3 Yakutukwasa Kukumba Yipikalo

YIKOLA YIZE KUYISHI KUYA

Rosa yamba ngwenyi: “Nasemukine ni umwe musongo uze yisemi jami ali nawo, musongo wacho wakuneha yikola yinji. Ulemu wa mwono wami yiwutepuluka.” Iye te keshi kuhasa kulihulikila ha longeso lia Mbimbiliya ni yuma yikwo ya ku spiritu, yino te yakumupikalisa chinji. Alioze maliji a Yesu kamukwashile chinji, ali ha Mateu 19:26 anambe ngwo: “Kuli Zambi yuma yeswe muyihasa kupwa” yashi. Chocho Rosa yanyingika ngwenyi, kuli mitapu yinji ya kulilongesa. Ha mukunda wa yikola yenyi ha mashimbu amwe te keshi kuhasa kutanga, kashika yaputuka kupanjika maliji akukopa a Mbimbiliya ni mikanda yikwo mu chisaji.a Yamba nawa ngwenyi, “Nyi te kwakapwile uhashi uno kachi chamwene chize te mungukolesa ufulielo wami.”

Muze Rosa te akunenganyana hamukunda wa yuma yize te keshi kuhasa kulinga, iye te kakuwana utakamiso ha maliji ali mu mukanda wa 2 A-Korindu 8:12 unambe ngwo: “Mumu nyi mbunge yiliko, muchipemena chikolo nikulita ni chize mutu mapwa nacho, hi nikulita ko ni chize keshi nacho.” Maliji wano kakukwasa Rosa kunyingika ngwenyi, Zambi kakuwahilila ni yize akulinga, mumu iye kakulinga yeswe yize mahasa kulita ni uhashi wenyi.

YIKOLA

Delfina, yoze twavuluka, yewuluka ngwenyi: “Muze mwanami wa pwo wa miaka 18 afwile, nevwile yikola yinji, te kuchanyingikine nawa nyi mungumona mwono. Yuma te kuyishi kupwa ngwe chize yapwile.” Iye kawanyine utakamiso ha maliji ali mu Samu 94:19, muze mukwa masamu ambile kuli Zambi ngwenyi: “Hakachi ka kulumbama cha manyonga jami muchima, kulembejeka che chakunguwahisa.” Delfina nawa ngwenyi, “Yingulemba kuli Yehova hanga angukwasa kuwana yimwe yakulinga yize te muyingukwase kuhuzuluka ku yikola yami.”

Iye yalihana mu mulimu wa mashimbu eswe. Ha kupalika cha mashimbu, iye yalitesa ni malapi a twanuke—chipwe malapi waze hamakwoka nihindu kakwete ulemu wa kusonejekano. Chizechene nawa, chipwe kakulivwa ngwe keshi ulemu, nihindu yanyingika ngwenyi te mahasa kukwasa akwo. Yewuluka nawa ngwenyi: “Muze te nakuzachisa shimbi ja mu Mbimbiliya hanga ngukwase alongi jami, yili jila yize Yehova te akungukolwezelamo ni kungulembejeka.” Iye kalingile katalilo wa atu a mu Mbimbiliya waze amwene lamba linji. “Kwamba pundu” eswe kapwile “atu waze te akulemba chinji.” Aye yamba nawa ngwenyi, “nyi twatangile Mbimbiliya kutushi kuhasa kuwana kumbululo lia yihula yetu.”

Kulilongesa Mbimbiliya chakwashile Delfina hanga alihulikile ha yuma yakulutwe lia matangwa, hi yakunyima ko. Kutalatala chize chili ha Yilinga 24:15 chamutakamishine, unambe ngwo: “Kumukukapwa uhindukilo wa akwa ululi ni wa yihenge.” Kuchi ananyingika ngwenyi, Yehova makahindwisa mwanenyi? Delifina yamba ngwenyi: “Ngunashimbwila kumona mwanami kulutwe lia matangwa. Ngunanyingika ngwami mungukamona nawa mwanami ha mashimbu waze Yehova hanatesa. Ngunashimbwila tangwa lize mutukapwa chimuwika mu munda nawa muguwahilila chinji ngwe chize nawahilile muze asemukine.”