Kwata Yiyulo Yize Muyivwisa Yehova Kuwaha

1. Chuma chika chikalu chize yetu eswe twatamba kulinga?

HITA tangwa twakufupa kukwata yiyulo. Yimwe yalifwa nawa yashi kukwata, ngwe kusakula yize mutulia chimene hanji mashimbu waze mutuya ni kupomba. Alioze yikwo, yikalu kukwata, mumu muyihasa kukwata ha mwono wetu, uwahililo wetu, hali waze twazanga hanji ha uwayilo wetu kuli Yehova. Tunazange hanga yiyulo yetu yituyukise ni kuyukisa asoko jetu. Alioze chahiana ulemu, yivwise Yehova kuwaha.—Roma 12:1, 2.

2. Yuma yika muyikukwasa kukwata yiyulo ya mana?

² Nyi unazange kukwata yiyulo ya mana, (1) nyingika kanawa sango jeswe, (2) nyingika nyonga lia Yehova ha chikuma chacho, ni (3) nyonga kanawa shimbu kanda uchikwata chiyulo. Ha mutwe uno, mutuhengwolaho yikuma yino yitatu, ni kumona chize mutuhasa kufumba uhashi wetu wa kunyonga.—Yishi. 2:11.

NYINGIKA KANAWA SANGO JESWE

3. Hana chilweza cha mumu liaka watamba kunyonga ha sango jeswe shimbu kanda uchikwata chiyulo.

³ Chikuma chitangu chize muchikukwasa kukwata yiyulo ya mana, chili kunyingika kanawa sango jeswe. Mumu liaka chili chilemu? Tuchinyongenu hali mweji yoze maya ni kufupa ukwaso wa ndotolo mumu lia musongo uze ali nawo. Shina ndotolo makwata chiyulo hakutwala ku uukiso uze mahana kuli mweji chakuhona kumuhula chize anevu hanji kunyingika musongo uze ali nawo? Ka, kechi kulinga chocho. Ni yena nawa muhasa kukwata yiyulo yipema, nyi wanyingika kanawa sango jeswe. Kuchi muhasa kuchilinga?

4. Kulita ni Yishima 18:13, kuchi muhasa kupwa ni shindakenyo ngwo unanyingika sango jeswe? (Tala nawa chizulie.)

⁴ Kanji-kanji, mba unyingike sango jeswe, muchilita kuhula. Achinyonga ngwe, makusanyika hanga uye ha chimwe chiwanyino. Shina watamba lume kuyako? Nyi kuwanyingikine mutu yoze wakusanyika hanji yize iye alulieka ha chiwanyino chacho, muchilita kuhula ngwe: “Kulihi chiwanyino chacho muchipwila; nawa ha ola yika? Iya makasongwela chiwanyino chacho? Aya makapwaho? Yuma yika mutukalinga ha chiwanyino chacho? Shina muhakapwa walwa?” Kuwana makumbululo a yihula yino, muchikukwasa kukwata chiyulo cha mana.—Tanga Yishima 18:13.

5. Yika watamba kulinga hanyima lia kunyingika yuma yeswe?

⁵ Hanyima lia kuhengwola sango jeswe, nyonga kanawa hakutwala ku chikuma chacho. Shina ha chiwanyino chacho muhakapwa atu waze keshi kwononokena Yehova; makanwaho walwa unji chakuhona umwe yoze maasongwela? Ha chiwanyino chacho kuhechi kapwa mbwanja? (1 Petu. 4:3) Chikwo nawa, yika mulinga nyi chiwanyino chacho muchikalingiwa ha mashimbu waze wakuya ku kukunguluka hanji mu munda? Muze munyingika kanawa yuma yeswe, chino muchikukwasa kukwata chiyulo cha mana. Alioze, kuli nawa chuma chikwo chize watamba kulinga. Chipwe ngwe yena hiwanyingika sango jeswe hakutwala ku chikuma chino; mba yika Yehova akunyonga ha chikuma chacho?—Yishi. 2:6.

NYINGIKA NYONGA LIA YEHOVA HA CHIKUMA CHACHO

6. Kulita ni Tiangu 1:5, mumu liaka twatamba kulemba kuli Yehova ni kwita ukwaso?

⁶ Eta kuli Yehova hanga akukwase kunyingika kunyonga chenyi. Iye kanalakenya kutwaha mana hanga tupwe ni malinjekela akukwata yiyulo yalita. Yehova kakuhana mana jacho ni “mbunge yeswe, keshi kukumika.”—Tanga Tiangu 1:5.

