Yika Mbimbiliya Muyihasa Kutulongesa?—Chize Mutukalakala Nawo

Mukanda Yika Mbimbiliya Muyihasa Kutulongesa ni Yika Chamwenemwene Mbimbiliya Yakulongesa yalifwa. Mikanda yeswe yino yali yakulongesa nayo atu, yili ni umwenemwene umuwika nawa kululieka chawo chalifwa. Alioze, mukanda Kutulongesa uli ni maliji ashi ni ulumbunwiso ulelu kunyingika. Kawulinga hanga ukwase atu waze ni kapinda wa kunyingika kanawa malongeso a mukanda Mbimbiliya Yakulongesa. Mukanda Kutulongesa kuushi ni ma apendice, alioze uli ni maliji akusongo waze akulumbununa kanawa amwe maliji ni malongeso waze ali mu ma paragrafu. Ku uputukilo wa tupitulu kukushi kasha ya kuhitulula. Alioze uli ni chihanda cha maliji akuhitulula no umwenemwene wa mu Mbimbiliya uze analumbununa mu ma paragrafu. Chizechene twakuhana mukanda Mbimbiliya Yakulongesa ni mukanda Kutulongesa newo mutuhasa kuuhana kuli atu ha shimbu lieswalio chipwe ngwe kuushi ha katalilo wa mikanda yize tunahana ha kakweji wacho. Kuchi mba mutuhasa kuzachisa mukanda Kutulongesa ha kusongwela longeso lia Mbimbiliya?

KUHITULULA: Kanji-kanji, ha kulongesa atu, yetu twakutanga ma paragrafu mu mukanda Yika Chamwenemwene Mbimbiliya Yakulongesa ni kuhula yihula. Alioze, nyi mutu yoze unalongesa kanyingikine kanawa limi liacho hanji keshi kutanga kanawa, ha chino, muhasa kuzachisa mukanda Yika Mbimbiliya Muyihasa Kutulongesa. Chihanda chize chili kusongo lia tupitulu, chinambe ngwo kuhitulula, mutuhasa kuchizachisa hanga usongwele longeso lia Mbimbiliya ni kukolweza longi hanga akalitangile mwene ma paragrafu. Hita chihanda cha kuhitulula umwenemwene wa Mbimbiliya mutuhasa kulilongesa nacho mu unji wa minutu 15. Amu kuhitulula chacho hi cha sango jeswe ko jize jili ha maparagrafu, kashika longeshi katamba kulilulieka kanawa ni kunyingika kanawa yize longi anafupiwa. Nyi longeshi masongwela malongeso mu maparagrafu, iye mahasa kuzachisa chihanda cha kuhitulula, hanga ahitulule malongeso.

MALIJI AKUSONGO: Maliji ni yikuma yize yakusoloka ha maliji akusongo kakukatuka mu paragrafu a longeso liacho. Longeshi mwe unanyingika ni mahitulula chihanda cha maliji akusongo ali mu mukanda Yika Mbimbiliya Muyihasa Kutulongesa nyi ka muze analilongesa.