Shina Yehova Makumbulula Yilemba Yami?

1-2. Mumu liaka ha mashimbu amwe twakunyonga ngwetu, Yehova keshi kukumbulula yilemba yetu?

“WAHILILA nawa muli Yehova, iye kumakapwa cheswe unazange mu mbunge ye.” (Samu 37:4) Chilakenyo chino chipema chinji! Alioze, shina twatamba kushimbwila ngwetu Yehova atwehe yuma yeswe yize twakumwita? Mumu liaka twatamba kulihula chocho? Tuchinyongenu ha yikuma yino. Umwe pangi twamishi, malemba kuli Yehova hanga amukwase kuya ku Shikola ya Akwa-Kwambujola Wanangana. Alioze, mukupalika miaka yinji chakuhona kumusanyika. Umwe ndumbu mukweze, malemba kuli Yehova amukwase kuhinduka ku musongo uze ali nawo hanga ahase kukalakala chinji mu chikungulwila. Chipwe chocho, musongo wenyi kuuchi kuhwa. Amwe yisemi Yela ja Yehova, malemba hanga mwano anunge mu umwenemwene. Alioze hakupalika cha mashimbu, mwana mwene mecha kuwayila Yehova.

² Hanji hiunalembe kuli Yehova ni kumwita chimwe chuma, alioze chuma chacho kakuhelecho. Hachino, munyonga ngwe Yehova kakukumbulula wika yilemba ya akwenu; ya yena keshi kuyikumbulula. Hanji muputuka kunyonga ngwe walingile chuma chipi. Pangi avuluka ngwo Janiceb che alivwile. Iye ni mukwo-lunga te kakulemba kuli Yehova hanga aakwase kuya ni kukalakala ku Mbetele. Yamba ngwenyi: “Napwile ni shindakenyo ngwami, mutuya ni kukalakala ku Mbetele.” Alioze mashimbu yapalika, tukweji yapwa miaka, nihindu kanda achaasanyika ku Mbetele. Janice yamba nawa ngwenyi: “Ngunakanenganyana chinji ni kulipikala. Te nakulihula nyi nalingile yimwe yize yevwishile Yehova yikola. Mumu liaka kakakumbulwile yilemba yami se nalembele kuli iye ha chikuma chacho?”

3. Yika mutulilongesa ha mutwe uno?

³ Ha mashimbu amwe, mutuhasa kulihula nyi chamwenemwene Yehova kakupanjika yilemba yetu. Chipwe atu amwe ashishika ku shakulu, no che alihulile. (Yombi 30:20; Samu 22:2; Haba. 1:2) Yika muyihasa kukwaha shindakenyo ngwe Yehova makumbulula yilemba ye? (Samu 65:2) Mba tukumbulule chihula chino, chitangu tuwanenu makumbululo a yihula yino: (1) Yika mutuhasa kushimbwila hali Yehova? (2) Yika Yehova akushimbwila hali yetu? (3) Mumu liaka twatamba kwalumuna yimwe mu yilemba yetu?

YIKA MUTUHASA KUSHIMBWILA HALI YEHOVA?

4. Kulita ni Jeremia 29:12, yika Yehova anatulakenya?

⁴ Yehova kanalakenya ngwenyi, mapanjika yilemba yetu. (Tanga Jeremia 29:12.) Zambi yetu kakuzanga tuvumbi twenyi ashishika, kashika keshi kuhasa kulengulula yilemba yo. (Samu 10:17; 37:28) Alioze, chino kuchalumbunukine ngwo, iye matwaha yuma yeswe yize twakumwita. Yuma yimwe makatwahayo wika mu chifuchi chaha.

