Mutuhasa Kupwa ni Sambukila Chipwe ha Mashimbu Akalu

1. Sambukila ya Zambi yika yinalumbunuka, chikwo nawa yika muyihasa kulingiwa nyi twapwa nayo? (A-Fwilipu 4:6, 7)

KWATWAMA sambukila yimwe yize atu a hano hashi keshi kuwana. Yili “sambukila ya Zambi,” sambukila yacho yili ukulungunga uze twakwivwa ha kupwa ni usepa ukolo ni Tata yetu wa mu malilu, Yehova. Muze twakupwa ni sambukila yinakatuka kuli Zambi, twakulivwa kanawa. (Tanga A-Fwilipu 4:6, 7.) Twakupwa ni usepa upema ni mandumbu jetu, chahiana ulemu, twakupwa ni usepa upema ni “Zambi ya sambukila.” (1 Tesa. 5:23) Nyi twanyingika kanawa Yehova, kumujikijila ni kumwononokena, sambukila yenyi muyitukwasa kulihumikiza chipwe muze mutupalika mu kapinda mweswawo.

2. Kuchi tunanyingika ngwetu, mutuhasa kupwa ni sambukila ya Zambi?

² Shina mutuhasa kupwa ni sambukila ya Zambi nyi tunapinji ni misongo, luyinda wa chisemewa, mbwanja ni yihungumiona? Kupalika mu yuma ngwe yino, muchihasa kutuvwisa woma. Chipwe chocho, twatamba kwiwuluka chiyulo chize Yesu ahanyine kuli tumbaji twenyi chinambe ngwo: “Mbunge jenu kanda jilipikala, chipwe kanda jivwa mwongo.” (Yoa. 14:27) Mandumbu ni mapangi jetu anji kakukaula chiyulo chino cha Yesu. Ni ukwaso wa Yehova ayo kakupwa ni sambukila muze akupalika mu yipikalo yeswayo.

MUHASA KUPWA NI SAMBUKILA CHIPWE MUZE UNAPINJI NI MISONGO

3. Kuchi misongo yimwe muyihasa kwalumuna mwono wetu?

³ Misongo yimwe muyisa kwalumuna chinji mwono wetu. Chakutalilaho, musongo wa COVID-19 walumuna mwono wa atu anji. Sango ja akwa kuhengola jasolola ngwo, atu anji kapwanga ni milonga yinji mumu lia COVID-19 ngwe, kuhona kupomba, kulivwa ukawo, kunwa makanya asasu, kunwa walwa, kupwa ni mbwanja mu usoko hanji kufupa lume kulishiha. Nyi kuze watwama unapinji ni musongo umwe, kuchi muhasa kulihumikiza ni kupwa ni sambukila ya Zambi?

4. Kuchi kunyingika uprofeto wa Yesu hakutwala ku matangwa a kusula chakutwaha sambukila?

⁴ Yesu kambile ngwenyi, ha matangwa a kusula mukukapwa yilungo hanji misongo “kweka ni kweka.” (Luka 21:11) Kuchi kunyingika chino chakutwaha sambukila? Kutushi kukomoka muze kwakusoloka misongo mumu tunanyingika ngwetu, yuma yacho yili chilayi ya yize Yesu ambile. Mumu lia chino, twakumona ulemu wa yize Yesu ambile kuli waze te matwama ha matangwa a kusula ngwenyi: “Kanda nukasungalala.”—Mateu 24:6.

5. (a) Kulita ni A-Fwilipu 4:8, 9 ha yika twatamba kulemba muze tunapinji ni misongo? (b) Kuchi kwivwa maliji a mu Mbimbiliya a kukopa muchihasa kukwasa?

