Mukanda wa Chizavu cha Tusongo

Kuli waze akuzanga Yehova Zambi ni Liji lienyi, Mbimbiliya:

Yesu kambile ngwenyi, “Kumunukanyingika umwenemwene, mba umwenemwene kumuukanutusula.” (Yoano 8:32) Nyonga ha chize wevwile muze walilongesele umwenemwene wa mu Mbimbiliya! Chili chipema chinji kunyingika ngwo chipwe twatwama hano hashi ha too ni mahuza, nihindu mutuhasa kulilongesa umwenemwene.—2 Timoteu 3:1.

Yehova Zambi kanazange hanga tunyingike umwenemwene. Nawa tunazange kwambulwila atu umwenemwene wacho, mumu twakwaazanga. Alioze kulingila Zambi chinalumbunuka yuma yinji. Twakulikolweza hanga tukaule shimbi ja Yehova, mumu twakujisa vumbi liji. Yesu kasolwele jila yilemu yize mutuhasa kusolwelamo ngwetu, twakuzanga Zambi. Iye kambile ngwenyi: “Nyi munufunga shimbi jami, munukatwama mu zango liami; chizechene ngwe yami hingunafungu shimbi ja Tata, natwama mu zango lienyi.”—Yoano 15:10.

Yesu kakuzanga chinji Tato, nawa kakulinga yeswe yize Tato akumutuma kulinga. Nyi twembulula Yesu, Yehova matuzanga chinji nawa mutupwa ni uwahililo wamwenemwene. Yesu kambile ngwenyi, “Nyi nunanyingika yino yuma, munuwaha nyi munuyilinga.”—Yoano 13:17.

Tunafuliela ngwetu, mukanda uno muukukwasa kukaula shimbi ja mu Mbimbiliya nawa ni kupwa sepa lia Zambi. Mutununga ni kulemba hanga zango lie muli Zambi likole nawa hanga ununge “mu zango lia Zambi, . . . ndo ku mwono wa mutolo.”—Yundase 21.