Shina Unazange Kupwa ni Mwono Upema Kulutwe lia Matangwa?
Mwono uka unazange kupwa nawo kulutwe lia matangwa? Atu eswe kanazange hanga ayo ene ni asoko jo apwe ni mwono upema, awahilile, atwame kanawa ni kupwa ni sambukila.
Alioze atu anji kakuyambashana nyi chamwenemwene lume kulutwe lia matangwa makapwa ni mwono wa mutapu au. Mumu liaka? Mumu ha mashimbu amwe, hano hashi hakulingiwa yuma susumuku yize yakwalumuna miono ya atu, kuneha uswale mu chifuchi ni kushiha atu anji. Chakutalilaho, musongo wa COVID-19 unashihi atu anji. Kashika, atu anji musono kakuyambashana hakutwala ku mwono wa kulutwe lia matangwa.
Mumu lia yize yinalingiwa musono, atu anji kanafupu yize muyasongwela hanga akapwe ni mwono upema kulutwe lia matangwa. Kashika, anji akuli ayo akufupa tahi hanji akwa-tufutafuta. Atu anji kakunyonga ngwe, kulilongesa chinji ni kupwa ni upite unji ye muyanehena uwahililo ku mwono. Akwo kakunyonga ngwo, katamba kupwa wika atu apema mba awahilile ku mwono.
Shina yuma yino muyihasa kukukwasa kupwa ni mwono upema kulutwe lia matangwa? Nyi twawana makumbululo a yihula yili mushi muchitukwasa.
Yika yize muyihasa kukunehena mwono upema kulutwe lia matangwa?
Shina kulilongesa chinji ni kupwa ni mbongo muyikukwasa kupwa ni mwono upema?
Shina kupwa mutu mupema muchikukwasa kupwa ni mwono upema kulutwe lia matangwa?
Yika muyikukwasa kupwa ni mwono upema kulutwe lia matangwa?
Kaposhi wa Kutalila yono makukwasa kuwana makumbululo a yihula yino.