⁵ Nyi ngwe kwasoloka misongo yimwe, mutuhasa kulipikala hanji kwivwa lume woma. Yino ye yalingiwile kuli pangi Desi.b Iye kevwile woma unji wa kukwachiwa musongo wa COVID-19 ni kuusambulwisa kuli naye yoze te hashinakajiwa. Mumu lia musongo wacho, yatokesa mulimo wenyi, kashika te kakulihula chize mahasa kukwasa asoko jenyi ni kufweta zuwo lize te atwama. Yipikalo yeswe ayi yapwile ni kumukinda kupomba kanawa. Chipwe chocho, Desi kahashile kupwa cheka ni sambukila. Kuchi ahashile kuchilinga? Kalembele kuli Yehova amukwase kupwa ni nyonga lialita ni kulihumikiza. (Tanga A-Fwilipu 4:8, 9.) Iye kechele Yehova “ahanjike” nenyi kupalikila mu maliji a kukopa a Mbimbiliya. Desi kambile ngwenyi: “Maliji apema waze napwile ni kwivwa mu maliji a kukopa kapwile ni kunguhumikiza ni kungwiwulula ngwami, Yehova kakulihulumba ni yami.”—Samu 94:19.

6. Kuchi kulinga longeso lia wika ni kuya ku kukunguluka mashimbu eswe muchikukwasa?

⁶ Musongo umwe muuhasa kwalumuna mulali wetu wa kulingilamo yuma. Alioze, kutwatambile kwecha hanga upinjise longeso lietu lia wika hanji kwecha kuya ku kukunguluka. Yilweza yize twakuwana mu mikanda ni mu yinema yakusolola ngwo, mandumbu jetu kanahase kunyongonona chipwe ngwe kanapalika mu yipikalo. (1 Petu. 5:9) Chikwo nawa, kukunguluka muchihasa kukukwasa kupwa ni manyonga apema waze anakatuka mu Mbimbiliya. Ha kukunguluka mutupwa ni uhashi wa kutakamisa ni kututakamisa kuli akwetu. (Roma 1:11, 12) Ufulielo we muukola chinji nyi wapukuna ha chize Yehova akukwasa tuvumbi twenyi kukumba woma, misongo ni kunenganyana. Chikwo nawa, mwopwa ni shindakenyo ngwe, ni yena makukwasa.

7. Longeso lika twawana ha chilweza cha postolo Yoano?

⁷ Nunga ni kulihanjikisa ni mandumbu a mu chikungulwila. Misongo muyihasa kutukinda kupwa hamuwika ni mandumbu jetu. Hamukunda wa chino, mutuhasa kulivwa ngwe postolo Yoano yoze wazangile kumona meso ni meso sepa lienyi Ngayu. (3 Yoa. 13, 14) Alioze, kanyingikine ngwenyi ha mashimbu jacho chino te kuchichi kulingiwa. Kashika yalinga yize te mahasa, yamusonekena mukanda. Nyi kuwahashile kulimona ni mandumbu je a mu chikungulwila, sako tachi hanga uhanjike no kupalikila ku telefone, video chamada, kwasonekena mesangem hanji kwatumina mikanda. Muze twakuhanjika ni mandumbu jetu twakupwa ni sambukila, kutushi kulivwa ukawetu. Nyi ngwe mununga ni kulipikala fupa ukwaso wa makulwana ni kutayiza ukwaso wo.—Iza. 32:1, 2.

MUHASA KUPWA NI SAMBUKILA CHIPWE MUZE UNAPINJI NI LUYINDA WA CHISEMEWA

8. Kuchi luyinda wa chisemewa mahasa kupinjisa sambukila ye?

⁸ Kota wanengananyine chinji muze wapalikile mu yuma ngwe, minyiko, kuwema cha yuma, ni yuma yize vula akupihisa. Nyi ngwe watokesele yuma hanji wafwishile umwe, kota wevwile yikola yinji. Nyi walivwile chocho, kanda unyonga ngwe wakuzanga chinji yuma ya ku musunya hanji ngwo ufulielo we uli ukepe. Yuma yize wapalikile yapwile yikalu chinji kashika hi chipi ko kupwa ni manyonga jacho ha mashimbu amwe. (Yombi 1:11) Chipwe ngwe uli mu kapinda wacho, nyihindu muhasa kupwa ni sambukila. Mu mutapu uka?