7. Kuchi muhasa kunyingika yize Yehova akunyonga ha chimwe chikuma? Hana chilweza.

⁷ Hanyima lia kulemba ni kwita usongwelo wa Yehova, lihulikile ha kumbululo lienyi. Ngwe chilweza, nyi unalingi wenyi mba mutoka, muhasa kwita ukwaso kuli atu waze atwama ku chihela chacho. Shina muoya kwe chakuhona kwivwa kumbululo lio? Ka. Mupanjika kanawa usongwelo uze o makwaha. Che chimuwika nawa, hanyima lia kwita mana kuli Yehova, eseka kuwana kumbululo lienyi ha kufupa kunyingika shimbi jenyi mu Mbimbiliya jize jinatale ha chikuma chacho. Ngwe chilweza, nyi muzanga kuya ha chimwe chiwanyino, muhasa kuhengwola yize Mbimbiliya yakwamba hakutwala ku yiwanyino yize kuyalitele, masepa api ni chize muhasa kusa Wanangana wa Zambi ha chihela chitangu ku mwono we kuhiana yize wakuzanga.—Mateu 6:33; Roma 13:13; 1 Kori. 15:33.

8. Yika muhasa kulinga nyi mufupa ukwaso hanga uwane jimwe sango? (Tala nawa chizulie.)

⁸ Chipwe chocho, ha yisuho yimwe, muhasa kufupa ukwaso hanga uwane sango jize unafupu. Muhasa kutambula sango jikwo kupalikila muli mandumbu a malunga ni a mapwo waze ajama. Alioze muyuka chinji, nyi yena mwene muhengwola. Tuli ni sango jinji mu yikwata yetu ya kulilongesa nayo ngwe, Chikwata Chakuhengwola ni Yisoneko Yize Yakusongwela Mwono wa Akwa-Kristu. Iwuluka ngwe chikuma chilemu chili, kukwata yiyulo yize muyivwisa Yehova kuwaha.

9. Kuchi mutuhasa kupwa ni shindakenyo ngwetu, chiyulo chetu muchivwisa Yehova kuwaha? (A-Efwesu 5:17)

⁹ Kuchi mutuhasa kupwa ni shindakenyo ngwetu, yiyulo yetu yakuvwisa Yehova kuwaha? Chitangu, twatamba kumunyingika kanawa. Mbimbiliya yakwamba ngwo: “Kunyingika mwe Musandu chapwa malinjekela.” (Yishi. 9:10) Ewa, malinjekela amwenemwene kakwiza ha kunyingika yitanga ya Yehova, upale wenyi, yize akuzanga ni yize keshi kuzanga. Lihule ngwe: ‘Kulita ni yize ngunanyingika hali Yehova, chiyulo chika munguhasa kukwata chize muchimuvwisa kuwaha?’—Tanga A-Efwesu 5:17.

10. Mumu liaka shimbi ja mu Mbimbiliya jili jilemu chinji kuhiana chako cha mu usoko wetu hanji cha kuze twakolelele?

¹⁰ Ha mashimbu amwe, mba tuvwise Yehova kuwaha, twatamba kukwata yiyulo yize kuyishi kuvwisa atu akwo kuwaha. Ngwe chilweza, yisemi amwe mahasa kushinjila mwano wa pwo hanga amumbate kuli lunga yoze uli ni mbongo jinji hanji yoze uli ni uhashi wakwaha yihako yinji chipwe ngwe keshi kanawa ku ufulielo. Umwenemwene uli ngwo, yisemi kanazange hanga mwano apwe ni yize anafupu ku musunya. Alioze mwana mwene katamba kulihula ngwenyi, shina lunga yono mangukwasa kukola ku ufulielo? Kuchi Yehova akumona chikuma chacho? Kumbululo lili ha Mateu 6:33. Hano, Yesu kakolwezele Akwa-Kristu ngwenyi: “Liangenu kufupa Wanangana wa Zambi.” Chipwe ngwe twakuzanga kulemesa yisemi jetu ni kuvumbika atu waze twatunga no, nihindu chuma chilemu chili kuvwisa Yehova kuwaha.

NYONGA KANAWA SHIMBU KANDA UCHIKWATA CHIYULO

11. Kulita ni A-Fwilipu 1:9, 10 chitanga chika muchikukwasa kukwata yiyulo ya mana?

¹¹ Hanyima lia kuhengwola shimbi ja mu Mbimbiliya jize jinatale ha chiyulo chize unambe kukwata, nyonga kanawa ha yize musakula kulinga. (Tanga A-Fwilipu 1:9, 10; tala nota ya estudo “chinyingi cha umwenemwene ni mana.”) Malinjekela makukwasa kunyonga ha yize muyihasa kulingiwa ha hita chiyulo mukwata. Ha mashimbu amwe, muchihasa kupwa chashi kukwata chiyulo, alioze, hi yiyulo yeswe ko muyipwa yashi. Malinjekela makukwasa kukwata yiyulo ya mana, chipwe muze yuma muyikaliwa.

12-13. Kuchi malinjekela mahasa kukukwasa kukwata chiyulo cha mana hakutwala ku mulimo?

