Imbulula Yesu ha Kulihana Chinji mu Mulimo wa Kwambujola

1. Chuma chika chakupwisa Yela ja Yehova alise ni atu waze akuliamba ngwo kali Akwa-Kristu?

KULIHANA chinjia mu mulimo wa kwambujola che chakupwisa Yela ja Yehova alise ni atu akwo waze akuliamba ngwo kali Akwa-Kristu. (Titu 2:14) Ha mashimbu amwe, muchihasa kupwa chikalu kulihana chinji mu mulimo wa kwambujola. Kota ni yena mutayiza maliji a umwe mukulwana wa mu chikungulwila yoze wakuzanga chinji kwambujola, wambile ngwenyi: “Ha mashimbu amwe, chishi kuzanga kuya ni kwambujola.”

2. Mumu liaka ha mashimbu amwe muchihasa kupwa chikalu kuya ni kwambujola?

² Hanji wakuzanga kulinga milimo yikwo mu ululikiso wa Yehova kuhiana kwambujola. Mumu liaka yino yakulingiwa? Mumu muze twakutunga Mazuwo a Wanangana ni kwalulieka, twakuhana ukwaso kuli mandumbu waze anapalika mu luyinda ni kwatakamisa, twakumona kafuji-fuji yiwape yize yakwizako; nawa chino chakutuvwisa kuwaha. Chikwo nawa, twakulivwa kanawa muze twakupwa mu yihela yacho, mumu twakumona zango ni sambukila yize yatwama mukachi ka mandumbu ni kumona nawa ngwo, yuma yize twakulinga kakuyilemesa. Hanji muchihasa nawa kupwa ngwe, twakwambujola mu yimwe njiza ha miaka yinji mba atu akehe wika e akutayiza sango jipema; anji kakulitunajo. Tunanyingika nawa ngwetu, amu tunakundama ku songo lia hano hashi, atu anji malituna kupanjika sango jipema. (Mateu 10:22) Yika muyitukwasa mba tununge ni kulihana chinji mu mulimo wa kwambujola?

3. Chishima chili ha Luka 13:6-9, yika chinatulongesa hali Yesu?

³ Mutuhasa kulilongesa chinji kuzanga kwambujola, ha kuhengwola chilweza cha Yesu. Muze apwile hano hashi, zango lienyi mu mulimo wa kwambujola kuliakatepulukile. Kwamba umwenemwene, liokele chinji ha kupalika cha mashimbu. (Tanga Luka 13:6-9.) Mu chimwe chishima, Yesu yatesa mulimo wa kwambujola ni lunga yoze wakalakalile chinji ha miaka yitatu hanga afunge mutondo wa mukuyu, alioze mutondo wacho te kuushi kwima. Chizechene nawa, Yesu kalingile miaka yitatu ni kwambujola kuli A-Yunda, chipwe chocho anji a kuli ayo kakapwile tumbaji twenyi. Alioze chizechene ngwe lunga yoze watumbile mukuyu kakalitwaminyine kuufunga, ni Yesu neye kakahongele hanji kwecha kwambujola sango jipema kuli atu. Shimbu achilinge, iye yalihana chinji hanga akwase atu kutayiza sango jipema.

4. Yika mutulilongesa ha chilweza cha Yesu?

⁴ Ha mutwe uno, mutumonaho chize Yesu alihanyine chinji mu mulimo wa kwambujola, chipi-chipi ha mashimbu jenyi akasula hano hashi. (Tala nota ya estudo “Hanyima lia yino” ha Luka 10:1.) Kunyingika yuma yize Yesu alongesele ni kwimbulula chilweza chenyi, muyitukwasa kulihana chinji mu mulimo wa kwambujola. Tutalenu yikuma yiwana yize mutuhasa kulilongesa ku chilweza cha Yesu: (1) Iye kanakalihulikila ha kulinga upale wa Yehova, (2) te kanyingika kanawa uprofeto, (3) kapwile ni kujikijila ha ukwaso wa Yehova, ni (4) kapwile ni nyonga lialita hali atu.

YESU KANAKALIHULIKILA HA KULINGA UPALE WA YEHOVA

5. Mumu liaka Yesu anakalihulikila chinji ha kulinga upale wa Zambi?

⁵ Yesu kalihanyine chinji mu mulimo wa kwambujola “sango jipema ja Wanangana,” mumu kanyingikine ngwenyi, che Yehova azangile hanga alinge. (Luka 4:43) Kuli Yesu, mulimo wa kwambujola wapwile chuma chilemu chinji ku mwono wenyi. Chipwe ha mashimbu jenyi a kasula hano hashi, iye kanungine ni kwambujola mu “mbonge ni mbonge, chihunda ni chihunda, hanga alongese atu.” (Luka 13:22) Yesu nawa kafumbile akwo hanga ambujole sango jipema, ngwe chizechene iye apwile ni kulinga.—Luka 10:1.

