Shina Kupwa Mutu Mupema Muchikunehena Mwono Upema Kulutwe lia Matangwa?
Chize ku mashimbu akunyima atu kakunyonga ngwo kupwa mutu mupema, che muchanehena mwono upema kulutwe lia matangwa. Chakutalilaho, atu anji mu Asia kakutayiza maliji a umwe mukwa-kulongesa filosofia anavuluka ngwo, Confucius (551-479 K.M.J.) anambe ngwo: “Kanda ulinga kuli akwenu yuma yize kuwazangile hanga akwenu akulinge.”a
YIZE ATU ANJI AKULINGA
Atu anji machinyonga ngwo kulinga yuma yipema che muchaakwasa kupwa ni mwono upema kulutwe lia matangwa. Ayo kakusa tachi hanga avumbike atu eswe, kusolola yitanga yipema, kuhanjika umwenemwene, kufunga usoko wo ni kupwa yikilikita. Linh umwe pwo wa mu Vietname yamba ngwenyi: “Te nakufuliela ngwami nyi nahanjika umwenemwene munguzuka mwono upema.”
Atu amwe kakusa tachi hanga alinge yuma yipema mumu lia ulembelo wo. Umwe lunga wa mu Taiwan a vuluka ngwo Hsu-Yun yamba ngwenyi: “Nalilongesele ngwami, nyi mutu malinga yuma yipema, makazuka yuma yipema muze mafwa, alioze nyi malinga yuma yipi makamocha mu chitende cha kahia.”
SHINA KULINGA YUMA YACHO YAKUKWASA?
Tulieswe tunanyingika ngwetu, muze twakulinga yuma yipema kuli akwetu, chakutuyukisa chinji. Alioze atu amwe kamona ngwo, chipwe ngwe kakusa tachi hanga alinge yuma yipema, nihindu keshi kuzuka yuma yipema. Umwe pwo wa mu Hong Kong avuluka ngwo, Shiu Ping yamba ngwenyi: “Nalimwene ni meso jami ngwami, mutu yoze wakusa tachi hanga alinge yuma yipema ha mashimbu amwe keshi kuzuka yuma yipema. Yamba nawa ngwenyi, nasele tachi jinji hanga ngupwe mutu mupema ni kufunga kanawa usoko wami. Chipwe chocho ulo wami hiufwa, lunga liami yanguhichika ukawami ni ana jetu.”
Atu anji kamona ngwo, ulembelo kuuchi kwakwasa kupwa atu apema. Etsuko umwe pwo wa mu Japão yamba ngwenyi: “Nanjilile mu yimwe yingeleja ni kuputuka kululiekela akweze yimwe yuma, nevwile kupihia chinji ha kunyingika ngwami atu amwe a mu yingeleja yami kapwile yitanji, akwa-kuzo, chikwo nawa te kakusweka mbongo jize atu apwile ni kulambula.”
“Nasele tachi jinji hanga ngupwe mutu mupema ni kufunga kanawa usoko wami. Chipwe chocho ulo wami hiufwa, lunga liami yanguhichika ukawami ni ana jetu.”—SHIU PING, HONG KONG
Atu anji waze akulihana chinji mu yimwe yingeleja ni kusa tachi hanga alinge yuma yipema, kakupihilila chinji muze yuma yipi yakulingiwa ku mwono wo. Van umwe pwo yoze watwama mu Vietname che apwile ni kulivwa. Iye yamba ngwenyi: “Matangwa eswe te nakulanda mihuko, yitemo ni kulia hanga nguyilambwile tulamba twami waze hanafu, te nakunyonga ngwami nyi nalinga chino, kulutwe munguzuka yiwape. Chipwe ngwe te nakulinga yuma yino ha miaka yinji, nihindu lunga liami yayiza chinji kulutwe mwanami wa pwo yafwila mu chifuchi muze ayile ni kulilongesela.”
Ngwe chize twamona, kupwa wika mutu mupema chichi kutunehena mwono upema kulutwe lia matangwa, mba yika muyitukwasa? Mba tuwane kumbululo lia chihula chino, chitangu tunafupiwa kupwa ni usongwelo upema uze muutukwasa kukumbulula yihula yetu yeswe ni kutukwasa kupwa ni mwono upema kulutwe lia matangwa. Kulihi mutuhasa kuwana usongwelo wacho?
a Mba unyingike nawa yuma yikwo yize Confucius alongesele tala kapitulu 7, maparagrafu 31-35, a mukanda O Homem em Busca de Deus, wakufwambwisa kuli Yela ja Yehova uli nawa ha internet mu site www.jw.org.