¹² Tunyongenu ha chikuma chino. Yena unafupu mulimo hanga ufunge asoko je, mba muwana milimo yaali. Munyonga ha yuma yeswe ngwe, mutapu wa mulimo wacho, maola waze mupwa ni kukalakala, mashimbu waze mupwa ni kulinga mba uheteko ni yikuma yikwo. Chikwo nawa, kulita ni shimbi ja mu Mbimbiliya, milimo yacho yili yipema. Yena hanji musakula mulimo uze wazanga mumu makufwetako mbongo jinji. Alioze, kuli yikuma yikwo yize watamba kuhengwola shimbu kanda uchikwata chiyulo.

¹³ Ngwe chilweza, shina milimo yino yaali muyilimika ni maola a kukunguluka? Shina hakachi ka milimo yino yaali, umwe muukukwika kukwasa usoko we alivwe mu ufunge upema, awahilile ni kukundama kuli Yehova? Kuhengwola yihula yino, muchikukwasa kusa “yuma yahiana ulemu” ha chihela chitangu ku mwono we ngwe, kuwayila Yehova ni yize asoko je anafupu kuhiana kulihulikila chinji ha kuzuka mbongo. Nyi wachilinga, mukwata chiyulo chize muchivwisa Yehova kuwaha.

14. Kuchi malinjekela ni zango muyitukwasa kwehuka kulinga yuma yize muyitalingisa akwetu?

¹⁴ Malinjekela mahasa kutukwasa kunyonga ha chize yiyulo yetu muyikwata hali akwetu ni kwehuka kulinga yuma yize ‘muyaatalingisa.’ (Fwili. 1:10) Chino chili chilemu, chipi-chipi muze mutukwata chiyulo hakutwala ku chize mutuzala ni kulilulieka. Ngwe chilweza, mutuhasa kusakula mutapu umwe wa mazalo hanji chize mutusoloka. Alioze, mba nyi akwetu muchima hanji haze lia chikungulwila matalinga? Malinjekela matukwasa kuvumbika manyonga ja akwetu. Zango mulitukwasa ‘kufupa kufumbuka cha akwetu’ ni kupwa atu ahomboka. (1 Kori. 10:23, 24, 32; 1 Timo. 2:9, 10) Yitanga yino, muyitukwasa kukwata chiyulo chize muchisolola zango ni vumbi lietu hali akwetu.

15. Yika watamba kunyonga shimbu kanda uchikwata chiyulo chilemu?

¹⁵ Nyi unazange kukwata chimwe chiyulo chilemu, nyonga ha yize mulinga hanga utwame kulita ni chiyulo chacho. Yesu kalongesele ngwenyi, nyi tunambe kulinga yimwe, twatamba ‘kutwama hanga twalule ndando.’ (Luka 14:28) Pukuna ha unji wa mashimbu, yikumba ni tachi jize muosa hanga umanunune chiyulo chacho. Muhasa kuhanjika ni usoko we hakutwala ku yize mutu ni mutu atamba kulinga hanga akwase chiyulo chacho. Mumu liaka chili chipema kulinga chocho? Mumu chino muchikukwasa kunyingika haze muhasa kululieka hanji kukwata chiyulo chikwo chalita. Nyi mwita ukwaso kuli usoko we ni kwivwa manyonga jo, ayo makalakala hamwe ni yena hanga akukwase ukwate chiyulo chalita.—Yishi. 15:22.

KWATA CHIYULO CHIZE MUCHIKUYUKISA

16. Yikuma yika muyikukwasa kukwata yiyulo yalita? (Tala mushete, “Chize Muhasa Kukwata Yiyulo ya Mana.”)

¹⁶ Nyi wakaula yikuma yeswe twatongola helu, acho muhasa kukwata yiyulo ya mana. Hiwahengwola kulu sango jeswe ni shimbi ja mu Mbimbiliya jize mujikukwasa kukwata chiyulo chize muchivwisa Yehova kuwaha. Haliapwila eta kuli Yehova hanga akukwase kukwata chiyulo chize muchikuyukisa.

17. Yika muyitukwasa kukwata yiyulo ya mana?

¹⁷ Chipwe ngwe kunyima wakwachile yiyulo yinji yalita, nihindu iwuluka ngwe, chuma chilemu chize muchikukwasa kukwata yiyulo ya mana hi kulijikijila ko hanji kujikijila ha yize hiunalingi ku mwono, alioze chili kujikijila ha mana a Yehova. Iye wika mwe mahasa kukwaha chinyingi chamwenemwene ni malinjekela—yitanga yilemu yize muyikukwasa kupwa ni mana. (Yishi. 2:1-5) Yehova mahasa kukukwasa ukwate yiyulo yize muyimuvwisa kuwaha.—Samu 23:2, 3.