Kufwa ni Uhindukilo wa Yesu Yika Chinalumbunuka Kuli Yetu?

Atu kakatangile hanga apwe ni kufwa

“Mba Yehova Zambi yatwala mwe mutu, yamusa mu munda wa Endene mukuulima nikuufunga. Yehova Zambi yamba kuli mwe mutu ngwenyi, Ku mitondo yeswe ya mu munda muhasa kulia cheswacho, alioze ku mutondo wa chinyingi cha chipema ni chipi, kanda uliako, mumu ha tangwa muoliako kumukafwa lume.”​—Uputukilo 2:15-17.

Zambi yasa mutu mutangu, Alama mu munda wa Endene, mu yimwe paraisu hano hashi yize yapwile ni yitangiwa ni mitondo yipema. Mwapwile mitondo yize te yakwima mihuko yize Alama mahasa kuliako. Ha chino, Yehova yakanjisa mutondo umwe ni kwamba kuli Alama ngwenyi, katambile kuliako, ni kumutoweza nawa ngwenyi nyi haliako kumafwa lume.

Shina Alama te kananyingika ukanjiso wacho? Iye te kananyingika yize kufwa chinalumbunuka, mumu te kakumona chize tushitu akufwa. Nyi Alama kamutangile hanga afwe, kachi ukanjiso wa Zambi wapwile wangwaza. Ha chino, Alama yanyingika ngwo nyi mononokena Zambi nawa kalile ku mutondo, matwama ni mwono wa miaka yeswe.

Amwe kakwamba ngwo mutondo wacho unalumbunuka kulimona mijimba, alioze hi chocho ko. Mumu Yehova kazangile ngwo Alama ni Eva ‘aseme aliokese, azalise hashi, okeseho.’ (Uputukilo 1:28) Kukanjisa chacho te cha mutondo lume. Yehova yauvuluka ngwenyi, “mutondo wa chinyingi cha chipema ni chipi” mumu te wakusolola ulite ni ulemu wa chipi ni chipema kuli atu. Nyi kakalile ku muhuko wacho, kachi Alama kakasolwele wika kwononoka, alioze zango lienyi kuli yoze wamutangile ni kumuwahisa.

Alama kafwile mumu kehukile kuli Zambi

“Kuli Alama [Zambi] yamba ngwenyi, Mumu yena . .  hiwalia ku mutondo uze nakukanjishile, . . . Mukalia ni matukuta a ku meso je ndo mukahiluka mu mavu se kuze kwene akuchijile. Mumu uli fufuta mba ku fufuta mukahilukila.”​—Uputukilo 3:17, 19.

Alama yalia mutondo uze amukanjishile. Chikuma chino cha kuhona kwononoka te chilemu chinji. Chino te kwehuka ni kuhona vumbi ha yuma yeswe yipema yize Yehova alingile hali iye. Ha kulia ku muhuko, Alama yehuka Yehova, ni kusakula jila yenyi mwene, yize yinakamunehena lamba.

Ngwe chize Yehova ambile, Alama te kumafwa. Zambi katangile Alama “kufufuta” nawa kamulwezele ngwo “mukahiluka mu mavu.” Alama kakapwile ni mwono weka. Muze afwile, iye yanonga nawa yapwa fufuta kuze amuchijile.​—Uputukilo 2:7; Chilumbununyi 9:5, 10.

Twakufwa mumu tuli ana ja Alama

“Kashika, chizechene ngwe kuli mutu umuwika shili yanjilile hano hashi, ni ku shili kufwa chanjilile; chocho kufwa chahetele kuli atu eswe, mumu te eswe hanavulumuna.”​—A-Roma 5:12.

Kwehuka cha Alama hanji shili, yinakaneha lamba linji. Ha mukunda wakulinga shili Alama yatokesa mwono wenyi, hi wika ko mwono wa 70 a miaka hanji 80, alioze katokesele mwono wa mutolo. Chikwo nawa, muze Alama ashililikile, iye yatokesa mwono wenyi, nawa ana jenyi eswe te kechi kupwa nawa angunu.

Yetu eswe tuli ana ja Alama. Ha mukunda wa iye, kashika yetu tunakahinga shili nawa twakufwa. Kashika Paulu ambile kupwa chetu, ngwenyi: “Yami nguli wa musunya, angulanjishile kushi lia chiyulo cha shili. Lwangu! Nguli mutu wa kulungajala chichize! Iya mangupulula ku mujimba uno wa kufwa?” Paulu yakumbulula chihula chenyi mwene ngwenyi: Ngunasakwila Zambi mu jina lia Yesu Kristu Mwene wetu.”​—A-Roma 7:14, 24, 25.

Yesu kahanyine mwono wenyi hanga tuhase kupwa ni mwono wa miaka yeswe

“Mwe Tata hanatumu mwe Mwana akapwe Chilamwina cha akwa hashi.”​—1 Yoano 4:14.

