Kuchi Mutuhasa Kukwasa Nyi Kwalingiwa Umwe Luyinda?

Luyinda wa chisemewa musono kanalingiwa chinji. Muze akulingiwa, chakufupiwa kusa tachi hanga tulilulieke mba tuhase kukwasa mu jila yalita. Hachino, Chizavu cha Tusongo kaluliekele ku mitango yeswe ya hashi, Chizavu cha Akwa-kukwasa Kuze Kwakusoloka Luyinda.

Muze kwakulingiwa luyinda wa chisemewa, mandumbu a mu chipatulo chacho kawashi-washi kakuhanjika ni makulwana a mu chikungulwila hanga anyingike ukwaso uze akwa-kwambujola mafupiwa. Nyi kwapihia yuma yinji yize akwa-kwambujola keshi kuhasa kulikwasa, mutango mutongola mandumbu ajama hanga asongwele mulimo wakukwasa. Mandumbu wano, mahasa kwita akwa-kulihana, yikwata hanji kulanda ni kuhana yuma kulita ni kuze mandumbu ali.

Twakuyuka chinji ha kulinga yuma mujila yino. Mumu twakwehuka kutokesa mashimbu, tachi, mbongo, yikwata ni kwehuka nawa chizungo-zungo chize chakwiza nyi mandumbu malilingila ene yuma chakuhona kukaula usongwelo.

Mandumbu waze atongwele ku mutango, kali ni ulite wa kwamba unji wa mbongo ni unji wa akwa-kulihana waze anafupiwa mu mulimo wa kukwasa. Ayo mahasa nawa kuhanjika ni manguvulu, mumu kanji-kanji manguvulu mahasa kutukwasa chipwe chashi kukwasa mandumbu jetu kawashi. Kashika mandumbu, kunwatambile kutambula mbongo, kutuma yikwata hanji kulinga wenyi ku chihela kuze kwalingiwa luyinda, shimbu kanda achinutongola hanga nuchilinge.

Chipwe chocho, tunazange kukwasa kuze kwalingiwa luyinda. (Hep 13:16) Twakuzanga chinji mandumbu jetu! Mba yika mutuhasa kulinga? Chikuma chilemu chili kulembela waze anapalika mu luyinda ni waze anakwase. Mutuhasa nawa kuhana milambu yize yakukwasa mulimo wetu uze akulinga hashi heswe. Kupalikila mu Chizavu cha Tusongo, mandumbu ku mitango mahasa kusakula kuze milambu yacho mahasa kuyizachisa kanawa. Nyi tunazange kukwasa, mutuhasa kusoneka Petição para Voluntários do Departamento Local de Projecto/Construção (DC-50).

SOLOLA CHINEMA, SANGA LIA MEYA LIZE LIALINGIWILE KU BRASIL, MBA NUKUMBULULE CHIHULA CHINO:

Yika yakukomwesa ha ukwaso uze Yela ja Yehova ahanyine muze sanga lia meya lialingiwile ku Brasil ha mwaka 2020?