Ukwaso Kuze Kwalingiwa Luyinda ha 2023—“Twakumona Zwalala Zango lia Yehova”

Mbimbiliya yaliangile kulu kwamba ngwo, mukukalingiwa luyinda, “Vungu limwe mulikasa jita ni vungu likwo,” ha mashimbu a “kumanunuka cha miaka yino.” (Mateu 24:3, 7) Pundu lume, twamwene kumanunuka cha maliji wano ha mwaka wa mulimo wa 2023.a Ku yifuchi kwasala hakehe yikumbane 100 kunalingiwa jita ni luyinda wa chisemewa, Yela ja Yehova kanembuluka zango lia Zambi. Mu mutapu uka?

Ha mwaka wa milimo wa 2023, mandumbu jetu kapalika mu luyinda wa chisemewa hanji yoze aakokela kuli atu ha yisuho 200. Mba ahane ukwaso, Yela ja Yehova kahana unji wa mbongo kuhiana 10 milhões ya dólares.b Mbongo jino jinakatuka ku milambu yize twakuhana hanga yikwase milimo yize analingi hashi heswe. Chikwo nawa, mandumbu anji kakuhana yikumba yo hanga akwase mandumbu mu mbonge yo. Tala chize akalakalisa milambu yetu hanga akwase mandumbu waze apalika mu luyinda wa chisemewa mu yifuchi yaali.

“Zango Liamwenemwene Kulili”

Tungu jimwe mu Nigéria jakunjila mu yindende ya meya ha yisuho yimwe ha mwaka. Alioze ha Outubro 2022, yitende yokele chinji mu chifuchi kuhiana ha miaka kumi kunyima. Chihela cha tununu kuhiana 676 a hectares chapihia. Chikwo nawa, atu kuhiana 2 milhões kahichika mazuwo jo. Hohene, mutango wa Nigéria yiutongola chizavu cha Komite ya Akwa-kukwasa kuze Kwalingiwa Luyinda, hanga atakamise mandumbu ku spiritu.

Chize Yino Yakwata Hali Mandumbu Jetu

• Akwa-kwambujola 7,505 kahichika mazuwo jo

• Mazuwo 860 kapuzuka

• Mazuwo ja Wanangana 90 ni chihela chimuwika cha kulingila kukunguluka cha mambonge yazala ni yitende ya meya.

Chize Milambu Yetu Akuyikalakalisa

Unji wa mbongo 250 mil dólares, japwa kukalakalisa hanga akwase kuze kwalingiwa luyinda kuchingako:

• Kulia ngwe, loso, makunde ni macarrão

• Mihela ni mushikiteru

• Kutungulula hanji kululieka mazuwo waze apihia

Kuchi mandumbu asele shindakenyo ngwo milambu yacho yapwile kukalakalisa kanawa? Jila yimwe yapwile kuhengwola kanawa hita chihela hanga amone nyi machilulieka nyi ka. Mba muze te akumona ngwo muchifupiwa kutungulula chimwe chihela, te kakukaula mutapu washi wa kutunga ngwe chize akutunga ku chihela chacho.

Mandumbu atambula ukwaso kawahilila ni kusakwilila chinji. Umwe ndumbu wa pwo yamba ngwenyi: “Yitende ya meya yakaliwishile mwono wetu. Mande jetu eswe yapihia, chikwo nawa, kutushi ni chihela haze mututwama. Alioze, tunakalivwa kanawa muze mandumbu ajile ni kutukwasa tangwa lizeliene, ni kututwala ku chihela chipema chize te mututwama. Mbetele yiyitutumina nawa kulia. Kutwakamwene chize mutuhasa kusakwilila ha kumona chize mukanda wa Yoano 13:34, 35 unamanunuka ha matangwa jetu. Zango Liamwenemwene Kulili. Yami ni usoko wami tunasakwilila mandumbu eswe waze eza ni kutukwasa ha shimbu lino tunafupu ukwaso.”

