LONGESO 14

Kushindakenya ha Yikuma Yilemu

A-Hepreu 8:1

CHIKUMA CHILEMU: Kwasa mbunga ahase kukaula kanawa pande je, ni kusolola kanawa chize yikuma yilemu yinakwate ha mutwe wa pande ni yize unahanjikila pande jacho.

YIZE WATAMBA KULINGA:

Nyonga ha yize unazange kuhanjika. Watamba kunyingika nyi pande je jili wika ja kulweza atu jimwe sango, nyi ja kwaaheta ku mbunge ha chimwe chikuma, nyi ja kwaakwasa hanga alinge chimwe chuma, mba uhanjike kulita ni chinyingi chacho. Yikuma yilemu yeswe muhanjika yatamba kulita ni upale wa pande je.

Lihule ngwe: ‘Yihula yika mahasa kulihula waze ali mu mbunga ha chikuma ngunahanjika? Jila ya mutapu uka mahasa kukawilamo yihula yacho?’ Hanyima, hi lulieka kanawa yikuma kulita ni jila yize mahasa kulihulilamo, hanga waze anakupanjika ahase kukukaula ni kwivwa yize unambe ni kuyitayiza.
Shindakenya ha mutwe wa pande je. Pwako ni kufunyina-funyina amwe maliji alemu a mutwe wa pande, hanji kuzachisako maliji eka waze alifwa ni waze ali mu mutwe wa pande je.
Ashiwisa yikuma yilemu hanga yilumbunuke kanawa. Sakula yikuma yilemu yize yinalite kanawa ni mutwe wa pande, yize nawa muhasa kulumbununa kanawa mu shimbu watamba kuhanjika pande je. Pwako ni yikuma yilemu yikehe wika ni kulumbununa hita chikuma kanawa, ni kulituchika hakehe muze muhwisa hita chikuma, hanga yikuma yeswe yilinunge kanawa.

Muhasa kuvuluka yikuma yilemu yeswe mu maliji je akuputukila hanga ukwase mbunga ahase kukukaula kanawa hanji kuyifunyina kusongo lia pande je hanga ukwase mbunga akapwe ni kwiwuluka yikuma yacho.