3 | Chize Yilweza ya mu Mbimbiliya Muyihasa Kukukwasa

MBIMBILIYA YAKUHANJIKA HALI . . . Malunga ni mapwo ashishika waze alifwa ni “yetu mu mbunge.”—TIANGU 5:17.

Yika Chino Chinalumbunuka

Mu Mbimbiliya muli sango jize jakuhanjika hakutwala ku mwono wa malunga ni mapwo waze apinjile ni manyonga api. Muze twakutanga hakutwala ku yize apalikile ku mwono, mutuhasa kuwana chilweza cha umwe yoze te wakwiva ngwe chize yetu twakwiva.

Chize Yino Muyihasa Kukukwasa

Yetu eswe twakuzanga hanga atu atupanjike. Chipi-chipi muze twakupinda ni manyonga api. Muze twakutanga yilweza ya mu Mbimbiliya, mutuhasa kuwana chimwe chilweza chize chinalifu ni yize twakunyonga hanji chize twakulivwa. Ha kulinga chino, mutupwa ni shindakenyo ngwetu kutushi ukawetu nawa muchipwa chashi kukumba yipikalo ni musongo wa mu manyonga.

Mbimbiliya yakusolola ha yisuho yinji maliji a waze alivwile ngwe keshi kuhasa kuwana ukwaso ha kapinda yoze alinenyi. Shina ni yena ha mashimbu amwe wakulivwa ngwe kuuchi kuhasa kununga? Yino ye yalingiwile kuli Mose, Elisha ni Ndawichi.—Kwalula 11:14; 1 Mianangana 19:4; Samu 55:4.
Mbimbiliya yakutulweza hakutwala kuli Hana yoze ‘walifichile’ mumu lia kuhona kusema ana, ni kumwihia ni kumuvundula kuli mukwo-muhali.—1 Samuele 1:6, 10.
Mbimbiliya yakutulweza hakutwala kuli Yombi yoze walivwile chize mutuhasa kulivwa mashimbu amwe. Chipwe ngwe iye kapwile ni ufulielo ukolo, nihindu Yombi kapalikile mukapinda yoze wamutwalile kupinda mu manyonga, iye kambile ngwenyi: “Mwono wami hiwangupihila; chazangile kutwama ni mwono.”—Yombi 7:16.

Kulilongesa ha chize atu a mu Mbimbiliya ahashile kukumba kapinda wa mu manyonga, mutuhasa kuwana tachi hanga tuhase kukumba yinyengo yetu.

Chize Mbimbiliya Muyikukwasa Kevin

Chize Musongo Wa Mu Manyonga Wakungupinjisa

“Kangupimine musongo wa mu manyonga muze te kunasala hakehe hanga ngukumbanyise miaka 50. Ha mashimbu amwe te nakulivwa ngwe munguhasa kukumba kapinda weswe ku mwono wami. Alioze ha mashimbu akwo nakulivwa ngwe chatelele kutwama ni mwono.”

Chize Mbimbiliya yakungukwasa

“Chilweza chimwe cha mu Mbimbiliya chize chakungukwasa chili cha postolu Petulu. Iye kahengesele chinji chocho kaputukile kulivwa ngwe keshi ulemu. Shimbu alihulikile ha uhenge wenyi, Petulu kafupile kupwa ni masepa jenyi waze te akumuzanga. Muze nakupinda ni musongo wa mu manyonga, uhenge wami wakungulamikiza ni kungutwala hanga ngulivwe ngwe chishi ni ulemu. Ngwe Petulu, nalilongesa ngwami, natamba kupalikisa mashimbu ni masepa jami waze akuzanga kungukwasa hanga kukumba manyonga api.

“Chilweza chikwo cha mu Mbimbiliya chize chakungutakamisa chili cha mwanangana Ndawichi. Ha mashimbu amwe iye kapwile ni kuhonga ku mbunge mumu lia yuma yize yalingiwile ku mwono wenyi, chikwo nawa kalivwile chipi mumu lia uhenge uze alingile kunyima. Chilweza chenyi chakungukwasa mumu ha mashimbu amwe nakulinga ni kwamba yuma yize kulutwe yakunguvwisa yikola ku mbunge. Maliji a Ndawichi waze ali ha Masamu 51 kakungutakamisa. Mu versu 3 Ndawichi kambile ngwenyi: ‘Mumu ngunatayiza milonga yami; shili yami yili kumeso jami matangwa eswe.’ Maliji wano kanasolola pundu chize nakulivwa ha mashimbu amwe akalu, chakukaliwa kupwa ni nyonga lialita hali yami mwene. Alioze nakuwana utakamiso ha maliji a Ndawichi waze ali ha versu 10 anambe ngwo: ‘Zambi, tenga muli yami mbunge yipema. Lulika spiritu ya kululama muli yami.’ Mu yilemba yami nakutongola maliji wano hanga ngupwe ni nyonga lialita hali yami mwene. Kusulaho maliji ali ha versu 17 kakungutakamisa chinji. Yinambe ngwo: ‘Yitapo ya Zambi, ngwami spiritu yize yinamakuka. Yena Zambi kushi kulelesa mbunge yize ya kulimakuna nikulikehesa.’ Versu yino yakungukwasa kulihumikiza ni kumona ngwami Zambi kakunguzanga chinji.

“Ha kulihulikila ha yilweza ya mu Mbimbiliya ni yuma yize Zambi akungwaha, chakungukwasa kukolesa kutalatala chami cha kulutwe lia matangwa. Yilakenyo ya mu Mbimbiliya yili ya umwenemwene kuli yami chikwo nawa chakungukwasa kununga ni kusa tachi.”