Yehova Zambi hanalulieka jila ya kuhwishilamo yikatalo ya shili ni kutupulwila ku kufwa cha mutulo. Kuchi achilingile? Iye katumine Mwanenyi hanga asemuke hano hashi ngwe mutu mungunu keshi shili ngwe chize apwile Alama. Alioze Yesu ‘kakavulumwine’, ngwe chize alingile Alama. (1 Petulu 2:22) Amu iye te keshi shili, kashika kakatambwile upatwilo wa kufwa, ha chino iye te mahasa kutwama ni miaka yeswe hano hashi.

Alioze, Yehova yecha Yesu hanga amushihe kuli akwa-kole jenyi. Ha kupalika cha matangwa atatu, Yehova yahindwisa Yesu ni mujimba wa spiritu hanga ahase kufuna mu malilu. Yesu mu malilu, yasolola kuli Zambi ulemu wa mwono wenyi ungunu ngwe uze Alama atokesele mwene ni wa ana jenyi. Yehova yatayiza chitapo chacho, ha kupwisa chashi mweswe yoze mafuliela muli Yesu hanga akatambule mwono wa mutolo.​—A-Roma 3:23, 24; 1 Yoano 2:2.

Ha chino, Yesu yafunyisa chuma chize Alama atokesele. Yamushiha hamukunda wa yetu tuhase kupwa ni mwono wa mutolo. Mbimbiliya yinambe ngwo: “Yesu . . . ha lamba lia kufwa, hanga kuvumbi lia Zambi akamone kufwa hali atu eswe.”​—A-Hepreu 2:9.

Ukwaso wacho unasolola zango linji lia Yehova. Ululi wenyi yipwisa chashi atu akwa-shili hanga apwe ni ulamwino. Chipwe chocho, zango lia Yehova ni keke yenyi ye yinakalinga ngwo Yehova atume Mwanenyi wa wika hanga afwete shili ya Alama.​—A-Roma 5:6-8.

Yesu kamu hindwishile ku ufwe, ni atu akwo kumakahindwisa

“Kristu hanahinduka hakachi ka afu, muhuko utangu wa kuli waze hanayi tulo. Mumu se kuli mutu kufwa chejilile, kuli mutu nawa uhindukilo nawa wa afu wejilile. Mumu chizechene ngwe muli Alama eswe kakufwa, chocho nawa muli Kristu maapwisa eswe ni mwono.”​—1 A-Korindu 15:20-22.

Tuchikuhasa kuhangulula ngwetu, Yesu katwamine hano hashi nawa kafwile, alioze ushindakenyo uka uliko ngwo Yesu kamuhindwishile mu ufwe? Ushindakenyo unene uze uliko ngwo Yesu yoze ahindwishile kasolokele kuli atu anji kuyihela yeka ni yeka, ni ha mashimbu eka ni eka. Chikwo nawa iye kasolokele ku unji wa 500 ja atu. Postolo Paulu kasonekene kuli A-Korindu ngwo, amwe a kuli atu jacho te achili ni mwono ni kusolola ngwo ayo mahasa kwambujola yize amwene ni yize evwile hakutwala ha chikuma chino.​—1 A-Korindu 15:3-8.

Muze Paulu asonekene ngwo Kristu kapwile “muhuko utangu” hakachi ka waze te mahindwisa, iye te kanalumbununa ngwo atu akwo te makaahindwisa. Yesu mwene kambile ngwenyi, ‘waze eswe ali mu mafuka makahindwisa.’​—Yoano 5:28, 29.

Nyi tunazange kutwama ni mwono wa miaka yeswe twatamba kufuliela muli Yesu

“Mumu chocho Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.”​—Yoano 3:16.

Mukanda utangu wa Mbimbiliya unatulweze chize kufwa chejile ni chize paraisu yatokele. Mukanda wa kasula unambe chize kufwa muchikahwa ni chize Zambi makapwisa hashi heswe paraisu. Atu kumakapwa ni uhashi wa kutwama ni mwono wa mutolo ni sambukila. Usolwelo 21:4 unambe ngwo: “Kufwa kuchichi kapwa nawa.” Chilakenyo chino chili chamwenemwene, mumu versu 5 yinambe ngwo: “Soneka mumu yino yuma yamwenemwene kuyishi mahuza.” Yehova kali ni uhashi wakumanununa yilakenyo yeswe.

Shina unafuliela ngwo “yino yuma yili yamwenemwene kuyishi mahuza” nyi? Lilongese chinji hakutwala kuli Yesu Kristu, ni kufuliela kuli iye. Nyi walinga chocho, muupwa ni utayizo wa Yehova. Hi wika ko kupwa ni yiwape yacho musono alioze ku mupwa ni kutalatala cha mwono wa mutolo mu paraisu hano hashi, haze kuhechikapwa nawa kufwa, “kukuchi kapwa nawa kunyenganyana, chipwe miteto” ka.