Mumu Liaka Yesu Amwene Lamba ni Kufwa?

Achinyonga, nyi chihula chacho machalumuna ngwo, “Hi walilulieka hanga ufwe? Kwamba umwenemwene atu anji makumbulula ngwo, ka. Mumu liaka.

Mumu chipwe ngwe mutumona yipikalo ni lamba, nihindu nyonga lietu lili kununga kutwama ni mwono. Mbimbiliya yinasolola ngwo Zambi katangile atu ni usona wa kutwama ni mwono wa mutolo. Kwamba pundu, Mbimbiliya yinambe ngwo “hanase ye miaka yeswe mu mbunge jo.”—Chilumbununyi 3:11.

Kwamba umwenemwene, atu keshi nawa ni mwono wa mutolo. Mba yika yapihileko? Shina Zambi kanakalinga kama chimwe chuma hanga ahwise mulonga wacho? Kumbululo lia Mbimbiliya lipema chinji, nawa linalita ni chitela cha mumu liaka Yesu afwile.

YIKA YAPIHILEKO

Tupitulu atangu atatu a mukanda wa Uputukilo kanatulweze ngwo, Zambi kalingile chitangu Alama ni Eva ni kwaaha uhashi wa kutwama ku miaka yeswe, nawa yaalweza yize te atamba kulinga hanga apwe ni mwono wacho. Unatulweze nawa chize o avulumwine kuli Zambi ni kutokesa mwono wo wa mutulo. Amu sango anajambulula mu jila yize yashi kashika atu akujimona ngwe kujishi ni ulemu unji. Alioze mukanda wa Uputukilo ni mikanda ya Evangelu, yinasolola pundu ngwo sango jamo jili jamwenemwene.a

Yika shili ya Alama yakokele? Mbimbiliya yinambe chino: “Kashika, chizechene ngwe kuli mutu umuwika shili yanjilile hano hashi, ni shili kufwa chanjilile; chocho kufwa chahetele kuli atu eswe, mumu te eswe hanavulumuna.” (A-Roma 5:12) Ha kwehuka shimbi ja Zambi Alama yashililika. Ha chino, iye yatokesa mwono wa mutolo nawa yafwa. Amu tuli ana jenyi, ni yetu twahingile shili yenyi. Kashika twakuyiza, twakushinakajiwa ni kufwa. Ulumbunwiso wa mumu liaka twakufwa unalita ni yize tunanyingika musono hakutwala ku chize ana akuhinga chano cha yisemi jo. Shina Zambi kalingile kama chimwe chuma hanga ahwise mulonga wacho?

YIKA ZAMBI ALINGILE?

Zambi kalingile chimwe chuma hanga anehe hanji alande yize Alama atokesele, mwono wa mutolo kuli ana jenyi. Kuchi achilingile?

Mbimbiliya yinambe mu mukanda wa A-Roma 6:23 ngwo: “Fweto ya shili kufwa.” Chino chinalumbunuka ngwo kufwa chakukatuka ku shili. Alama kashishililikile, kashika afwile. Kashika ni yetu twakushililika ni kufwa, mumu fweto ya shili kufwa. Yetu twakusemuka mu shili, alioze hi ha mukunda wa yetu ene ko. Ni zango lieswe, Zambi katumine Mwanenyi, Yesu, hanga apwe “fweto ya shili” hali yetu. Kuchi chino chakulingiwa?

Ngwe chizechene lunga mungunu, Alama, watunehenene shili ni kufwa ha kuvulumuna, kashika te kunafupiwa nawa umwe lunga mungunu wononoka hanga atutusule ku fweto ya shili. Mbimbiliya yinalumbununa ngwo: “Mumu chizechene ngwe ku uhulia wa mutu umuwika, anji aapwishile yivulumunyi, chocho nawa ku kwononoka cha mutu umuwika anji kumakaapwisa akwa ululi.” (A-Roma 5:19) Yesu kapwile “mutu” wacho. Iye kahichikile malilu, yapwa mutu mungunub, nawa kafwile ha mukunda wa yetu. Ha chino, chili chashi kuli yetu kupwa ni usendo upema ni Zambi ni kupwa ni uhashi wa kutalatala cha mwono wa mutolo.