9. Yuma yika yize Yesu ambile muyihasa kutukwasa kulilulieka hanga tukumbe umwe luyinda?

⁹ Twiwulukenu ngwetu, Yesu kambile ngwenyi, te mukulingiwa “minyiko yinene” shimbu songo kanda liheta. (Luka 21:11) Atu atwama hano hashi kakunyonga ngwe kechi keza kapalika mu luyinda. Alioze yetu tunanyingika ngwetu, hano hashi muhanunga ni kusoloka luyinda mweka ni mweka. Yesu kaprofetezele ngwenyi, “uhulia muwoka,” yino yakusoloka zwalala muze twakumona kwoka cha ungulungulu ni utoji. (Mateu 24:12) Yesu kakambile ngwenyi yuma yino te muyikwata wika hali waze keshi kuwayila Yehova. Kwamba pundu, kuli tuvumbi anji ashishika a Yehova waze anapalika mu luyinda wa chisemewa. (Iza. 57:1; 2 Kori. 11:25) Chipwe ngwe Yehova keshi kulinga yikomokeso hanga atufunge ku umwe luyinda, nihindu kakutwaha yize tunafupiwa hanga tulihumikize ni kupwa ni sambukila.

10. Mumu liaka kulilulieka haliapwila shimbu kanda kuchilingiwa umwe luyinda chakusolola ufulielo wetu muli Yehova? (Yishima 22:3)

¹⁰ Nyi twalianga kulilulieka haliapwila, muchipwa chashi kulihumikiza muze mutupalika mu umwe luyinda. Alioze chino kuchalumbunukine ngwo, kutushi kujikijila muli Yehova. Kwamba umwenemwene, nyi twalianga kulilulieka mutusolola ngwetu, twakufuliela ngwo Yehova matukwasa. Mu jila yika? Mbimbiliya yakusolola ngwo, twatamba kulianga kulilulieka shimbu kanda kuchisoloka luyinda. (Tanga Yishima 22:3.) Ululikiso wa Yehova wakututoweza mashimbu eswe kupalikila ha mikanda, kukunguluka, ni mitambi yize yakuheta ha shimbu lialita hanga yitwiwulule ngwetu, twatamba kulilulieka shimbu kanda kuchisoloka luyinda.c Shina twakufuliela lume muli Yehova? Nyi twakumufuliela, mutukaula usongwelo wenyi chipwe haliapwila shimbu kanda kuchilingiwa luyinda.

11. Yika twalilongesa ha chilweza cha Margaret?

¹¹ Tala yize yalingiwile kuli pangi avuluka ngwo, Margaret. Kahichikile zuwo lienyi kawashi-washi hamukunda wa kahia kaze te kanocho yuma ha mukala wenyi. Amu atu anji afupile kuchina ha shimbu limuwika, mu tapalo yimuzala too ni mashinyi, kashika niumwe te kasolo kuhasa kuchina. Mwishi wokele chinji, chocho Margaret yanunga mu mashinyi chakuhona kutuhuka. Alioze, kalamwinyine mwono wenyi mumu kaliangile kulilulieka. Mu ngonga ya Margaret mwapwile mapa yize te yinasolola jila yikwo ya kuchinyina. Iye kaliangile kupalikila mu jila yacho muze te analilulieka. Margaret kahashile kulamwina mwono wenyi mumu kaliangile kulilulieka kanawa.

