Tayiza Ngwe Kuli Yuma Yize Kuwanyingikine

1. Uhashi uka Yehova atutangile nawo, mumu liaka?

YEHOVA katutangile ni uhashi wa kunyonga, wa kulilongesa yuma yaha ni wa kunyingika chize mutuhasa kukaula yuma yize tunalilongesa. Mumu liaka atutangile chocho? Kachilingile hanga tupwe ni ‘chinyingi cha Zambi’ ni kumuwayila ni uhashi wetu wa kunyonga.​—Yishi. 2:1-5; Roma 12:1.

2. (a) Yika twatamba kunyingika hali yetu ene? (Yombi 37:23, 24) (Tala nawa chizulie.) (b) Mumu liaka chili chilemu kuli yetu kutayiza ngwetu, kutwanyingikine yuma yeswe?

² Chipwe ngwe Yehova katutangile ni uhashi wa kulilongesa yuma, nihindu umwenemwene uli ngwo, kuli yuma yinji yize kutwanyingikine. (Tanga Yombi 37:23, 24.) Tuchinyongenu ha chilweza cha Yombi. Yehova kamuhulile yuma yinji yize iye te kayinyingikine. Yihula yacho yakwashile Yombi apwe mukwa-kulikehesa, ni kululieka mutapu wa kunyonga chenyi. (Yombi 42:3-6) Chizechene nawa, chili chipema kuli yetu kunyingika haze hasulila uhashi wetu ni kutayiza ngwetu, kutwanyingikine yuma yeswe. Kulinga chino, muchitukwasa kujikijila muli Yehova ngwetu, mashimbu eswe matulweza yize chamwenemwene twatamba kunyingika hanga tukwate yiyulo yipema.​—Yishi. 2:6.

3. Yika mutumona ha mutwe uno?

³ Ha mutwe uno, mutumonaho yuma yimwe yize yetu kutwanyingikine, ni kapinda yoze mutuhasa kupalika mumu lia kuhona kunyingika sango jeswe. Mutumona nawa ulemu wa kuhona kunyingika yuma yimwe. Kulilongesa yuma yino, muchitukwasa kukolesa ujikijilo wetu muli Yehova, yoze ukwete chinyingi chingunu, nawa wakutwaha sango jize tunafupu.​—Yombi 37:16.

KUTWANYINGIKINE TANGWA LIZE SONGO MULIZA

4. Kulita ni Mateu 24:36, chuma chika chize kutwanyingikine?

⁴ Tanga Mateu 24:36. Yetu kutwanyingikine shimbu lize songo lia hano hashi muliza. Chipwe Yesu muze apwile hano hashi te kanyingikine ‘tangwa liacho ni ola yacho.’a Kulutwe iye yalweza apostolo jenyi ngwenyi, Yehova Mwenya Mashimbu, hanatese tangwa lize yuma yimwe muyilingiwa kulita ni “chiyulo chenyi.” (Yili. 1:6, 7) Yehova hanatese shimbu lialita lize songo lia hano hashi muliza. Alioze yetu kutushi ni uhashi wa kunyingika kanawa tangwa lize songo muliza.

5. Amu kutwanyingikine shimbu lize songo muliza, kuchi chino muchihasa kukwata ku mwono wetu?

⁵ Kulita ni yize Yesu ambile, yetu kutwanyingikine mashimbu waze mutununga ni kushimbwila ndo haze songo muliza. Mumu lia chino, mutuhasa kuhona uhumikizo hanji kuputuka kunenganyana, chipi-chipi ni tunashimbwila tangwa lia Yehova ha miaka yinji. Muchihasa nawa kupwa chikalu muze asoko jetu ni atu akwo matuseha mumu ngwo, songo kanda lichiza ndo haliapwila. (2 Petu. 3:3, 4) Hanji mutunyonga ngwetu, te muchipwa chashi kulihumikiza ni kunyongonona muze matuseha, nyi te tunanyingika pundu tangwa lize songo muliza.

6. Mumu liaka chili chipema kuhona kunyingika tangwa lize songo muliza?

⁶ Kwamba pundu, amu kutwanyingikine tangwa lize songo muliza, Yehova kanatwehe uhashi wa kusolola ngwetu, twakumulingila mumu twakumuzanga ni kujikijila muli iye. Yetu tunazange kulingila Yehova ku miaka yeswe, hi wika ko ndo haze songo muliza. Shimbu tulihulikile chinji ha shimbu lize “tangwa lia Yehova” muliza, chuma chipema chili kunyonga ha yuma yize muyikalianga kulingiwa mba tangwa liacho lihete. Kulinga chino, muchitukwasa kukundama chinji kuli Yehova, kwokesa ujikijilo wetu muli iye ni kusa tachi hanga tumuvwise kuwaha.​—2 Petu. 3:11, 12.

