Shina Yena Wakukalakala Kanawa ni Cartão wa Kunjila Nenyi ha JW.ORG?

Luyinda munene kanakundama, kashika, twatamba kulinga mulimo wa kwambujola washi-washi. (Yishi. 24:11, 12, 20) Mba tukwase atu, mutuhasa kuzachisa cartão hanga twaasongwele ha Liji lia Zambi ni ha site yetu. Cartão wacho kali ni chilayi chinatwala ha chinema chakwamba ngwo, Mumu Liaka Chatamba Kulilongesa Mbimbiliya? ni papilo ya kwita sango jikwo hanji longeso lia Mbimbiliya. Atu amwe keshi kuzanga kutanga mikanda yetu, alioze kakuzanga kunjila ha site yetu. Kanda twecha kwaha cartão wa site yetu. Alioze kutwatambile kumuhana kuli atu waze keshi kusolola zango ha milimo yetu.

Muze muya ku milimo we, nyi wa wana mutu yoze wakuzanga kunyingika umwenemwene, muhasa kumulweza ngwe: “Ngunazange kukwaha chimwe chuma. Cartão au makusongwela ha site yize yili ni sango jinji nawa hali yinema ni yikuma yikwo.” (Yoa. 4:7) Cartão jacho kali akehe-akehe, kashika muhasa kumbata anji hanga utetele kuli atu waze muwana mu jila ni kuze unayi.