Muze Mukusoloka Luyinda

“Chitangu twevwile ngwe kutushi ni kutalatala. Yuma yeswe yize twapwile nayo yiyitoka ni muhuji wa meya.”—Andre, wa ku Serra Leoa.

“Muze kakundukundu te hapalika, yitufuna ku zuwo lietu. Mu zuwo mwakasalile nichimwe chuma. Twevwile yinyengo yinji. Mwanami wa pwo yaputuka kulila.”—David, wa ku Ilhas Virgens.

NYI hiunapalika mu luyinda, kota unanyingika chize waze akupalikamo akwivwa: yikola ku mbunge, kunenganyana, kulipikala, ni kunongama. Atu anji waze akupalika mu luyinda kakwivwa ngwe mwono wo kuushi ni ulemu.

Nyi unapalika mu luyinda, kota ni yena wakwivwa ngwe muufwa. Wakunyonga ngwe mwono we kuushi nawa ni ulemu. Alioze, Mbimbiliya yinasolola ngwo, mwono we uli ulemu chinji, muhasa nawa kupwa ni kutalatala cha mwono upema wa kulutwe lia matangwa.

KUNYINGIKA UMWENEMWENE WA MU MBIMBILIYA MUCHIKUKWASA KUMONA ULEMU WA MWONO

Mukanda wa Chilumbununyi 7:8 unambe ngwo: “Songo lia chuma liapema kuhiana uputukilo walio.” Nyi hiwapalika mu luyinda, mwono we muuhasa kupwa ukalu. Alioze, muze mukalakala hakehe-hakehe mwono we muuhasa kupema cheka nawa.

Mbimbiliya hiyinambe ha mashimbu waze “kechi [kevwa] nawa liji lia kulila, hanji muteto wa lamba.” (Izaia 65:19) Maliji wano makamanunuka muze hashi muhakalumuka paraisu mu Wanangana wa Zambi. (Samu 37:11, 29) Luyinda kechi kapwa ko nawa. Yinyengo ni lamba kumuyikahwa ku miaka yeswe, mumu Zambi Mukwa-Ndundo-Jeswe kanalakenya ngwenyi: “Yuma yakushi kechi kayiwuluka nawa, chipwe kuyinyonga.”—Izaia 65:17.

Nyonga ha chino: Tangi yetu hanalulieka yuma hanga akwehe “kutalatala [cha] yuma ya kulutwe,” we mwono upema mushi lia chiyulo cha Zambi. (Jeremia 29:11) Shina kunyingika umwenemwene uno muchihasa kukukwasa hanga ulemese mwono we? Sara yoze twatongola ha mutwe uze wasala, yamba ngwenyi, “Kwiwuluka yuma yeswe yipema yize Wanangana wa Zambi muukalinga hali yetu kulutwe lia matangwa, muchihasa kukukwasa kuvulama lamba lize wamwene ni kulihulikila ku yuma ya kulutwe.”

Lilongese nawa yize Wanangana wa Zambi muukalinga hali atu. Nyi wachilinga, muupwa ni shindakenyo ngwe, chipwe ngwe unapalika mu luyinda, mwono we uli ni ulemu haliapwila, mumu uli ni kutalatala cha kulutwe lia matangwa, muze luyinda kechi kapwako nawa. Mbimbiliya yinahane yiyulo yipema yize muyihasa kukukwasa kukumba lamba lize liakwiza ha mukunda wa luyinda. Tala yilweza yimwe.

Versu ja mu Mbimbiliya Jize Mujihasa Kukukwasa

Hwima chinji.

“Kwoko limuwika lia too ni kuhwima hapwa, moko aali akuhondangana ni kuhanga ye fuji, kunyima.”—Chilumbununyi 4:6.

Akwa-kuhengwola kakwamba ngwo, “muze mutu akupalika mu luyinda, nyi kapombele kanawa . . . mbunge yenyi yakulema, nawa kakushinginyeka chinji.” Kashika, chili chilemu kuhwima chinji.

Hanjika ni umwe mutu ha yize unevu.

“Kulema mu mbunge ya mutu kuchakumuhongesa, alioze liji lipema kuliakumuwahisa.”—Yishima 12:25.

Hanjika ni umwe mutu wa mu usoko we hanji umwe sepa yoze wakujikijila. Ayo mahasa kukupanjika kanawa ha yize unevu ni kukwaha ukwaso uze unafupu.a

Nyonga ha yiwape ya kulutwe lia matangwa.

“Nikulita ni chilakenyo [cha Zambi], yetu twakutalatala malilu aha ni hashi haha, haze hakutwama ululi.”—2 Petulu 3:13.

a Mutu yoze wakupalika mu yipikalo ha mashimbu anji, mahasa kwita ukwaso kuli mandotolo.