Kumbululo Lia Yihula Ya Mbimbiliya

Shina mwono uwene wika nyi?

Shina hiunalihula kama ngwenyi mwono uli wika kuheha, kukalakala, kumbata, kupwa ni ana, ni kupwa kashinakaji? (Yombi 14:1, 2) Mbimbiliya yinasolola ngwo chipwe atu akwa-mana no kakulihula chochene.​—Tanga Chilumbununyi 2:11.

Shina mwono ukwete umwe ulemu nyi? Chitangu, tulihulenu, Kuchi mwono waputukile? Mba hi mutuhengula chize wongo, ni mujimba wetu weswe wapwa, atu anji hananyingika ngwo kuli Sakatanga wa mana yoze wa ulingile. (Tanga Samu 139:14.) Nyi chocho, iye katutangile ni chimwe chitela! Kulilongesa chitela chacho muchitukwasa kunyingika ulemu wa mwono wetu.

Mumu liaka atu aatangile?

Zambi yawahisa lunga ni pwo mutangu nawa yaaha mulimo ulemu. Upale wenyi te jitwame ni mwono wa miaka yeswe, ni kusema ana hanga azalise hashi, ni kupwisaho paraisu.​—Tanga Uputukilo 1:28, 31.

Upale wa Zambi yiuhona kulingiwa hano hashi muze atu ehukile ku chiyulo chenyi. Alioze Zambi kavulamine upale wenyi hali yetu. Mbimbiliya yinatwehe ushindakenyo ngwo Zambi kanakalakala hanga alamwine atu ashishika nawa ngwo upale wenyi hakutwala hano hashi muukalingiwa! Kashika Zambi kanazange hanga ena upwe ni mwono uze iye azangile ngwo atu apwe nawo ku uputukilo! (Tanga Samu 37:29.) Lilongese Mbimbiliya hanga unyingike chize muhasa kuyuka ha yize Zambi hanalakenya.