Sango Kuli Waze Ali ha Kukunguluka

TUVUMBI Tuvumbi kaliho hanga anukwase. Kashika, kaulenu yize ayo manulweza, ngwe hakutwala kuze munusa mashinyi, kunjila ni kutuhuka mu chihela cha kukungulukila, kulifunga ku ponde ni ku yuma yikwo nawa.

UPAPACHISO Yitwamo ya waze mapapachisa muyikapwa kulutwe lia palku. Waze mapapachisa, eswe katamba kutwama kulutwe muze pande ja upapachiso kanda jichiputuka lia Sambata ha chimene. Eswe katamba kuneha twalia ni mazalo waze alita.

MILAMBU Kwafwika mbongo jinji mba tupwe ni yitwamo, yisaji yalita ni milimo yikwo yize yapemesa chihela chino hanga tukunguluke kanawa ni kutukwasa kukundama kuli Yehova. Kashika, mulambu we muhasa kukwasa ululikiso wa kukunguluka chino ni mulimo uze analingi hashi heswe. Nyi muzanga kulambula, kuli mishete ya milambu ha chihela cha kukunguluka. Muhasa nawa kuhana mulambu kupalikila ha site yetu ha chikuma donate.jw.org. Mulambu weswawo muhana uli ni ulemu. Chizavu cha Tusongo mawahilila chinji ha ukwaso uze muhana hanga ukwase mulimo wa Wanangana.

UKWASO UTANGU WA UWUKISO Ni vumbi lieswe nyingikenu ngwenu, uno uli wika ukwaso wa kafuji-fuji.

YUMA YATOKA NI KUSOLOKA Chuma cheswacho mutu matongona, katamba kuchihana ku Chipatulo cha Yuma Yatoka ni Kusoloka. Nyi watokesa chuma, yako ku chipatulo chacho hanga utale nyi kwe chili. Ana waze anatoko nwatamba kwatwala ku chipatulo chacho. Alioze kanda nunyonga ngwenu, chipatulo chacho chili cha kufungila ana. Ni vumbi lieswe tunanwichi hanga nufunge kanawa ana jenu ni kutwama no hamuwika.

YITWAMO Nyongenu kama akwenu. Iwulukenu ngwenu, munuhasa kufunga wika yitwamo ya asoko ni waze nweza no hamuwika mu mashinyi, ni alongi jenu a Mbimbiliya. Ni vumbi lieswe, kanda nusa yuma ha yitwamo yize kunuchi kutwama.

MULIMO WA AKWA-KULIHANA-ENE Nyi muzanga kukwasa milimo ya kukunguluka chino, hanjika ni mandumbu a ku Chipatulo cha Mulimo wa Akwa-Kulihana-Ene.