Shina Unewuluka?

Shina watanga mitwe ya Tuposhi eswe a mwaka uno? Tala nyi muhasa kukumbulula yihula yino:

Kuchi mutuyuka nyi mutusa mashimbu hanga tuhanjike, tupanjike ni kunyonga hali Yehova?

Mutukwata yiyulo yipema, mutupwa alongeshi apema, ufulielo wetu muukola ni zango lietu muli Yehova mulioka chinji.—w22.01, mafwo. 30-31.

Kuchi kulilongesa kujikijila muli Yehova nyi muli mandumbu waze anatusongwela muchikatukwasa?

Musono, kuhiana ku mashimbu akunyima nyi twajikijila mu mutapu uze Yehova akulingilamo yuma ni kwononokena usongwelo uze twakutambula, chakuhona kuhamika ni makulwana muchikapwa chashi kukaula usongwelo ha luyinda munene. Mumu hanji mutukatambula usongwelo uze muukasoloka ngwe ukalu, hanji uze kutushi kahasa kwononokena.—w22.02, mafwo. 4-6.

Maliji waze mungelo ambile ngwenyi, A-Yunda “kumakawahilila; kumakamona muhipu wa kweseka mu kwoko lia Zorobabele” yika te analumbunuka hakutwala kuli nguvulu wa A-Yunda? (Zeka. 4:8-10)

Mungelo wacho kazangile kulweza atu ja Zambi ngwenyi, chipwe ngwe kuli amwe tembele yapwile ni kusoloka ngwe yamokomoko, nihindu te muyihwa kulita ni chize Yehova anazange.—w22.03, mafwo. 16-17.

Kuchi mutuhasa kupwa chilweza chipema ha kuhanjika? (1 Timo. 4:12)

Mutuchilinga ha kuhanjika ni umbovu ni vumbi muze tunambujola, kwimba miaso ni mbunge yeswe, kuhana makumbululo ha kukunguluka, kuhanjika umwenemwene, kuhanjika yuma yize muyitakamisa akwenu, ni kwehuka kuhanjika yuma yipi hali akwenu.—w22.04, mafwo. 6-9.

Mumu liaka mutuhasa kwamba ngwetu, tushitu awana waze anatongola ha Daniele kapitulu 7, (manguvulu) kanalite ni kashitu umuwika wa mitwe shimbiali uli ha Usolwelo 13:1, 2?

Ngongo wa ha Usolwelo 13 kasokutala hali wanangana umuwika ngwe Roma. Alioze, kanalumbunuka manguvulu eswe waze hanayulu hano hashi kukatuka kunyima ndo ni musono.—w22.05, lifwo. 9.

Kuchi mutuhasa kusolola ngwetu, twakufuliela ha ululi wa Yehova?

Mutuhasa kuchilinga ha kwehuka ufwatulo ni toto chipwe muze umwe matulinga chuma chipi chinji. Mutuhasa kuhichika yuma mu moko ja Yehova ni kufuliela ngwetu, iye mahwisa upi weswe uze wakwiza ku shili yetu hanji ya akwetu.—w22.06, mafwo. 10-11.

Nyi umwe ndumbu kanalembe, yika atamba kwiwuluka?

Katamba kwiwuluka ulemu wa kukunguluka chacho. Muze analembe, katambile kuhana yiyulo kuli mandumbu mu chikungulwila hanji kutwa mitambi. Kashika ndumbu yoze malemba katambile ‘kuhanjika chinji,’ chipi-chipi nyi chili kulemba chitangu. (Mateu 6:7)—w22.07, mafwo. 24-25.

Mu mutapu uka “waze hanalingi yipi” makahindwisa ku “upatwilo”? (Yoa. 5:29)

Ku mashimbu akunyima, te twakwamba ngwetu maliji wano a Yesu kanatale ha yuma yize waze makahindwisa makalinga muze haahindwisa. Alioze maliji jenyi kanatale ha yuma yize hiyinalingiwa hi ha yize ko kanda yichilingiwa. Yino yinalite mumu mu chifuchi chaha, kechi kecha niumwe hanga alinge yuma yipi.—w22.09, lifwo. 18.

Mutwe wa pande uka ndumbu J. F. Rutherford alingile ha kukunguluka cha mambonge ha setembro 1922?

Ha kukunguluka cha mambonge mu Cedar Point Ohio, E.U.A., Iye kambile ngwenyi: “Talenu, Mwanangana kanayulu! Yenu nuli akwa-kwambujola Wanangana wenyi. Kashika, ambujolenu, ambujolenu, ambujolenu, mwe Mwanangana ni Wanangana wenyi!”—w22.10, mafwo. 3-5.

Ha Izaia kapitulu 30 yuma yika yitatu yize Yehova akuzachisa hanga akwase tuvumbi twenyi kunyongonona mu yipikalo ni uwahililo?

Ha kapitulu yono, Izaia kazachishile yilweza yinji hanga asolole chize Yehova akufunga atu jenyi. Iye kakuchilinga (1) ha kupanjika yilemba yetu, (2) ha kutwaha usongwelo, ni (3) ha kutuwahisa musono ni kulutwe lia matangwa.—w22.11, lifwo. 9.

Mumu liaka mutuhasa kwamba ngwetu, chilakenyo chili ha Samu 37:10, 11, 29 chamanunukine ku mashimbu a kunyima muze asonekene maliji wano, nawa muchikamanunuka kulutwe lia matangwa?

Maliji asonekene Ndawichi kanasolola uwahililo uze wapwile mu Izalele muze te akwayula kuli Solomone, Yesu kambile ngwenyi, maliji ha versu 11 te kanatale nawa ha umanunuko wa kulutwe lia matangwa. (Mateu 5:5; Luka 23:43)—w22.12, mafwo. 8-10, 14.