Usolwelo wa Yoano

Muze postolo Yoano apwile mu kamenga ku tungu lia Patemu, Yesu yamwaha usolwelo 16, hanji yuma ya kulutwe lia matangwa. Usolwelo wacho wasolwele chize jina lia Yehova te mulipwa lisandu, chize Wanangana wenyi muwiza, ni chize te upale wenyi muulingiwa hashi ngwe mu malilu.

Mu umwe usolwelo, Yoano yamona Yehova mu ngunja yenyi ya uhenya mu malilu, kanamujingilika kuli makulwana 24 waze ali ni mazalo atoma ni yipangula ya oru ku mitwe. Maliji akukulunguza ni mihenyo yinakatuka ku ngunja. Makulwana 24 kanafulamana kulutwe lia Yehova nawa kanamuwayila. Mu usolwelo ukwo, Yoano yamona mbunga yinene ya ku mavungu, atu ni malimi eswe kanawayila Yehova. Mwana-panga, mwe Yesu, kanaasongwela ni kwaaha meya a mwono. Kulutwe, mu usolwelo ukwo, Yesu yaputuka kuyula ngwe Mwanangana mu malilu, hamwe ni makulwana 24. Usolwelo uze wasulileho, Yoano yamona Yesu kanase jita ni ndragau, mwe Satana, ni andemoniu jenyi. Yesu yaachiza mu malilu ni kwaanyasa hashi.

Mba hi Yoano yamona Mwana-panga ni waze asakula 144,000 kanamane ha Mulundu wa Zaione. Yamona nawa umwe mungelo kanahuhumuka hakamwihi ni hashi, ni kulweza atu hanga evwile Zambi woma ni kumuhalisa.

Mu usolwelo ukwo, jita ya Armagedone te hi yaputuka. Mu jita yacho, Yesu ni tujita twenyi yonona yuma yipi ya Satana. Mu usolwelo wakasula, Yoano yamona kulivwashana chingunu mu malilu ni hashi. Satana ni atu jenyi yaanongesa eswe. Eswe mu malilu ni hashi yahalisa jina lia Yehova hanga lipwe lisandu ni kuwayila wika iye.