5. Yika Yehova akunyonga muze akwivwa yilemba yetu? Lumbununa.

⁵ Yehova kakunyonga ha chize yize twakwita yakulita ni upale wenyi. (Iza. 55:8, 9) Chihanda chimwe cha upale wacho chili, kuzalisa hashi ni atu waze akuwahilila ni kwononokena chiyulo chenyi. Alioze Satana kambile ngwenyi, atu mawahilila wika nyi maliyula ene. (Uputu. 3:1-5) Mba asolole ngwo yize Ndiapu ambile yili ya mahuza, Yehova kakwecha hanga atu aliyule ene. Chipwe chocho, kuyula cha atu che chinanehe lamba lize tunamono musono. (Chilu. 8:9) Tunanyingika ngwetu, Yehova keshi kuhwisa lamba lieswe lize tunamono musono. Mumu liaka twamba chocho? Mumu nyi machilinga, amwe mahasa kunyonga ngwo kuyula cha atu che chahwisa lamba liacho.

6. Mumu liaka mutuhasa kupwa ni shindakenyo ngwetu, Yehova makumbulula yilemba yetu mu jila yalita nawa ni zango?

⁶ Yehova mahasa kukumbulula yilemba yalifwa mu mutapu walisa. Tutalenu chilweza: muze Mwanangana Hezekia ayijile chinji, yaliumba kuli Yehova hanga amuuke, mba Yehova yamuuka. (2 Mia. 20:1-6) Alioze, muze Paulu aliumbile kuli Yehova hanga amuchize “lumbambo yoze apwile nenyi mu musunya,” yoze kota wapwile umwe musongo, Yehova kakachilingile. (2 Kori. 12:7-9) Talenu nawa yize yalingiwile kuli Tiangu ni Petulu. Ayo eswe kaapatwilile kufwa kuli Mwanangana Heronde. Chikungulwila yichilembela Petulu hanji ni Tiangu nawa. Chipwe chocho, Tiangu yamushiha, Petulu yamulamwina kupalikila mu chikomokeso. (Yili. 12:1-11) Hanji mutuhasa kulihula ngwetu: ‘Mumu liaka Yehova alamwinyine Petulu chakuhona kulamwina Tiangu?’ Mbimbiliya kuyishi kuhanjika nichimwe ha chikuma chino.c Alioze, mutuhasa kupwa ni shindakenyo ngwetu, majila a Yehova “eswe a ululi.” (Shimbi 32:4) Chikwo nawa, tunanyingika ngwetu, Yehova te kakuzanga chinji Petulu ni Tiangu. (Uso. 21:14) Kashika ha mashimbu amwe, Yehova mahasa kukumbulula yilemba yetu mu mutapu uze te kutushi ni kushimbwila. Yetu kutushi kukakajana mu mutapu uze iye akukumbulwilamo yilemba yetu, mumu tunanyingika ngwetu kakulinga yuma ni zango ni ululi.—Yombi 33:13.

7. Yika kutwatambile kulinga, nawa mumu liaka?

⁷ Yetu kutwatambile kutesa yuma yize tunapalika ni ya akwetu. Tutalenu chilweza: hanji mutwita kuli Yehova hanga atukwase ha chimwe chuma, alioze yilemba yetu kechi kuyikumbulula. Hanyima mutwivwa ngwo, ndumbu umwe neye keta yuma yoyene, mba muchisoloka ngwe Yehova kakumbulula yilemba yenyi. Pangi Anna kapalikile mu yuma ya mutapu au. Iye kalembele kuli Yehova hanga auke mukwo-lunga Matthew ku musongo wa câncer. Ha mashimbu jacho, mapangi akwo aali tushinakaji no te kanapinji ni musongo wa câncer. Anna yalembela mukwo-lunga ni mapangi jacho aali. Mapangi jacho yahinduka, alioze mukwo-lunga yafwa. Ku uputukilo, Anna yaputuka kulihula nyi Yehova mwe wakwashile lume mapangi jacho kuhinduka. Nyi Yehova mwe waakwashile, mba mumu liaka kakakwashile kama mukwo-lunga? Ewa, kutuchi kuhasa kwamba ngwetu, mumu liaka mapangi jacho ahindukile ku musongo wo. Alioze tunanyingika ngwetu, Yehova kali ni jila yize makahwishilamo liakulu lamba lietu lieswe, chikwo nawa, iye kanazange chinji kuhindwisa masepa jenyi waze hanafu.—Yombi 14:15.

