Yesu Yambujola Sango ja Wanangana

Ha mashimbu akehe muze te hamupachichisa kulu, Yesu yaputuka kwambujola ngwenyi: ‘Wanangana wa Zambi hiwakundama.’ Muze te akuya mu Ngalileya ni Yundeya, te kakuya hamwe ni tumbaji twenyi. Muze Yesu ahilukile kumahio ku Nazare, yaya mu sunangonga, yazulula chivungo cha Izaia, ni kuchitanga ni liji mwilu ngwenyi: ‘Yehova hangwaha spiritu yisandu hanga ngwambujole sango lipema.’ Yika yino te yinalumbunuka? Te yinalumbunuka ngwo chipwe ngwe atu kazangile wika kumona yikomokeso ya Yesu, nihindu chikuma chilemu chize atambwilile spiritu yisandu te chili kwambujola sango lipema. Chocho yalweza atu waze te anamupanjika ngwenyi: ‘Musono uprofeto uno hi wamanunuka.’

Kusulaho, Yesu yaya ku Kalunga-Lwiji wa Ngalileya, kuze aliwanyine ni tumbaji twenyi awana waze te akuta yishi. Iye yaasanyika ni kwaamba ngwenyi: ‘Tweyenu kuli yami hanga ngunupwise akwa-kutela atu.’ Ayo kapwile Petulu, Andeleu, Tiangu ni Yoano. Hohene yahichika mingoso yo, yaputuka kumukaula. Ayo yaya mu Ngalileya mweswe, ni kwambujola Wanangana wa Yehova. Te kakwambujola mu masunangonga, ha yitanda, ni mu matapalo. Mbunga yinene ya atu te kakwaakaula kweswako maya. Sango hakutwala kuli Yesu yijilitanda kwekweswe ndo ku Seria.

Kulutwe, Yesu yahana tumbaji twenyi ndundo hanga awuke atu ni kwaachiza andemoniu. Akwo kayile hamwe nenyi ni kwambujola mu mbonge ni mbonge nawa mu limbo ni limbo. Mbunga ya mapwo ashishika, kuchingako Maria Mandalena, Joana, Suzana ni akwo nawa, kakwashile Yesu ni tumbaji twenyi.

Muze te hafumba tumbaji twenyi, Yesu yaatuma hanga aye ni kwambujola. Muze te anambujola mu Ngalileya, atu akwo anji yapwa tumbaji ni kwaapapachisa. Amu anji kazangile kupwa tumbaji, chocho Yesu yaatesa ngwe minda yize te hi yapwa hakamwihi ni kucha. Yamba ngwenyi: ‘Lembenu kuli Yehova atume akwa-milimo hanga aye ni kucha mbuto.’ Mba kulutwe yatongola 70 hakachi ka tumbaji twenyi, yaatuma aali-aali hanga aye ni kwambujola mu Yundeya mweswe. Ayo yalongesa atu a mutapu weswe hakutwala ku Wanangana. Muze ahilukile, ayo ni usona weswe yalweza Yesu yize yalingiwileko. Kukwakapwile nichimwe chize te Ndiapu malinga hanga akwike mulimo wa kwambujola.

Yesu yasa shindakenyo hanga tumbaji twenyi anunge ni kulinga mulimo uno ulemu muze te mafuna mu malilu. Yaalweza ngwenyi: ‘Ambujolenu sango lipema hashi heswe. Longesenu atu Liji lia Zambi ni kwaapapachisa.’