Shina Unewuluka?

Shina watanga mitwe ya Tuposhi eswe a Kutalila a mwaka uno? Tala nyi muhasa kukumbulula yihula yino:

Kuchi twatamba kumona akwa-Kristu akuwayisa?

Twakwachichimieka chinji mumu lia ufulielo wo. Alioze, twakwehuka “kukomoka chinji yitanga ya atu.” (Yunda. 16) Kutushi kwahula chize chapwile mba aawayise.—w20.01, lifwo 29.

Yika yinatwehe shindakenyo ngwetu, Yehova kanatunyingika kanawa?

Mbimbiliya yinambe ngwo, Yehova kamwene mujimba wetu shimbu kanda tuchisemuka. Iye kakupanjika yilemba yetu. Kananyingika yize yili mu mbunge yetu ni yize twakunyonga. Yuma yize twakulinga muyihasa kwivwisa Yehova kuwaha hanji chinyengo. (1 Sango 28:9; Yishi. 27:11) Yehova mwe watukokele kuli iye.—w20.02, lifwo 12.

Yilweza yika yinasolola shimbu lia kuhanjika ni shimbu lia kuhola?

Twakuwahilila muze twakuhanjika hakutwala kuli Yehova. Twakuhanjika muze twakumona umwe ndumbu kanalingi chuma chipi. Makulwana a mu chikungulwila kakuhanjika hanga ahane chiyulo kuli ndumbu unafupiwa ukwaso. Kutushi kuhanjika hanga tulumbunune chize analingi mulimo wetu wakwambujola mu yifuchi yize hanaukanjisa hanji kulweza atu sango ja mu chikungulwila jize jili ja kusweka.—w20.03, mafwo 20-21.

Kuchi mapasu ali ha mukanda wa Joele kapitulu 2 analise ni waze ali ha mukanda wa Usolwelo kapitulu 9?

Joele 2:20-29 unambe ngwo, Zambi kanatwala mapasu kusuku ni kwafwetesa upi uze alinga. Mba kulutwe, Yehova mazukula spiritu yenyi. Uprofeto uno wamanunukine muze A-Babilonia apupile mbonge ya Yerusaleme. Usolwelo 9:1-11 unatese mapasu ngwe tuvumbi twa Yehova akuwayisa ni spiritu waze akwambujola ni hamu lieswe sango ja upatwilo wenyi ha matangwa wano. Sango jacho jakupinjisa akwa kole jo.—w20.04, mafwo 3-6.

Mwanangana wa ku norte musono iya?

Rússia ni yifuchi yize yakumukwasa. Ayo kakupinjisa atu ja Zambi ha kukanjisa mulimo wo wa kwambujola ni kwevwila kole. Mwanangana wa ku norte kakulimika ni mwanangana wa ku sule.—w20.05, lifwo 13.

Shina “mihuko ya spiritu” ye wika anatongola ha A-Ngalashia 5:22, 23?

Ka. Mumu spiritu yisandu yakutukwasa kupwa ni yitanga yikwo yipema ngwe, ululi. (Efwe. 5:8, 9)—w20.06, lifwo 17.

Ponde yika mutuhasa kupwa nayo nyi twapwa ni kusa-sa yuma ha internet?

Yuma yize wakusa ha Internet muyihasa kusolola ngwo wakulinangamisa kuushi kulikehesa.—w20.07, mafwo 6-7.

Yika akwa-Kristu mahasa kulilongesa ha chilweza cha akwa-kutela yishi?

Ayo kakuya kuze mahasa kuwana yishi ni ha ola yize maawana. Kakwalongesa kukalakala ni yikwata yalita. Kakukalakala ni hamu lieswe chipwe ngwe mapalika mu kapinda mweswawo. Ni yetu che twatamba kulinga mu mulimo wetu wa kwambujola.—w20.09, lifwo 5.

Kuchi mutuhasa kukwasa alongi a Mbimbiliya hanga okese zango lio hali Yehova?

Mutuhasa kwakolweza atange Mbimbiliya matangwa eswe ni kupukuna ha yize anatange ni kwalongesa kulemba.—w20.11, lifwo 4.

Liji “muli Kristu maapwisa eswe ni mwono” linatale kuli aya?—1 Kori. 15:22.

Postolo Paulu te kasolo kwamba ngwo, atu eswe makahindwisa. Alioze, kahanjikile hali akwa-Kristu akuwayisa waze “hanaasela ku usandu muli Kristu Yesu.” (1 Kori. 1:2; 15:18)—w20.12, mafwo 5-6.

Yika akwa-Kristu akuwayisa makalinga muze makahindwisa “ha kukamuna cha liso, ha chitavwi cha kusula”?—1 Kori. 15:51-53.

Ayo makakwasa Kristu kufunga mapanga ambala a Zambi ni lukanda wa utale. (Uso. 2:26, 27)—w20.12, mafwo 12-13.