8. (a) Kulita ni Izaia 43:2, kuchi Yehova akutukwasa? (b) Kuchi yilemba yakutukwasa muze tunapalika mu yipikalo? (Tala chinema, Yilemba Yakutukwasa Kukumba Yipikalo.)

⁸ Yehova nihindu manunga sali lietu. Amu apwa Tata yetu wa zango, iye keshi kuzanga hanga tumone lamba. (Iza. 63:9) Alioze, keshi kukwika yuma yipi hanga yihone kulingiwa kuli yetu, yize mutuhasa kutesa ni ngiji ni milengi ya kahia. (Tanga Izaia 43:2.) Chipwe chocho, iye kanatulakenya ngwenyi, nihindu matukwasa muze mutupalika mu yipikalo. Chikwo nawa, kechi kwecha hanga yipikalo yitunehene lamba lize ‘kulichi keza kahwa.’ Kuchizako yino, Yehova kakutwaha spiritu yisandu hanga yitukwase kunyongonona mu yuma yize mutupalika. (Luka 11:13; Fwili. 4:13) Kashika, mutuhasa kupwa ni shindakenyo ngwetu, nihindu mutupwa ni yeswe yize mutufupiwa hanga tunyongonone ha kulingila Yehova ni ushishiko.d

YIKA YEHOVA AKUSHIMBWILA HALI YETU?

9. Kulita ni Tiangu 1:6, 7, mumu liaka twatamba kufuliela ngwetu, Yehova matukwasa?

⁹ Yehova kanashimbwila hanga tujikijile muli iye. (Hepre. 11:6) Ha mashimbu amwe, yipikalo yetu muyihasa kusoloka ngwe yinji chinji kutuchi kuhasa kuyikumba. Hachino, mutuputuka kukakajana chipwe ha ukwaso wa Yehova. Alioze Mbimbiliya yakwamba ngwo, ndundo ja Zambi mujihasa kutukwasa “kutangunuka yipanga.” (Samu 18:29) Kashika, shimbu tuyambashane ha ukwaso wa Yehova, twatamba kulemba kuli iye ni ufulielo ni kushimbwila ngwetu, mapanjika yilemba yetu.—Tanga Tiangu 1:6, 7.

10. Hana chilweza chinasolola chize mutuhasa kulinga yuma kulita ni yize tunete mu yilemba.

¹⁰ Yehova kanashimbwila tulinge yuma kulita ni yize twakwita mu yilemba. Tutalenu chilweza, umwe ndumbu malemba kuli Yehova hanga amwehe tangwa ku mulimo wenyi aye ku kukunguluka cha mambonge. Kuchi Yehova mahasa kukumbulula yilemba ya mutapu au? Yehova mahasa kuhana hamu kuli ndumbu hanga ahanjike ni mwata wa milimo yenyi. Alioze ndumbu neye katamba kulinga chihanda chenyi ha kuya ndo kuli mwata wa milimo yenyi hanga ete tangwa lize anazange kuya ku kukunguluka. Chino hanji machilinga ha yisuho yinji. Hanji mahasa kwita kuli mukwa-mulimo-ni-mukwo akalakale mu chihela chenyi mba ahase kuya ku kukunguluka. Chikwo nawa, nyi muchilita, mahasa kwita amutete mbongo ja tangwa lize maya ku kukunguluka.