Mulimo wetu wa kukwasa kuze kwalinga luyinda wahana uchela kuli atu a mu mbonge yacho. Umwe mwata wa mu mbonge ya Sabagreia ku Bayelsa, yamba ngwenyi: “Kuli ma ululikiso ni mayingeleja anji alioze Yela ja Yehova e wika akulinga yuma ngwe yino. . . . Ululikiso [wenu] wahiana maululikiso eswe hano hashi.”

“Yetu Twakumona Zango lia Yehova”

Ha fevereiro 2023, ku Chile kwapihianga yuma yinji mumu lia kahia kaze kochanga yuma mu mbonge yacho ha yisuho kuhiana 400. Chihela cha hectares kuhiana 430,000 chapihia hamwe ni yihela yikwo ya milimo. Atu kusenya ku 8,000 kahichikanga mazuwo jo. Hanyima lia luyinda wacho, Mbetele yiyiputuka kululieka yuma ya kukwasa nayo kuze kwalingiwa luyinda.

Chize Yino Yakwata Hali Mandumbu Jetu

• Akwa-kwambujola 222 kahichika mazuwo jo

• Mazuwo 20 kapuzuka

Chize Milambu Yetu Akuyikalakalisa

Unji wa mbongo 200 mil dólares japwa kukalakalisa hanga akwase kuze kwalingiwa luyinda kuchingako:

• Kulia ni meya

• Maji a kusa mu mashinyi, yikwata ya kukomba nayo ni yitumbo

• Kutungulula ni kululieka mazuwo

Asoko amwe kakamwene chize te malinga mumu lia kutokesa yuma yeswe yize apwile nayo, kuchingako zuwo ni mulimo uze apwile ni kulinga hanga alikwase ku mwono. Chocho, o kakapwile nawa ni chize malikwasa nacho ku mwono. Ha matangwa atangu chapwile chikalu chinji uli ayo ha kumona chize ha chihela haze hapwile zuwo lio hasalile hahululu. Alioze muze aputukile kwakwasa kutungulula zuwo lio, ayo yaputuka kulivwa kanawa. Chuma chimwe chize chakwashile chinji chapwile kumona zango lize akwa-kulihana kuze kunafupiwa ukwaso apwile ni kwasolwela. Yuma yino yaakwachile chinji ku mbunge, chocho o yakwata chiyulo cha kuya ni kukwasa kutungulula zuwo lia ndumbu mukwo.

Mandumbu anji kakomoka ha ukwaso uno. Ndumbu umwe yamba ngwenyi: “Komite ya Chizavu cha Akwa-kukwasa kuze Kwalingiwa Luyinda, chili chawana chipema cha kuli Yehova. Ha tangwa liamuchiali muze te hikwalingiwa luyinda, mandumbu yaheta ni kuputuka kuhana yuma yakulikwasa nayo. Kwamba pundu, twakuwahilila chinji ha kutanga sango ja ukwaso ja ku yihela yikwo kuze kwalingiwa luyinda. Alioze nyi chalingiwa hali yena, yuma yalisa. Yena mulemesa chinji yize ululikiso wakulinga ni chize mandumbu jetu akwimbulula yitanga ya Yehova, ni kulihulumba chenyi ha kutukwasa ku musunya ni ku spiritu. Ha yuma ngwe yino, twakumona chize Yehova akusolola zango lienyi hali yetu mu yitanga.”

Amu tunayi ni kukundama ku songo lia chifuchi chino, mutumona luyinda wa chisemewa ha yisuho yinji. (Luka 21:10, 11) Alioze kupalikila mu ululikiso wa Yehova, twakumona ngwetu Mwanangana wetu Yesu Kristu kali hamwe ni yetu “matangwa eswe, ndo ku songo lia miaka yino.” (Mateu 28:20) Milambu ya zango yize wakuhana kupalikila ha site donate.jw.org ni mu majila akwo, hamwe ni tachi ni mashimbu je yakusolola ngwo, wakukwasa Wanangana wa Zambi ni Mwanangana wetu wa zango. Tunanusakwilila ha zango lienu.