6. Kuchi mulimo wa kwambujola unakwate ha milimo yikwo ya mu ululikiso? (Tala nawa chizulie.)

⁶ Ni musono, mulimo wa kwambujola sango jipema uchili chuma chilemu chize Yehova ni Yesu anazange hanga tulinge. (Mateu 24:14; 28:19, 20) Kwamba umwenemwene, milimo yeswe yize twakulingila Yehova, yakukwasa mulimo wa kwambujola. Ngwe chilweza, twakutunga Mazuwo a Wanangana hanga waze eswe akutayiza sango jipema, alikungulwilemo ni kuwayila Yehova. Chikwo nawa, milimo yeswe yize akulinga ku Mbetele, yakukwasa mulimo wa kwambujola. Ukwaso uze twakuhana kuli mandumbu jetu waze anapalika mu luyinda, kuushi kwakwasa wika ku musunya, alioze ni ku spiritu hanga ahase kukwasa mulimo wa kwambujola. Kashika muze twakwiuluka ngwetu, mulimo wa kwambujola uli chuma chilemu chize Yehova anazange hanga tulinge, chino chakutukwasa kulihana chinji mu mulimo wacho. János, umwe mukulwana wa mu chikungulwila mu Hungria, yamba ngwenyi: “Yami nakwiuluka mashimbu eswe ngwami, ha milimo yize twakulinga kukushi mulimo umwe uze unahiane mulimo wa kwambujola. Mulimo wa kwambujola uli chiteli chetu chitangu.”

7. Mumu liaka Yehova anazange hanga tununge ni kwambujola? (1 Timoteu 2:3, 4)

⁷ Nyi mutumona atu ngwe chize Yehova akwamona, chino muchitukwasa kulihana chinji mu mulimo wa kwambujola. Iye kanazange atu anji evwe sango jipema, ajitayize hanga akaalamwine. (Tanga 1 Timoteu 2:3, 4.) Kashika akutukwasa hanga tululieke utotombo wetu wa kwambujola sango jipema. Ngwe chilweza, kamukanda Zangenu Atu—Mba Nwapwise Tumbaji, kali ni yiyulo yipema yize muyihasa kutukwasa kuputuka lusango ni nyonga lia kukwasa atu hanga apwe tumbaji. Chipwe ngwe atu kechi kuwayila Yehova haliapwila, hanji makachilinga ku songo lia luyinda munene. Kashika yize mutulinga haliapwila, muyihasa kwakwasa hanga kulutwe akakwate chiyulo cha kuwayila Yehova. Chino muchikalingiwa wika nyi mutununga ni kwambujola.

YESU TE KANYINGIKA KANAWA UPROFETO WA MU MBIMBILIYA

8. Kunyingika kanawa uprofeto wa mu Mbimbiliya chakwashile Yesu kulinga yika?

⁸ Yesu kanyingikine kanawa chize uprofeto wa mu Mbimbiliya te muumanunuka. Ngwe chilweza, iye kanyingikine ngwo mulimo wenyi wa kwambujola, te muumbata miaka yitatu ni ndambu. (Danie. 9:26, 27) Iye kanyingikine nawa ha shimbu lize mafwa ni chize mafwa. (Luka 18:31-34) Kashika alihanyine chinji mu mulimo wa kwambujola hanga amanunune kanawa chiteli chenyi.

9. Kuchi kunyingika kanawa uprofeto wa mu Mbimbiliya chakutukwasa kulihana chinji mu mulimo wa kwambujola?

⁹ Kunyingika kanawa uprofeto wa mu Mbimbiliya, chakutukwasa hanga tulihane chinji mu mulimo wa kwambujola. Mumu tunanyingika ngwetu, kwasala hakehe hanga songo lia chifuchi chino lize. Tunamono chize yuma yize yinalingiwa hashi heswe, yinamanununa uprofeto wa mu Mbimbiliya hakutwala ku matangwa a kusula. Tunamono nawa kulitachika hakachi ka wanangana wa ndundo ja hashi heswe Anglo-Americana ni Rússia ni waze akwakwasa. Uprofeto wa mwanangana wa ku sule ni mwanangana wa ku norte, unamanunuka ha matangwa wano a kusula. (Danie. 11:40) Tunanyingika nawa ngwetu, yiliato ya lukapoya luze anatongola ha Daniele 2:43-45, yinalumbunuka wanangana wa ndundo ja hashi heswe Anglo-Americana. Tuli ni shindakenyo ngwetu, kwasala hakehe Wanangana wa Zambi muunongesa manguvulu eswe hano hashi. Uprofeto uno weswe, wakutukwasa tunyingike ha mashimbu waze tuli, ni kutukwasa hanga twambujole kawashi-washi.

