Yalinga Chilakenyo Kuli Yehova

Muze te hikwapalika tukweji aali chize haze ahichikile Engitu, A-Izalele yaheta ku Mulundu Sinai ni kutungako chilombo. Yehova yasanyika Mose hanga akanduke ha mulundu ni kumulweza ngwenyi: ‘Napulwile A-Izalele. Nyi mangwononokena ni kufunga shimbi jami, kumapwa atu jami.’ Mose yapalumuka ku mulundu ni kulweza A-Izalele yize Yehova amulwezele. Yika ayo ambile? Ayo yakumbulula ngwo: ‘Mutulinga yuma yeswe yize Yehova amba.’

Mose yaya nawa ha mulundu. Koko, Yehova yamulweza ngwenyi: ‘Munguhanjika ni yena ha matangwa atatu. Kashika lweza atu eswe ngwe katambile kukanduka ha Mulundu Sinai.’ Mose yapalumuka ku mulundu ni kulweza A-Izalele alilulieke hanga apanjike yize Yehova mamba.

Hakupalika cha matangwa atatu, A-Izalele yamona mihenyo ni lelwa lilaa pwi ha mulundu. Yevwa nawa kukulunguza cha mihenyo ni zungo lia chitavwi. Mba Yehova yeza ha mulundu mu kahia. A-Izalele yaputuka kuchikima hamwe ni woma. Mulundu weswe yiuputuka kulinyika chikolo nawa yiufukiwa weswe ni mwishi. Zungo lia chitavwi yiliputuka kwoka chinji. Mba Zambi yamba ngwenyi: ‘Yami Yehova. Kanda nukapwa ni tuzambi tweka kumeso jami.’

Mose yaya nawa ha mulundu, mba Yehova yamwaha shimbi jize te atu makaula hakutwala ku chize atamba Kumuwayila ni chize atamba kutwama ku mwono wo. Mose yasoneka shimbi jacho mba yajitangila A-Izalele. Ayo yamba ngwo: ‘Mutulinga yuma yeswe yize Yehova atulweza hanga tulinge.’ Chochene, ayo yalinga chilakenyo kuli Zambi. Kutala te mafunga chilakenyo chacho?