7. Yika tunanyingika?

⁷ Chili chilemu kulihulikila ha yize tunanyingika. Yika tunanyingika? Tunanyingika ngwetu, matangwa a kusula kaputukile ha 1914. Yehova katuhele uprofeto wa mu Mbimbiliya uze kuushi kusolola wika mwaka wacho, alioze wakusolola nawa mu yimako-yimako chize hano hashi te muhapwa kukatuka ha mwaka 1914. Kashika tuli ni shindakenyo ngwetu, ‘tangwa linene lia Yehova hiliakundama.’ (Zefa. 1:14) Tunanyingika nawa mulimo uze Yehova atuhele hanga tulinge; ‘kwambujola sango jipema ja Wanangana kuli atu anji.’ (Mateu 24:14) Sango jacho jinapu kwambujola mu yifuchi kuhiana 240, ni mu malimi kuhiana 1,000. Yetu kutwafupiwile kunyingika ‘tangwa ni ola yize songo muliza,’ mumu chino chakutukwasa kulihulikila chinji mu mulimo uno ulemu.

KUTWANYINGIKINE YIZE YEHOVA MAHASA KULINGA

8. Maliji ‘milimo yeswe ya Zambi wamwenemwene’ ha yika anatale? (Chilumbununyi 11:5)

⁸ Yetu kutwanyingikine ‘milimo yeswe ya Zambi wamwenemwene.’ (Tanga Chilumbununyi 11:5.) Maliji wano, kanatale ha yize Yehova hanalingi ni ha yize akwecha yilingiwe hanga amanunune upale wenyi. Kutwanyingikine yuma yeswe yize yakutwala Yehova hanga eche chimwe chuma chilingiwe hanji chize iye makalinga yuma hanga atukwase. (Samu 37:5) Mbimbiliya yakutesa kuhona kunyingika milimo yeswe ya Zambi wamwenemwene ni chize mwana akuputuka mu jimo lia naye. Chipwe akwa-mana no kanda achinyingika chize yino yakulingiwa. Chizechene nawa, yetu kutwanyingikine mutapu uze Yehova makalingilamo yuma.

9. Amu kutwanyingikine chize Yehova makalinga yuma, yika mutuhasa kuputuka kunyonga?

⁹ Mumu lia kuhona kunyingika yize Yehova makalinga hanga atukwase, mutuhasa kuputuka kuyambashana. Mutuhasa kwivwa woma wa kwecha yuma yimwe hanga tulingile chinji Yehova. Ngwe chilweza, mutuhasa kwivwa woma wa kwashiwisa mwono hanji wa kuya ni kwambujola kuze kunafupiwa ukwaso. Mutuhasa kuputuka nawa kunyonga ngwetu, Yehova keshi kutuwahisa mumu kutushi kuhasa kumanununa yize twatesele ku ufulielo, kutushi kuhasa kumona mihuko ya mulimo wetu wa kwambujola, hanji mumu lia kapinda yoze tunapalika mu umwe mulimo uze tunalingi mu ululikiso wa Yehova.

10. Amu kutwanyingikine yize Yehova makalinga, yitanga yika twatamba kupwa nayo?

¹⁰ Kuhona kunyingika yize Yehova makalinga, chakutukwasa tupwe ni yitanga ngwe kulikehesa ni kuhomboka. Twakunyingika nawa ngwetu, manyonga ni majila ja Yehova kanahiane a yetu. (Iza. 55:8, 9) Chikwo nawa, twakwokesa ujikijilo wetu muli Yehova ni kunyingika ngwetu, iye wika mwe matukwasa kufumbuka ku mwono. Muze twakufumbuka mu mulimo wa kwambujola hanji mu milimo yikwo ya mu ululikiso, twakuhana uhaliso weswe kuli Yehova. (Samu 127:1; 1 Kori. 3:7) Mba yika mutulinga nyi ngwe yuma yimwe kuyalingiwile kulita ni chize te tunashimbwila? Ha chikuma ngwe chino, twatamba kunyingika ngwetu, Yehova kananyingika yuma yeswe. (Iza. 26:12) Yetu twakulinga chihanda chetu ni kushimbwila ngwetu, Yehova neye malinga chihanda chenyi. Tuli ni shindakenyo ngwetu, iye matwaha usongwela uze mutufupa chipwe ngwe kechi kuchilinga mu chikomokeso ngwe chize alingile ha mashimbu amwe ku shakulu.​—Yili. 16:6-10.