10. Mutapu ukwo uka uze uprofeto wa mu Mbimbiliya muuhasa kutukwasa kununga ni kwambujola?

¹⁰ Uprofeto wa mu Mbimbiliya, ukwete nawa sango ja kutalatala jize tunazange kulianyina ni akwetu. Carrie, umwe ndumbu wa pwo yoze wakukalakala mu República Dominicana, yamba ngwenyi: “Muze nakunyonga ha yuma yipema yize Yehova anatulakenya kulutwe, chino chakungukwasa kulianyina yuma yacho ni akwetu.” Atu kanamono lamba linji, chakupwa chashi kumona ngwo, o kanafupu kwivwa hakutwala ku yilakenyo ya Yehova.” Uprofeto wa mu Mbimbiliya unasolola ngwo, Yehova machinunga ni kukwasa mulimo wetu wa kwambujola. Chino chakutukwasa tununge ni kwambujola. Leila yoze watwama mu Hungria, yamba ngwenyi: “Mukanda wa Izaia 11:6-9, wakungwiulula ngwo, Yehova mahasa kwalumuna yitanga ya mutu mweswawo. Kashika, ngunazange kulianyina sango jipema ni atu eswe chipwe waze akusoloka ngwe kechi kujitayiza.” Christopher, umwe ndumbu mu Zâmbia, yamba ngwenyi: “Mukanda wa Marku 13:10, waprofetezele ngwo, sango jipema te majambujola hashi heswe. Kashika, chili uhenya unene kuli yami kulinga chihanda cha umanunuko wa uprofeto wacho.” Mba kuli yena, uprofeto uka wa mu Mbimbiliya uze wakukukwasa kununga ni kwambujola?

YESU KANAKAJIKIJILA HA UKWASO WA YEHOVA

11. Mumu liaka Yesu atambile kujikijila muli Yehova mba anunge ni kulihana chinji mu mulimo wa kwambujola? (Luka 12:49, 53)

¹¹ Yesu kapwile ni kufuliela ngwenyi, Yehova mamukwasa hanga anunge ni kwambujola sango jipema. Chipwe ngwe Yesu kapwile ni kuhanjika ni vumbi ni kusakula maliji waze mahanjika, nihindu kanyingikine ngwenyi, sango jipema te mujineha vunda ni yihungumiona. (Tanga Luka 12:49, 53.) Mumu lia kwambujola sango jipema, ha yisuho yinji, mangana a yingeleja yafupa kushiha Yesu. (Yoa. 8:59; 10:31, 39) Chipwe chocho, Yesu yanunga ni kwambujola mumu kanyingikine ngwenyi, Yehova kapwile hamwe nenyi. Yamba ngwenyi: “Chishi ukawami, alioze Tata, yoze wangutumine, kali hamwe ni yami. . . . kanguhichikile ukawami, mumu mashimbu eswe nakulinga yuma yize yakumupemena.”—Yoa. 8:16, 29.

12. Kuchi Yesu aluliekele tumbaji twenyi hanga anunge ni kwambujola chipwe muze te mukusoloka yihungumiona?

¹² Yesu keulwile tumbaji twenyi ngwenyi, no te mahasa kujikijila ha ukwaso wa Yehova. Ha yisuho yinji, iye yaaha shindakenyo ngwenyi, Yehova maakwasa chipwe muze mapalika mu yihungumiona. (Mateu 10:18-20; Luka 12:11, 12) Iye yaalweza hanga akanyame. (Mateu 10:16; Luka 10:3) Yaasongwela nawa hanga ahone kushinjila mutu niumwe kutayiza sango jipema. (Luka 10:10, 11) Chikwo nawa, yaalweza hanga achine muze maahungumiona. (Mateu 10:23) Chipwe ngwe Yesu kalihanyine chinji mu mulimo wa kwambujola ni kufuliela muli Yehova, nihindu te keshi kusa mwono wenyi mu ponde chamusela.—Yoa. 11:53, 54.

