Kumbululo Lia Yihula Ya Mbimbiliya

Mumu liaka twatamba kwiwuluka kufwa cha Yesu?

Kufwa cha Yesu chili chuma chilemu chinji ku mwono wa atu​—iye kafwile hanga ahane mwono upema kuli atu. Mutu kakamulingile hanga apwe ni kulinga yuma yipi, kuyiza hanji kufwa. (Uputukilo 1: 31) Kufwa chejile hano hashi ha mukunda wa lunga mutangu, Alama. Yesu kahanyine mwono wenyi hanga atulamwine ku shili ni kuufwe.​—Tanga Mateu 20:28; A-Roma 6:23.

Zambi yasolola zango liene ha kutuma Mwanenyi hano hashi hanga afwile hali yetu. (1  Yoano 4: 9, 10) Yesu yalweza tumbaji jenyi hanga apwe ni kwewuluka kufwa chenyi ha chimwe chiwanyino haze hakupwa mbolo ni vinyu. Kulinga chino ha miaka yeswe yili jila ya yakusolola kuwahilila chetu ha zango lize Zambi ni Yesu alinalio hali yetu.​—Tanga Luka 22:19, 20.

Aya atamba kulia mbolo ni kunwa vinyu?

Muze Yesu chitangu alwezele tumbaji jenyi hanga ewuluke kufwa chenyi, iye kambile hakutwala ku umwe usendo. (Mateu 26:26-28) Uno wazulwile jila kuli ayo ni kuli chimwe chizavu chikehe cha waze makapwa mianangana ni asasendote hamwe nenyi mu malilu. Chipwe ngwe atu anji akwiwuluka kufwa cha Yesu, waze wika ali mu usendo wacho e akulia mbolo ni kunwa vinyu.​—Tanga Usolwelo 5:10.

Ha 2,000 a miaka, Yehova kakusakula waze makapwa mianangana. (Luka 12:32) Ayo kali akehe hakwatesa ni waze makatwama hano hashi ku miaka ya yeswe.​—Tanga Usolwelo 7:4, 9, 17.