11. Yuma yika yilemu tunanyingika hakutwala kuli Yehova?

¹¹ Tunanyingika ngwetu, Yehova mashimbu eswe kakusolola zango, ululi ni mana. Tunanyingika nawa ngwetu, Yehova kakulemesa yuma yeswe yize twakumulingila ni yize twakulingila mandumbu jetu. Tuli nawa ni shindakenyo ngwetu, Yehova mashimbu eswe kakuwahisa waze akushishika kuli iye.​—Hepre. 11:6.

KUTWANYINGIKINE YIZE MUYIKALINGIWA HAMENE

12. Yika twalilongesa ha Tiangu 4:13, 14?

¹² Tanga Tiangu 4:13, 14. Kutwanyingikine yize muyikalingiwa kuli yetu hamene, mumu mutuhasa kupalika mu yuma yize te kutushi ni kushimbwila. (Chilu. 9:11) Hachino, kutuchi kuhasa kupwa ni shindakenyo nyi yuma yize twatesa mutuyilinga lume nyi ka, chipwe kunyingika nyi mutununga ni mwono hanga tuyimanunune.

13. Kuchi kuhona kunyingika yize muyikalingiwa kulutwe muchihasa kukwata ku mwono wetu?

¹³ Amu kutwanyingikine yize muyikalingiwa kulutwe, muchihasa kupwa chikalu kunyongonona. Mumu liaka tunambe chocho? Mumu nyi twalipikala chinji ha yuma yize muyihasa kulingiwa, chino muchitokesa uwahililo wetu. Mwono wetu muuhasa kwalumuka ha shimbu lieswalio; chino muchihasa kutuhongesa chinji. Mutuhasa nawa kuhonga chinji muze yuma muyihona kulingiwa ngwe chize te tunashimbwila.​—Yishi. 13:12.

14. Uwahililo wetu unatale ha yika? (Tala nawa yizulie.)

¹⁴ Muze twakupalika mu yipikalo, twakupwa ni uhashi wa kusolola ngwetu, chipwe ngwe mukulingiwa yuma yeswayo, nihindu mutuwayila Yehova mumu lia zango, hi ko ngwo, mumu iye kakutwaha yuma yipema. Mbimbiliya yakusolola ngwo, kutwatambile kushimbwila ngwetu, Yehova matufunga ku yipikalo yeswe nawa ngwo, iye keshi kulianga kutesa yuma yize muyilingiwa ku mwono wetu. Yehova kananyingika ngwenyi, uwahililo wetu kuwatalile ha yize muyikalingiwa kulutwe, alioze unatale ha kumwononokena ni kukaula usongwelo wenyi. (Jere. 10:23) Muze twakufupa ukwaso wa Yehova hanga tukwate yiyulo, kutushi kulipikala ha yize muyihasa kulingiwa kulutwe. Twakupwa ni nyonga lize Tiangu atongwele muze ambile ngwenyi: “Nyi Yehova mapala, mutupwa ni mwono ni kulinga chinganji-chinganji.”​—Tia. 4:15.

15. Yika tunanyingika hakutwala ku yuma yize muyikalingiwa kulutwe?

¹⁵ Umwenemwene uli ngwo, kutwanyingikine yize muyikalingiwa kulutwe, alioze tunanyingika ngwetu, Yehova kanatulakenya mwono wa mutolo. Kuli amwe, mwono wacho muukapwa mu malilu, kuli akwo hano hashi. Tunanyingika ngwetu Yehova keshi kulionga, nawa ngwetu kukushi chuma nichimwe chize muchimukwika kumanununa yilakenyo yenyi yeswe. (Titu 1:2) Iye wika mwe ‘wakulumbununa songo chize ku uputukilo, chize ku shakulu wakulumbununa yuma yize kanda ayilinga.’ Maliji wano kamanunukine ku mashimbu a kunyima, makamanunuka nawa kulutwe lia matangwa. (Iza. 46:10) Tuli nawa ni shindakenyo ngwetu, kukushi chuma nichimwe chize muchihasa kukwika Yehova kutuzanga. (Roma 8:35-39) Chipwe ngwe mukulingiwa yuma yeswayo ku mwono wetu, iye matwaha mana, matutakamisa ni kutwaha tachi jize mutufupa hanga tunyongonone. Yino yinatwehe shindakenyo ngwetu, Yehova makatukwasa ni kutuwahisa.​—Jere. 17:7, 8.

