2 | “Utakamiso wa Yisoneko”

MBIMBILIA YINAMBE NGWO: “Mumu yuma yeswayo yasonewene kunyima, yasonewene mukutufumba yetu, hanga ku uhumikizo ni kulembejeka cha Yisoneko Yisandu tukasele mbunge jetu ha chilakenyo cha Zambi.”—A-ROMA 15:4.

Yika Chino Chinalumbunuka

Mbimbiliya yili ni maliji waze mahasa kutwaha tachi ni hamu lize tunafupiwa hanga tukumbe manyonga api. Sango ja mu Mbimbiliya jakutwaha kutalatala ngwo kulutwe lia matangwa kutuchi kapwa nawa ni yikola ya mu manyonga.

Chize Yino Muyihasa Kukwasa

Yetu eswe twakunenganyana ha mashimbu amwe, alioze waze anayiji yikola ya mu manyonga kakupinda ni manyonga api matangwa eswe. Kuchi Mbimbiliya muyihasa kutukwasa?

Mbimbiliya yakutukwasa kupwa ni manyonga apema ni kwecha kupwa ni manyonga api. (A-Fwilipu 4:8) Mbimbiliya muyihasa nawa kutakamisa ni kutukwasa hanga tupwe ni manyonga alita.—Samu 94:18, 19.
Mbimbiliya muyihasa kutukwasa kwehuka kunyonga ngwe tushi ni ulemu.—Luka 12:6, 7.
Yisoneko yinji ya mu Mbimbiliya yakutwaha shindakenyo ngwo, tushi ukawetu, Zambi Sakatanga wetu, kananyingika chize twakulivwa.—Samu 34:18; 1 Yoano 3:19, 20.
Mbimbiliya yakutulakenya ngwo Zambi makahwisa yikola ya mu manyona. (Izaia 65:17; Usolwelo 21:4) Muze tunanenganyana mumu lia manyonga api, chilakenyo chino muchihasa kutwaha tachi hanga tuchine kuhonga.

Chize Mbimbiliya Yakukwasa Jessica

Chize Manyonga api Akungupinjisa

“Muze napwile ni miaka 25, kanguwanyine ni musongo wa mu manyonga. Yinguputuka kwiwuluka yuma yipi yize napalikile kunyima. Mandotolo kangukwashile kunyingika ngwo yikola yami ya mu manyonga, yineza mumu lia kunyonga chinji ha yuma yipi yize yalingiwile ku mwono wami. Chipwe ngwe te ngunanu yitumbo, alioze te ngunafupiwa nawa kuhanjika ni mandotolo akwo hanga nguhase kupwa ni shindakenyo ni kululieka manyonga api.”

Chize Mbimbiliya Yakungukwasa

“Ha mashimbu waze manyonga api te akungupinjisa chinji, te nakupwa ni mahesu-hesu, kusakalala ni kuhona kupomba. Kanji-kanji, ha ufuku, napwile ni kunyonga yuma yinji yipi. Ngwe chize Samu 94:19 yakwamba, Zambi mahasa kutulembejeka ni kutukwasa hanga tulihumikize muze tunalipikala. Kashika, nasele Mbimbliya ni mukanda haze nasonekene versu jimwe jize jakungutakamisa ni kujisa hakamwihi ni kuze nakupomba. Muze te chishi kuhasa kupomba, te nakutanga versu ja mu Mbimbiliya, ni kwecha hanga manyonga ja Zambi angutakamise.

“Mbimbiliya yakutukolweza hanga twehuke manyonga waze akulimika ni yize tunanyingika hakutwala kuli Zambi. Ku mashimbu a kunyima, napwile ni kunyonga ngwe chishi ni ulemu, niumwe wakunguzanga wakuhi, kuchichi kuhasa kulinga nichimwe. Alioze, nalilongesele ngwami, manyonga wano kakulimika ni Mbimbiliya, yize yinasolola ngwo Zambi kali Tata ya zango, nawa mukwa-keke yoze wakulihulumba hali hita umwe wa kuli yetu. Hakehe-hakehe yinguputuka kusongwela manyonga jami, shimbu ngweche manyonga angusongwele. Nalilongesele kulimona ngwe chize Zambi akungumona. Chino che chikuma chilemu chize changukwashile kwehuka kulinyongena yami mwene yuma yipi.

“Nguli ni shindakenyo ngwami, kulutwe lia matangwa niumwe kechi kayiza nawa yikola ya mu manyonga. Chino chakungwaha tachi ja kukumba yipikalo yami ni kutalatala cha kulutwe lia matangwa muze kukuchi kapwa nawa yikola.”