Longesa Umwenemwene

Kuputuka ha Setembro, Mukanda wa Kuzachisa ha Kukunguluka cha Mwono Wetu ni Mulimo Wetu muupwa ni kwiza ni chikuma chaha cha maliji akwambujola no, chinambe ngwo, “Longesa Umwenemwene.” Chikuma chino chaha muchitukwasa kwambulula umwenemwene washi wa mu Mbimbiliya, ha kuzachisa chihula ni chisoneko.

Nyi twamona ngwetu mutu kanazange kulilongesa, mutuhasa kulitesa nenyi hanga tumuhichikila mukanda weswawo chipwe kumusolwela chinema cha ha jw.org. Twatamba kuhiluka kawashi hanga tushimutwine hakehe ni mutu wacho. Maliji aha akwambujola no ni malongeso ja a longi mapwa ni kukatuka ha yikuma ya tupitulu a mukanda Yika Mbimbiliya Muyihasa Kutulongesa? Mutuhasa kuwana ho yihula yikwo ni yisoneko yize muyitukwasa hakumeneka atu waze twahanjikanga no chipwe hakusongwela longeso ni kuzachisa wika Mbimbiliya.

Kuli wika jila yimuwika yakutwala ku mwono. (Mateu 7:13, 14 ) Twakuhanjika ni atu a mangeleja anji nawa a mutapu weswe, twatamba kwaasolwela umwenemwene wa mu Mbimbiliya uze muukwata ku mbunge ya mutu ni mutu. (1 Timo. 2:4) Muze mutuhanjika yikuma yinji ya mu Mbimbiliya ni kupemesa uhashi wetu wa kwambujola “kanawa mu liji lia umwenemwene” chiseke chetu muchoka, nawa mutupwa ni yiwape yinji ya kulongesa umwenemwene kuli akwetu.​—2 Timo. 2:15.