MUMU LIAKA YESU AMWENELE LAMBA NI KUFWA

Mumu liaka Yesu te katamba kufwa hanga chino chilingiwe? Shina Zambi Mukwa-Ndundo-Jeswe te kechi kuhasa kuvulama yize alingile Alama ni kumwecha hanga atwame ku miaka yeswe? Ewa, te kumahasa, mumu kali ni chiyulo chakuchilinga. Alioze chino te muchipihisa shimbi yenyi yakwamba ngwo fweto lia shili kufwa. Shimbi yacho kuyishi ngwe chimwe chiyulo changwaza chize mahasa kuchalumuna hanji kuchichiza-chamuchijila. Shimbi yacho yili ya ululi hanji chiyulo chamwenemwene.—Samu 37:28.

Nyi Zambi kalengulwile ululi ha yuma yino, kachi atu te mahasa kulihula nyi te che malinga ha yuma yikwo. Chakutalilaho, shina te muchilita kutesa yoze matambula mwono wa mutolo mu chisemuko cha Alama nyi? Shina te mafuliela ha yilakenyo yenyi? Zambi ha kulikwachilila ku yitanga ya ululi hanga tupwe ni ulamwino, chili shindakenyo kuli yetu ngwetu, iye mashimbu eswe kakulinga yuma yize yalita.

Ha mukunda wa chitapo cha Yesu, Zambi yazulula jila hanga atu akatwame ni mwono wa mutolo mu Paraisu hano hashi. Mu mukanda wa Yoano 3:16, Yesu kambile ngwenyi: “Mumu chocho Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.” Kufwa cha Yesu kuchishi kusolola wika ululi wa Zambi, alioze zango liene linene hali atu.

Mba, mumu liaka Yesu amwene lamba ni kufwa ngwe chize anachisolola mu Evangelu? Yesu hakulihana mwene ku cheseko chacho chikalu ni kushishika, aye yasolola ngwenyi, Ndiapu kali mukwa-mahuza, yoze waliongele ngwenyi, atu kechi kuhasa kushishika kuli Zambi nyi mamona lamba. (Yombi 2:4, 5) Kota maliji wano kasolokele ngwe amwenemwene muze Satana apiangwile mutu mungunu, Alama. Alioze Yesu mutu mungunu ngwe Alama, yanunga ni kwononoka chipwe ha lamba lize amwene. (1 A-Korindu 15:45) Iye kasolwele ngwenyi Alama ni neye te mahasa kwononokena Zambi nyi kachi kasakwile kuchilinga. Hakupalika mu yipikalo yinji, Yesu yatuhichikila chimwe chilweza hanga tukaule. (1 Petulu 2:21) Zambi yawahisa Mwanenyi mungunu ha kumwononokena, ni kumwaha mwono wa mutolo mu malilu.

CHIZE YENA MUHASA KUYUKA

Kwamba umwenemwene, Yesu kafwile. Haliapwila atu mahasa kupwa ni mwono wa mutolo. Yena unazange kutwama ku miaka yeswe? Yesu kambile yize te twatamba kulinga ha kwamba ngwenyi: “Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena watumine.”—Yoano 17:3.

Akwa-kufwambwisa mukanda uno kanakukolweza hanga ulilongese chinji hakutwala kuli Yehova, Zambi wamwenemwene, ni Mwanenyi, Yesu Kristu. Yela ja Yehova waze atwama kuze watwama mawahilila chinji kukukwasa. Ena muhasa nawa kuwana sango jikwo ha kunjila ha site www.jw.org/cjk.