Yihula ya Waze Akutanga Mikanda Yetu
“Angelo akusakula” waze anatongola ha 1 Timoteu 5:21 aya?
Postolo Paulu kasonekenene mukulwana-ni-mukwo Timoteu ngwenyi: “Ngunakwehe shimbi kumeso ja Zambi, ni Kristu Yesu ni angelo akusakula ngwami, ononokena maliji wano chakuhona kunyongena atu yuma yipi chipwe kusolola katonde.”—1 Timo. 5:21.
Chitangu, mba tuhase kunyingika angelo jacho, mutushimutwina hali angelo waze katambile kupwa mu chizavu cha angelo. Pundu lume, angelo jacho keshi kulinga chihanda cha 144,000. Muze Paulu asonekenene Timoteu, uhindukilo wa Akwa-Kristu akuwayisa te kanda uchiputuka. Apostolo ni Akwa-Kristu akuwayisa te kanda achipwa yitangiwa ya spiritu, kashika “angelo akusakula” te hi ayo ko.—1 Kori. 15:50-54; 1 Tesa. 4:13-17; 1 Yoa. 3:2.
Chikwo nawa, “angelo akusakula” katalile hali angelo waze ahonene kwononoka ha mashimbu a sanga lia meya. Angelo wano kakawile mwata wo Satana ni kupwa andemoniu waze Yesu alimikine no. (Uputu. 6:2; Luka 8:30, 31; 2 Petu. 2:4) Kulutwe lia matangwa, Yesu makaasa mu jondo muze makatwama miaka 1,000 . Hanyima, makaanongesa hamwe ni Satana.—Yunda. 6; Uso. 20:1-3, 10.
Hachino, “angelo akusakula” waze Paulu atongwele kota kali angelo ashishika mu malilu waze akukalakala hamwe ni “Zambi ni Yesu Kristu.”
Kuli tununu a tununu twa angelo ashishika. (Hepre. 12:22, 23) Chinasoloka ngwo, Yehova keshi kuhana chiteli chimuwika kuli angelo eswe. (Uso. 14:17, 18) Ngwe chilweza, ha chisuho chimwe, Yehova katumine mungelo umuwika hanga anongese maswalale a Asuria 185,000. (2 Mia. 19:35) Angelo akwo kota katambwile chiteli cha ‘kukunga mu Wanangana [wa Yesu] yuma yeswe yakutalingisa ni waze keshi kwononokena shimbi.’ (Mateu 13:39-41) Akwo hanji kapwile ni chiteli cha ‘kukungulula waze iye hanatongola’ hanga akaye mu malilu. (Mateu 24:31) Eka nawa kaehele chiteli cha ‘kutufunga mu majila jetu eswe.’—Samu 91:11; Mateu 18:10; 4:11; Luka 22:43.
“Angelo akusakula” waze anatongolola ha 1 Timoteu 5:21, kota kapwile angelo waze ahanyine chiteli hanga atukwase kufunga yikungulwila. Ha versu jikwo ja mukanda uno, Paulu kahanyine yiyulo hakutwala ku chize te makulwana mafunga chikungulwila, nawa ngwo mandumbu mu chikungulwila katamba kuvumbika makulwana. Makulwana nawa katamba kulinga kanawa mulimo wo chakuhona kufupa kusoloka ni kuhona kukwata yiyulo kapupushi. Chikuma chimwe cha mumu liaka makulwana atamba kukaula chiyulo chino cha Paulu chili ngwo, ‘Zambi, Yesu Kristu ni angelo akusakula kakwamona.’ Hachino, chinasoloka zwalala ngwo, angelo amwe kakwasakula hanga afunge yikungulwila. Ayo kakulinga yuma yikwo ngwe kufunga tuvumbi twa Zambi, kusongwela mulimo wa kwambujola ni kulumbununa kuli Zambi yuma yize akumona.—Mateu 18:10; Uso. 14:6