi: “Lamba liami! Ngunatoko, mumu nguli mukwa mivumbo ya luchisa, natwama hakachi ka akwa mivumbo ya luchisa; mumu meso jami hamona Mwanangana, Yehova-wa-Tujita.” Kwamba pundu, muze Izaia amwene kutohwa cha ululikiso wa Yehova, kakomokene ni kulimona ngwenyi kali mukehe chinji. Yuma amwene yamukwachile chinji ku mbunge, ni kumulingisa hanga atayize mutambi wakatukile mwilu wa kumutuma alinge mulimo walipwila wa kwambujola upatwilo wa Yehova, ngwenyi: “Yami uno; ngutume yami.”—Iza. 6:1-5, 8.

¹³ Kunyingika kanawa ululikiso wa Yehova chakukwasa atu jenyi alinge ngwe chize alingile Izaia. Amu ululikiso wa Yehova unayi lume kulutwe, tunase tachi hanga twende nawo chimuwika. Tunase nawa tachi hanga tujikijile ha ululikiso wa Yehova musono.

ULULIKISO WA YEHOVA UNAYI LUME KULUTWE

¹⁴ Mu kapitulu 1 wa uprofeto wa Ezekiele, Yehova kanamusolola kali ha temba linene lia mu malilu. Temba lino linene lia uhenya linamanyinako chihanda cha ululikiso wa Yehova chize kutushi kumona ni meso jetu. Kupwa ha temba liacho chinalumbununa ngwo, iye mwene mwe unasongwela temba liacho ni kulizachisa kulita ni upale wenyi.—Samu 103:20.

¹⁵ Hita kafumbo wa temba liacho kali ni kafumbo muchima lienyi uli ni utohwe umuwika. Yino ye yakulingisa tufumbo twacho ahase kuya ku sali jeswe jiwana. (Eze. 1:17) Tufumbo twacho mahasa kwalumuka hita shimbu. Alioze, chino kuchalumbunukine ngwo temba liacho kulishi usongwelo walita. Yehova keshi kwecha ululikiso wenyi hanga uye kweswako muufupa wene kuya. Mukanda wa Ezekiele 1:20 unambe ngwo: “Kweswako spiritu yatalikishile o yaya.” Chekwamba, Yehova mwe wakusongwela ululikiso wenyi hanga uye kweswako spiritu yenyi yinazange kuya. Kashika, twatamba kulihula ngwetu: ‘Shina ngunende hamuwika ni temba liacho nyi?’

¹⁶ Kwenda hamuwika ni ululikiso wa Yehova kuchalumbunukine wika kuya kukunguluka ni kuya mu munda. Chitangu, mutu katamba kununga ni kukola ku ufulielo. Twatamba kusa ‘shindakenyo ha yuma yahiana ulemu.’ (Fwili. 1:10; 4:8, 9; Yoa. 17:3) Twiwulukenu nawa ngwetu ululikiso wakufupiwa atu kulivwashana kanawa ni kulinunga. Kashika, twatamba kumona ulemu wakuzachisa kanawa upite wetu wa ku ufulielo ni wa ku musunya uze akutwaha kuli Yehova, hanga tulinge mulimo wenyi. Amu tunende hamuwika ni temba lia Yehova lia mu malilu, mwono wetu watamba kulita ni yize twakwambujola.

¹⁷ Ululikiso wa Yehova unatukwasa hanga tununge ni kulinga upale wenyi. Twiwulukenu ngwetu Mukwa-kwendesa temba lia mu malilu kali Yehova mwene. Kashika, muze twakwenda hamuwika ni temba liacho, twakusolola ngwetu tunase Yehova vumbi ni kumufuliela ngwetu kali Liwe lietu. (Samu 18:31) Mbimbiliya yinalakenya ngwo: “Yehova mahana tachi kuli atu jenyi. Yehova mawahisa atu jenyi ni sambukila.” (Samu 29:11) Amu tuli mu ululikiso wa Yehova musono, ni yetu twakutambula tachi jacho ni kupwa ni sambukila yize akuhana kuli atu jenyi waze alilulieka kanawa. Kashika, mutununga ni kuzuka yiwape yinji ha kulinga upale wa Yehova musono ni ku miaka ya mutolo.