KUTWANYINGIKINE NDO HAZE YEHOVA ATUNYINGIKINA

16. Yika Yehova ananyingika hali yetu yize yetu ene kutwanyingikine? (Samu 139:1-6)

¹⁶ Tanga Samu 139:1-6. Sakatanga yetu kananyingika kanawa chize twapwa ku mujimba ni ku manyonga. Iye kakutuzanga chinji. Kananyingika yize twakuhanjika ni yize tunambe kwamba. Yehova kakumona nawa yeswe yize twakulinga ni mumu liaka twakuyilinga. Mwanangana Ndawichi kasolwele ngwenyi, Yehova kakupwa hamwe ni yetu hanga atukwase ni kutufunga. Cho kuwaha ha kunyingika ngwetu, Sakatanga wa yuma yeswe kakulihulumba hali umwe ni umwe wa kuli yetu! Ndawichi kambile ngwenyi: “Mana apwa haha angukomwesa naye. Asuha naye, chahashile kuhetako.”​—Samu 139:6.

17. Mumu liaka muchihasa kupwa chikalu kuli yetu kutayiza ngwetu Yehova kanatunyingika kanawa?

¹⁷ Mumu lia chize atulelele, chako chetu hanji yize twapwile ni kufuliela muze te kanda tuchinyingika umwenemwene, muchihasa kupwa chikalu kumona Yehova ngwe Tata wa zango yoze wakulihulumba hali yetu. Mutuhasa kuputuka kunyonga ha yuma yipi yize twalingile kunyima ni kumona ngwetu, Yehova kechi kupwa nawa sepa lietu, kali kusuku ni yetu. Ha mashimbu amwe, Ndawichi neye che alivwile. (Samu 38:18, 21) Chikwo nawa, mutu yoze unase tachi hanga alumune mwono wenyi ni kutwama kulita ni shimbi ja Yehova, mahasa kulihula ngwenyi: ‘Nyi chamwenemwene Zambi kanangunyingika, mumu liaka anazange hanga ngweche kulinga yuma yize nakuzanga?’

18. Mumu liaka chili chilemu kutayiza ngwetu Yehova kanatunyingika kanawa kuhiana yetu ene? (Tala nawa yizulie.)

¹⁸ Chili chilemu kutayiza ngwetu, Yehova kanatunyingika kanawa, nawa kakumona yuma yinji yipema muli yetu yize yetu ene kutushi kuhasa kumona. Chipwe ngwe kakumona tupalia waze twakulinga ni kunyingika yize yakututwala kulinga yuma yimwe, nihindu Yehova kakutuzanga. (Roma 7:15) Muze twakunyingika ngwetu Yehova kakumona yuma yinji yipema muli yetu, chakutwaha tachi hanga tumuwayile ni ushishiko weswe hamwe ni uwahililo.

19. Yika tunanyingika hakutwala kuli Yehova?

¹⁹ Tunanyingika ngwetu, Yehova iye zango. Kutushi kuyambashana ha chikuma chino. (1 Yoa. 4:8) Tunanyingika nawa ngwetu, yuma yeswe yize akutwita hanga tulinge, yakusolola zango ni upeme wenyi hali yetu. Yehova kanazange hanga tukazuke mwono wa mutolo, kashika atuhele ukuule. Chawana chino chakutwaha shindakenyo ngwetu, chipwe ngwe tuli yihenge, nihindu mutuhasa kuvwisa Yehova kuwaha. (Roma 7:24, 25) Tunanyingika nawa ngwetu, ‘Zambi kali munene kuhiana mbunge yetu, kananyingika yuma yeswe.’ (1 Yoa. 3:19, 20) Yehova kanatunyingika kanawa, kali ni shindakenyo ngwenyi mutuhasa kulinga upale wenyi.

20. Mumu liaka kutwatambile kulipikala ha yuma yize kutwanyingikine?

²⁰ Yehova kakutulweza yuma yeswe yize twatamba kunyingika. Kashika, kutwatambile kulipikala ha yuma yize kutwanyingikine. Shimbu tuchilinge, twatamba kulihulikila ha yuma yahiana ulemu. Nyi twachilinga, mutujikijila muli Yehova, yoze ukwete chinyingi chingunu. (Yombi 36:4) Chipwe ngwe kutwanyingikine yuma yimwe ha mashimbu wano, nihindu Yehova makatulongesa yuma yinji yaha ku miaka yeswe. Chikwo nawa, tunawahilila chinji mumu kutuchi kalitwamina kulilongesa hakutwala kuli Zambi yetu, Yehova.​—Chilu. 3:11.