Ufwatulo Wakuneha upi Unji

Muze Alama ni Eva aahumine mu munda wa Endene, ayo yapwa ni ana anji. Mwano mutangu, Kene, yapwa njimi, mwano wamuchiali, Abele, yapwa kafunga mapanga.

Limwe tangwa Kene ni Abele yatwala milambu kuli Yehova. Shina unanyingika yize mulambu unalumbunuka? Uli chawana chilemu chinji. Yehova yawahilila ni mulambu wa Abele, alioze kakawahililile ni mulambu wa Kene. Chino chevwishile Kene uli unji. Kashika Yehova atowezele Kene ngwenyi, ufwatulo wenyi te muuhasa kumutwala kukulinga upi. Alioze Kene kakapanjikileko.

Hachino, Kene yalweza mwanakwo Abele ngwenyi: ‘Tuye ku munda.’ Muze apwile ku munda, Kene yakatukila mwanakwo, yamushiha. Mba yika Yehova alingile? Yehova yashinga Kene hakumuchiza mukachi ka asoko jenyi ni kumutuma kusuku. Kene te kechi kumutayiza hanga ahiluke nawa kuli asoko jenyi.

Yika twalilongesa hano? Ha mashimbu amwe mutuhasa kwivwa uli unji nyi mutumona ngwetu yize tunanyongo kulinga kuyalingiwile ngwe chize tunazange. Alioze nyi mutupwa ni ufwatulo—hanji akwetu matutoweza ha mukunda wa ufwatulo wetu—twatamba kwalumuna manyonga kawashi ni kusongwela manyonga jetu shimbu kanda tuchilinga upi.

Abele kazangile chinji Yehova nawa kalingile yuma yipema, kashika Yehova akumwiwuluka mashimbu eswe. Zambi makahindwisa Abele muze makapwisa hashi paraisu.