11. Mumu liaka twatamba kulemba chinji ha yuma yize tunafupiwa?

¹¹ Yehova kanashimbwila hanga tununge ni kwita yuma yize tunafupiwa. (1 Tesa. 5:17) Yesu katukwashile kumona ngwo, yuma yimwe yize twakwita kechi kutwahayo ha shimbu lizeliene. (Luka 11:9) Kashika, kanda ulitwamina kulemba! Lemba kuli Yehova mashimbu eswe. (Luka 18:1-7) Muze twakununga ni kulemba ha chimwe chuma, twakusolola kuli Yehova ngwetu chuma chacho chili ni ulemu kuli yetu, tushi kuchita chamwichila. Chikwo nawa, chakusolola ngwo, tunafuliela ngwetu iye kali ni uhashi wa kutukwasa.

MUMU LIAKA TWATAMBA KWALUMUNA YIMWE MU YILEMBA YETU?

12. (a) Yika twatamba kulihula hakutwala ku yilemba yetu; mumu liaka? (b) Kuchi mutuhasa kusoloka ngwetu, twakuvumbika Yehova kupalikila mu yilemba yetu? (Tala mushete, “Shina Yilemba Yami Yakusolola Vumbi Hali Yehova?”)

¹² Nyi muchisoloka ngwe yilemba yetu Yehova keshi kuyikumbulula, muchilita kulihula yihula yitatu. Chitangu, ‘Shina ngunete lume yuma yize ngunafupu?’ Ha mashimbu amwe, twakunyonga ngwetu, tunanyingika yuma yize yinatupemena. Alioze kuma yize tunechi kuyichi kutuyukisa ha mashimbu anji. Nyi mutulemba kuli Yehova hanga atukwase kuhwisa umwe kapinda, mukuhasa kupwa mutapu walita wakumuhwishilamo kuhiana uze yena unete. Chikwo nawa, yuma yimwe yize twakwita kuli Yehova hanji kuyalitele chinji ni upale wenyi. (1 Yoa. 5:14) Achinyongenu ha chilweza cha yisemi waze twatongola ha paragrafu yitangu. Ayo ketele kuli Yehova hanga akwase mwano anunge mu umwenemwene. Nyi mututala ha yize etele, mutumona ngwetu upi kuushiho. Alioze, Yehova keshi kushinjila atu hanga amuwayile. Iye kanazange hanga yetu eswe, kuchingako ana jetu, tulisakwile yetwene ha kumuwayila. (Shimbi 10:12, 13; 30:19, 20) Kashika shimbu ete kuli Yehova hanga akwase mwano anunge mu umwenemwene, ayo mahasa kumwita aakwase kukwata mwano ku mbunge muze anamulongesa hanga chino chimutwale kuzanga Yehova ni kupwa sepa lienyi.—Yishi. 22:6; Efwe. 6:4.

13. Kulita ni A-Hepreu 4:16, ha shimbu lika Yehova matukwasa? Lumbununa.

¹³ Chihula chamuchiali chili chino, ‘Shina wano kali mashimbu alita waze Yehova atamba kungwaha chuma chize ngunamwite?’ Hanji muzanga Yehova akukumbulule lume ha shimbu lizeliene. Alioze kwamba umwenemwene, Yehova kananyingika shimbu lialita lize makukwasa. (Tanga A-Hepreu 4:16.) Nyi yilemba yetu kayikumbulwile kawashi, mutuhasa kunyonga ngwetu, Yehova kazangile ‘kuyikumbulula.’ Alioze, kulumbululo lienyi mulihasa kupwa ‘liakushimbwilako ndambu.’ Chakutalilaho, tunyongenu nawa hali mukweze yoze wapwile ni kulemba hanga Yehova amuuke musongo uze ali nawo. Nyi Yehova mamuuka kupalikila mu chikomokeso, Satana mahasa kwamba ngwenyi, ndumbu wacho kananungu ni kuwayila Yehova mumu kamuuka. (Yombi 1:9-11; 2:4) Alioze, yetu tunanyingika ngwetu, Yehova kanatulakenya kuhwisa misongo yeswe kulutwe lia matangwa. (Iza. 33:24; Uso. 21:3, 4) Muze kanda tuchiheta ha mashimbu jacho, kanda tushimbwila uukiso wa chikomokeso. Kashika, ndumbu wacho te mahasa kwita kuli Yehova amwehe tachi ni sambukila ya ku mbunge hanga anunge ni kunyongonona ha musongo uze ali nawo ni kununga kulingila Yehova ni ushishiko.—Samu 29:11.

