Chize Muuhasa Kuhuzulula Yinyengo Ye

Kuli yiyulo yinji hakutwala ku chikuma chino. Alioze yiyulo yikwo kuyishi kukwasa. Chakutalilaho, amwe mahasa kukulweza ngwo, kanda ulila hanji ngwo kanda unenganyana. Akwo mahasa kukushinjila hanga unenganyane chinji. Alioze Mbimbiliya yinasolola chiyulo chize chalita, nikulita ni kuhengwola chize analinge musono.

Ku mavungu amwe kakwamba ngwo, malunga katambile kulila. Shina twatamba lume kwivwa sonyi ja kulila chipwe tuli ha mbunga? Akwa-kuwuka atu waze akulemewa ku mbunge hanamono ngwo, kulila hi chipi ko. Kusolola yinyengo muchihasa kukwasa mutu hanga aye kulutwe chipwe ngwe kafwisa mutu yoze te akuzanga chinji. Kashika kusweka yize tunevu muyihasa kwokesa yinyengo. Mbimbiliya kuyishi kwamba ngwo chili chipi kulila muze twafwisa mutu yoze twakuzanga. Achinyonga ha chilweza cha Yesu. Chipwe ngwe iye kapwile ni ndundo jakuhindwisa afu, nihindu kalilile ha mbunga ha kufwa cha sepa lienyi Lazaru!—Yoano 11:33-35.

Kwivwa ufwatulo unji mashimbu amwe cha kulingiwa ha mukunda wa yinyengo, kanji-kanji ni mutu mafwa susumuku. Kuli yikuma yinji yize yakulingisa mutu yoze unanenganyana kwivwa ufwatulo, ngwe muze umwe mutu yoze twakuvumbika chinji maputuka kuhanjika yuma yize kuyalitelele. Umwe lunga wa mu Africa do Sul yoze avuluka ngwo Mike yalumbununa ngwenyi, “Yami napwile ni miaka 14 muze tata afwile. Ku mafuka, umwe ngana wa yingeleja yamba ngwenyi, Zambi kanafupu atu apema, kashika akwasanyika kawashi-washi.a Chino changwehele uli unji, mumu te tunafupiwa kupwa hamwe tata. Haliapwila hikwapalika miaka 63, nihindu nguchili ni yinyengo ku mbunge.”

Mutu nyi hafwa mulonga waya? Chipi-chipi nyi mutu mafwa susumuku, yoze uli ni yinyengo mahasa kunyonga ngwenyi, ‘Kachi nalinganga kama chimwe chuma.’ Nawa nyi wazwelele ni mutu wacho muze te kanda achifwa. Chino muchihasa kwokesa yinyengo ye.

Nyi unapinji ni manyonga amutapu au, kuchishi ni ulemu kusweka yinyengo ye ha chikuma chacho. Ha chino muchilita kuhanjika ni umwe sepa yoze makupanjika kanawa ni kukuhuzulula ku mbunge ha kukukwelaza ngwo manyonga jacho kakusoloka chinji kuli atu waze akufwisa. Mbimbiliya yinatwiwulula ngwo: “Sepa lia mutu kakuzanga matangwa eswe; alioze ha tangwa lia lamba he hakusemukina uyaya.”—Yishima 17:17.

Sepa mupema yoze mutu unanenganyana mahasa kupwa nenyi kali Sakatanga yetu, Yehova Zambi. Mu yilemba ye mwanga yeswe yize uli nayo ku mbunge kuli iye, mumu “iye kakunufunga.” (1 Petulu 5:7) Nawa iye kanatulakenya ngwo nyi twachilinga mutuhuzulula manyonga jetu ha kupwa ni “sambukila ya Zambi, yize yakuhiana kunyonga cheswe.” (A-Fwilipu 4:6, 7) Nawa tayiza ukwaso wa Zambi hanga akuhuzulule ku yinyengo ye kupalikila mu Liji lienyi lia utakamiso, Mbimbiliya. Pwako ni umwe katalilo wa yimwe yisoneko yize yakutamisa mutu ha shimbu lia yinyengo. (Tala kasha yinakaulako.) Yimwe ya ku yisoneko yacho muhasa kufungila mu mbunge. Kupwa ni manyonga jacho mahasa kukukwasa chipi-chipi ha ufuku muze uli ukawe hanji kuushi kuhasa kwiya tuli.—Izaia 57:15.

Ha mashimbu wanoene, umwe lunga wa miaka 40 anavuluka ngwo Jack, kafwishile mukwo-pwo ni yikola ya kancer. Jack yamba ngwenyi, ha mashimbu amwe kakunenganyana ukawenyi. Alioze kakuwana ukwaso mu yilemba. “Muze nakulemba kuli Yehova, nakuhuzuluka kukunenganyana chami. Mashimbu amwe ha ufuku kuchishi kuhasa kwiya tulo nyi nakasumuka. Muze nakutanga Mbimbiliya ni kupukuna ha manyonga autakamiso waze aneza ha Yisoneko ni kusolola manyonga jami aku mbunge kuli Yehova mu yilemba, hohene nakuhwima mbunge ni kupwa ni sambukila, chino chakungukwasa hanga ngupombe.”

Umwe mwana-pwo yoze avuluka ngwo Vanessa kafwishile naye ku yikola. Neye kanatayiza ulemu wa kulemba. Aye yamba ngwenyi: “Ha mashimbu akalu ku mwono wami, nakuvuluka wika jina lia Zambi ni kulila ni masoji mu meso jami. Yehova kakwivwa kulemba chami, nawa kakungwaha tachi jize nakufupa.”

Amwe akwa-kuhana yiyulo kuli waze akufwisa kakusa tachi ni mashimbu jo hanga akwase waze afwisa. Kulinga chino muchihasa kuneha chiseke ni kuhuzulula yikola ku mbunge ya mutu. (Yilinga 20:35) Akwa-Kristu anji waze hanafwisa hanamono ngwo kukalakala ni kukwasa akwo chakuhuzulula yinyengo yize akwivwa.—2 A-Korindu 1:3, 4.