Tukwasenu Kwambujola ku Yihela Kuze Akuhanjika Malimi Anji

Atu kanji-kanji kakutayiza kanawa sango jipema ja Wanangana nyi majivwa mu limi lio. Kota kashika ha Pentekoste ya 33 M.J., Yehova akwashile “A-Yunda, akwa kulemesa Zambi, a hakachi ka mavungu eswe a hashi” hanga evwe sango jipema “mutu ni mutu mu limi lienyi mwene,” chipwe ngwe te amwe kakuhanjika limi lieka, ngwe Hepreu hanji Ngregu. (Yi 2:5, 8) Chipwe musono, yikungulwila yize yatwama mu ngiza jize akuhanjika malimi alisa, muyihasa kukalakala mu ngiza yacho. Kuchi akwa-kwambujola a mu yikungulwila yacho mahasa kukalala hamuwika, hanga ehuke kukisa mashimbu ni kuvwisa kupihia atu a mu ngiza yacho?

• 

  Kuhula (Yis 15:22): Tulayi a Mulimo katamba kulitesa hanga amone chize mahasa kwambujola sango jipema mu ngiza yacho. Nyi ngiza yenu yili yikehe, mandumbu a yikungulwila yize yakwambujola mu malimi eka mahasa kuhichika mazuwo ja atu waze akuhanjika limi lia mu ngiza yenu. Alioze, nyi ayo kechi kuhasa kwambujola ku mazuwo eswe a mu ngiza yacho ha mukunda wa kutohwa cha ngiza, ayo mahasa kwecha hanga mandumbu a yikungulwila yikwo ahanjike ni atu jacho, alioze ndo kwalweza zuwo lize lili ni mutu yoze unazange kulilongesa. (od 93 ¶37) Nawa ayo mahasa kwita ukwaso hanga chikungulwila chenu chaakwase kuwana atu waze akuhanjika limi lia mu ngiza ya chikungulwila cho ni waze munuhasa kwaha hanga apwe a mu ngiza yo. (km 7/12 5, mushete) Nyingika ngwe, ku zuwo limuwika mukuhasa kupwa atu waze akuhanjika malimi anji. Katalilo wa kwambujola mu ngiza yeswe katamba kukaula shimbi hakutwala ku kufunga sango ja enya zuwo.

• 

  Kukaula usongwelo (Efw 4:16): Kaula kanawa usongwele uze akutwaha kuli kalayi wetu wa mulimo. Shina wakusongwela longeso lia Mbimbiliya kuli mutu yoze wakuhanjika limi lieka? Longi mahasa kukola kawashi ku ufulielo nyi wamuhana kuli mandumbu a mu chikungulwila chize akuhanjika limi lienyi.

• 

  Kulilulieka (Yis 15:28; 16:1): Nyi atu a mu ngiza yenu kakuhanjika limi lieka, sako tachi wambulwile sango jipema. Muhasa kulilulieka chitangu ha kunyingika limi lize atu jacho akuhanjika, ni kuchiza Mbimbiliya ni yinema ya mu limi liacho ha site yetu hanga uyise mu telefone ye. Muhasa nawa kuzachisa JW Language hanga ulilongese chize akumeneka ku limwe limi.