LIKOLWEZE CHINJI MU MUNDA
Kuwahisa Uhashi Wetu wa Kwambujola Kululieka Maliji Jenu Akuhana No Kaposhi
MUMU LIAKA CHILI CHILEMU: Chipwe ngwe maliji akwambujola no waze ali mu mukanda uno wakuzachisa ha kukunguluka mahasa kunukwasa, alioze kali yilweza wika. Nwatamba kuzachisa maliji a yenwene. Munuhasa kuzachisa jila jeka chipwe yikuma yeka yize muyikwasa atu kuze nwatwama. Ha chino, nyi hinwahwisa kutanga Kaposhi ni maliji akwambujola no ni kutala yinema, munuhasa kukaula yikuma yino hanga nululieke maliji waze munwambujola no.
CHIZE TWATAMBA KULILULIEKA:
Lihulenu ngwenu, ‘Natamba kukaula maliji akwambujola no waze akusoneka kulu nyi?’
EWA
Luliekenu maliji akuputuka no kuhanjika. Nyi hinwalimeneka ni mutu, ambenu yize nunakaula. (Chakutalilaho: “Neza hanga . . . ”)
Nyongenu hachize munuhasa kuhula mutu, ni kutanga chisoneko, ni kuhana Kaposhi. (Chakutalilaho: Nyi munufupa kutanga chisoneko, munuhasa kwamba ngwenu: “Kumbululo lia chihula achi lili aha.”)
KA
Luliekenu chihula chize munukakumbulula muze munukaliwana cheka
Sonekenu yikuma muyikanwiwulula yize munukashimutwina shimbu likwo
Sakulenu chikuma chipema chize mazanga chinji atu mu chihela chenu
Luliekenu chihula chize muchikwasa atu anyonge ha chikuma munukahanjika. Kanda nululieka chihula chize muchivwisa sonyi atu. (Chakutalilaho: Yihula yize yili ha lifwo 2 mu Tuposhi.)
Sakulenu chisoneko munukatanga.
Luliekenu chize munukalumbunwina atu yiwape makawana hakutanga chikuma munukaalweka