12. Mumu liaka twakukaula usongwelo wa kulifunga?

¹² Mumu lia kuzanga kutufunga, mapulisha mahasa kutwita hanga tuhone kukatuka kuzuwo ha maola amwe, kutulweza tuye ku chihela cheka hanji kufupa jila yikwo ya kutufungilamo. Alioze, atu amwe keshi kukaula usongwelo wacho mumu keshi kuzanga kuhichika yikumba yo. Mba yika Akwa-Kristu akulinga? Mbimbiliya yakwamba ngwo: “Zeyelenu ku yiyulo yeswe ya atu, mumu ha upale wa Mwene: chipwe kuli mwanangana ngwe munene wahiana; hanji kuli manguvulu, ngwe waze akutumiwa kuli iye.” (1 Petu. 2:13, 14) Ululikiso wa Yehova newo, wakutwaha usongwelo hanga utufunge. Kakututoweza mashimbu eswe hanga tuhane manumeru jetu a telefone kuli makulwana a mu chikungulwila ni kwalweza kuze tunatwama haliapwila. Chino chakwakwasa hanga atusanyike muze mukulingiwa luyinda. Makulwana a mu chikungulwila kali ni usongwelo waha. Mutuhasa kutambula usongwelo wa kutwama kuzuwo, kuya ku chiheta chalita, kuwana kulia, ni kukwasa akwetu ha shimbu lika ni kuliko. Nyi kutwakawile usongwelo uno, mutuhasa kusa mwono wetu hanji wa makulwana mu ponde. Twiwulukenu ngwetu, mandumbu wano kali ni chiteli cha kutufunga. (Hepre. 13:17) Margaret kambile ngwenyi, “Ku nyonga liami kukaula usongwelo wa makulwana ni wa mu ululikiso wa Yehova che chalamwinyine mwono wami.”

13. Yika yakukwasa mandumbu jetu waze ahichikile mazuwo jo kupwa ni sambukila ni uwahililo?

¹³ Mandumbu anji waze ahichikile mazuwo jo hamukunda wa luyinda, jita, hanji mbwanja, kahasa kutayiza uhashi waha uze ali nawo. Chikwo nawa, kakechele kulinga yuma ya ku ufulielo. Chizechene ngwe Akwa-Kristu atangu achinyine mumu lia yihungumiona, ni mandumbu jetu no machinunga “nikwambujola lie liji lia Zambi.” (Yili. 8:4) Kwambujola chakukwasa mandumbu alihulikile ha Wanangana hi ha yize ko anapalika. Chino chakwakwasa kupwa ni sambukila ni uwahililo.

MUHASA KUPWA NI SAMBUKILA CHIPWE MUZE UNAPINJI NI YIHUNGUMIONA

14. Kuchi yihungumiona muyihasa kupihisa sambukila yetu?

¹⁴ Mumu lia yihungumiona mutuhasa kutokesa yuma yinji yize yakutwaha sambukila. Chakutalilaho, twakuwahilila chinji muze twakupwa ni utuswilo wa kukungulula hamuwika ni mandumbu jetu, kwambujola ni kulinga yize twakuzanga chakuhona kwivwa woma wa kutusa mu mazuwo a ususu. Nyi ngwe haliapwila kutushi ni utuswilo wacho, mutuhasa kulipikala hanji kwivwa woma wa yize muyihasa kulingiwa. Kupwa ni manyonga a mutapu au hi chipi ko, chipwe chocho twatamba kukanyama. Yesu kambile ngwenyi yihungumiona te muyihasa kututalingisa. (Yoa. 16:1, 2) Mba kuchi mutuhasa kupwa ni sambukila muze anatuhungumiona?