14. Yika walilongesa ha chilweza cha ndumbu Janice?

¹⁴ Shina unewuluka Janice yoze wapwile ni kulemba hanga aye ni kukalakala ku Mbetele? Kwapalikile miaka yitano mba yanyingika chize Yehova akumbulwile yilemba yenyi. Mwene yamba ngwenyi: “Ha miaka yino yeswe, Yehova kangulongesa ni kungukwasa hanga ngupwe Mukwa-Kristu mupema. Ami nafupiwile kufuliela chinji muli iye ni kululieka longeso liami lia wika. Nanyingikine ngwami, uwahililo wami kuwatalile ha chihela chize mungupwa hanga ngulingile Yehova.” Chocho ha kupalika cha mashimbu, Janice ni mukwo-lunga yaasanyika hanga akalakale mu mulimo wa kalayi wa mbonge. Muze atalile kunyima, Janice yamba ngwenyi: “Yehova kakumbulwile yilemba yami, alioze mu mutapu uze te chishi ni kushimbwila. Kwapalikile amwe mashimbu, mba yingunyingika ngwami, kumbululo lia Yehova ha yilemba yami liapwile chimwe chawana chipema. Kashika, ngunasakwilila chinji Yehova ha chize akungusolwela zango ni umbovu.”

15. Mumu liaka ha mashimbu amwe muze tunalembe kutwatambile kusulila wika ha yize tunafupu? (Tala nawa yizulie.)

¹⁵ Chihula chamuchitatu chili ngwo, ‘Shina munguhasa kwita chuma cheka mu yilemba?’ Muze tunalembe, chinalite kwita wika yize tunafupu. Alioze ha mashimbu amwe, kutwatambile kusulila wika ha yize tunafupu. Kulinga chino, muchitukwasa kumona yize Yehova anazange hali yetu. Tutalenu chilweza cha pangi twamishi yoze wapwile ni kulemba hanga aye ku Shikola ya Akwa-Kwambujola Wanangana. Iye kazangile chinji kuya ku shikola hanga hanyima aye ni kwambujola kuze kunafupiwa ukwaso. Muze te ananungu ni kulemba hanga amusanyike ku shikola, iye kachi kalembele kuli Yehova hanga amukwase kumona uhashi ukwo uze mokeselamo mulimo wenyi wa kwambujola. (Yili. 16:9, 10) Hachino, te malinga yuma kulita ni yilemba yenyi, ha kuhula kuli kalayi wa mbonge nyi kuli yikungulwila yize yinafupiwa ukwaso wa mapionelu. Hanji kusonekena Mbetele ni kuhula nyi kuli yihela yize yinafupiwa ukwaso wa akwa-kwambujola.e

16. Shindakenyo yika twatamba kupwa nayo?

¹⁶ Ngwe chize twamona, mutuhasa kupwa ni shindakenyo ngwetu, Yehova makumbulula yilemba yetu mu jila yalita nawa ni zango. (Samu 4:3; Iza. 30:18) Ha mashimbu amwe, hanji Yehova kechi kukumbulula yilemba yetu kulita ni yize tunashimbwila. Chipwe chocho, iye kechi kulengulula yilemba yetu. Yehova kakutuzanga chinji, nawa kechi kutwehuka nilimwe tangwa. (Samu 9:10) Kashika, nunga ni ‘kujikijila muli iye mashimbu eswe,’ ha kulemba ni mbunge yeswe.—Samu 62:8.