15. Mumu liaka kutwatambile kwivwa woma wa yihungumiona? (Yoa. 15:20; 16:33)

¹⁵ Mbimbiliya yakwamba ngwo: “Waze eswe mazanga kwenda ni ululi muli Kristu Yesu kumakamona yihungumiona.” (2 Timo. 3:12) Umwe ndumbu avuluka ngwo Andrei, kuli iye chapwile chikalu chinji kutayiza ngwo, Yela ja Yehova a mu chifuchi chenyi te kumahungumiona. Iye kambile ngwenyi: ‘Muno Yela ja Yehova anji alimo, manguvulu kechi kuhasa kusa eswe mu mazuwo a ususu. Kunyonga cha mutapu au chakakwashile Andrei kulihumikiza, alioze chamutwalile evwe woma unji. Mandumbu akwo katesele kujikijila muli Yehova chakuhona kunyonga ngwo, te kechi keza kaahungumiona. Ayo te keshi kulipikala chinji ngwe Andrei mumu kanyingikine ngwo, ha shimbu lieswalio te mahasa kwasa mu zuwo lia ususu. Kashika, Andrei neye yafupa kwimbulula nyonga lia mandumbu wano lia kujikijila muli Yehova. Ha kupalika cha mashimbu akehe, ndumbu Andrei yapwa cheka ni sambukila. Haliapwila kanawahilila chipwe ngwe kanapalika mu yipikalo. Yino muyihasa kulingiwa nawa kuli yetu. Tunanyingika ngwetu, Yesu kambile ngwenyi te kumatuhungumiona. Alioze kambile nawa ngwenyi, te mutuhasa kununga ni kushishika kuli Yehova.—Tanga Yoano 15:20; 16:33.

16. Usongwelo uka twatamba kukaula nyi ngwe mulimo wetu wakwambujola maukanjisa?

¹⁶ Nyi mulimo wetu wa kwambujola maukanjisa, mutununga ni kutambula usongwelo ku Mbetele ni kuli makulwana a mu chikungulwila. Usongwelo wacho matwahawo hanga utufunge, tununge ni kutambula kulia cha ku ufulielo, ni chize mutwambujola kulita ni uhashi wetu. Kashika, twatamba kusa tachi hanga tukaule usongwelo wacho chipwe ngwe kutwanyingikine kanawa mumu liaka auhana. (Tia. 3:17) Chikwo nawa, kutwatambile kumwanga sango ja mandumbu jetu hanji ja mu ululikiso kuli waze keshi ni ulite wa kujinyingika.—Chilu. 3:7.

17. Chizechene ngwe tumbaji twa Yesu, yika mutuhasa kutesa kulinga?

¹⁷ Chitela chimwe chize chakutwala Satana hanga alimike ni Yela ja Yehova chili ngwo, mu ayo ‘kakushindakenya hakutwala kuli Yesu.’ (Uso. 12:17) Kanda wecha Satana ni chifuchi chenyi chikuvwise woma. Kwambujola ni kutayisa tumbaji chakutwaha sambukila ni uwahililo chipwe ngwe, kanatuhungumiona. Mangana A-Yunda kalwezele tumbaji twa Yesu hanga alitwamine kwambujola sango lipema, chipwe chocho, malunga wano ashishika yasakula kwononokena Zambi. Ayo kawahililile chinji ha kununga ni kwambujola. (Yili. 5:27-29, 41, 42) Tunanyingika ngwetu, twatamba kukeya muze tunambujola nyi ngwe mulimo wetu haukanjisa. (Mateu 10:16) Alioze, nyi twasa tachi twambujole kulita ni uhashi wetu, mutwivwa uwahililo uze wakwiza ha kunyingika ngwetu, twononokena Yehova ni kukwasa mulimo uno wakulamwina atu.

“ZAMBI YA SAMBUKILA MAKAPWA HAMWE NI YENU”

18. Iya mahasa kutwaha sambukila ya mwenemwene?

¹⁸ Pwako ni shindakenyo ngwe, chipwe muze yuma muyikala chinji nihindu muhasa kupwa ni sambukila. Ha mashimbu jacho he twatamba kwiwuluka ngwetu tunafupiwa sambukila ya Zambi, chekwamba, sambukila yize Yehova wika mwe watamba kuyihana. Kashika muze tunapalika mu kapinda wa misongo, luyinda hanji yihungumiona tumujikijilenu. Kanda tulihandununa ni ululikiso wa Yehova, twiwulukenu kutalatala chipema chize tuli nacho. Nyi twachilinga, ‘Zambi ya sambukila makapwa hamwe ni yetu.’ (Fwili. 4:9) Ha longeso mulihatoho mutumona chize mutuhasa kukwasa mandumbu jetu waze anapalika mu yipikalo apwe ni sambukila ya Zambi.