13. Mumu liaka watamba kupwa ni shindakenyo ngwe Yehova makukwasa?

¹³ Ni musono nawa, tunafupu ukwaso wa Yehova mba tununge ni kwambujola muze mukusoloka yihungumiona. (Uso. 12:17) Mumu liaka watamba kupwa ni shindakenyo ngwe Yehova makukwasa? Mumu lia yize Yesu echile mu kulemba chize chili ha Yoano kapitulu 17. Mu kulemba chacho, Yesu yeta kuli Yehova hanga afunge apostolo jenyi, mba Yehova yamukumbulula. Mukanda wa Yilinga unasolola ngwo, Yehova kakwashile apostolo kulihana chinji mu mulimo wa kwambujola chipwe ngwe kapalikile mu yihungumiona. Mu yilemba yacho, Yesu kechile nawa hanga Yehova afunge atu eswe waze matayiza sango jize apostolo apwile ni kwambujola. Ni yena uli mukachi ka atu jacho. Yehova kananungu ni kukumbulula kulemba chacho ndo musono. Iye manunga ni kukukwasa ngwe chizechene akwashile apostolo.—Yoa. 17:11, 15, 20.

14. Mumu liaka mutuhasa kununga ni kulihana chinji mu mulimo wa kwambujola chipwe ha mashimbu akalu? (Tala nawa chizulie.)

¹⁴ Amu tunakundama ku songo lia hano hashi, muchihasa kupwa chikalu kulihana chinji mu mulimo wa kwambujola. Alioze, Yesu katuhele shindakenyo ngwenyi, mutupwa ni ukwaso uze mutufupa. (Luka 21:12-15) Chizechene ngwe Yesu ni tumbaji twenyi, ni yetu twakwecha hanga atu asakule ene nyi matupanjika nyi ka, kutushi kuzwela no. Chipwe ku yihela yize mulimo wetu uli wa kukanjisa, mandumbu jetu kakuhasa kwambujola mumu kakujikijila muli Yehova hi ha tachi jo ko. Ngwe chizechene Yehova atakamishine tuvumbi twenyi kunyima, ni musono nawa, iye kanatukwase hanga ‘tulinge kanawa mulimo wa kwambujola kulita ni upale wenyi.’ (2 Timo. 4:17) Kashika, jikijila muli Yehova ngwe makukwasa hanga ununge ni kulihana chinji mu mulimo wa kwambujola.

YESU KANUNGINE NI KUPWA NI NYONGA LIALITA

15. Kuchi tunanyingika ngwetu Yesu kanungine ni kusolola nyonga lialita hakutwala ku mulimo wa kwambujola?

¹⁵ Yesu kanungine ni kusolola nyonga lialita hakutwala ku mulimo wa kwambujola. Chino chamukwashile ahone kutokesa uwahililo wenyi ni kununga kulinga yize mahasa. Ngwe chilweza, ha kupalika cha mwaka umuwika muze te haputuka kwambujola, Yesu yamona ngwenyi, atu anji te kanazange chinji kwivwa sango jipema. Iye yatesa atu jacho ni umwe munda uze te hiwahia kulu ni kuucha. (Yoa. 4:35) Ha kupalika cha mashimbu, iye yalweza tumbaji twenyi ngwenyi: “Kuli milimo yinji.” (Mateu 9:37, 38) Hanyima yamba nawa ngwenyi: “Kuli milimo yinji, . . . etenu kuli Mwenya-milimo hanga atume akwa-milimo anji alinge milimo yenyi.” (Luka 10:2) Yesu kanungine ni kufuliela ngwenyi, atu matayiza sango jipema. Kashika, kapwile ni kuwahilila chinji muze o apwile ni kujitayiza.—Luka 10:21.

16. Kuchi yilweza ya Yesu yakwashile tumbaji twenyi kupwa ni nyonga lialita hakutwala ku mulimo wa kwambujola? (Luka 13:18-21) (Tala nawa chizulie.)

¹⁶ Mba akwase tumbaji twenyi ahone kukokolola zango lio mu mulimo wa kwambujola, Yesu yasolola chize sango jize o apwile ni kwambujola te mujineha mihuko yipema. Tutalenu yilweza yaali. (Tanga Luka 13:18-21.) Chitangu, Yesu yahanjika ha luchichi mukehe wa mosetate hanga alongese ngwo, sango jipema ja Wanangana te mujikola mu yimwe jila ya kukomwesa. Yasolola nawa ngwo, te kukushi chuma nichimwe chize muchikwika kukola chacho. Mba ha chilweza chikwo, iye yahanjika ha futunwiso hanga asolole chize sango jipema te mujilimwanga ni kwalumuna mwono wa waze majitayiza. Chipwe ngwe chino te muchimbata mashimbu mba chisoloke kumeso ja atu, nihindu Yesu yakwasa tumbaji twenyi kumona ngwo, sango jize te mambujola, mujikwasa atu anji.

17. Mumu liaka twatamba kununga ni kusolola nyonga lialita hakutwala ku mulimo wa kwambujola?

¹⁷ Kunyonga chize mulimo wa kwambujola unakwase atu anji hashi heswe, chakutukwasa kulihana chinji mu mulimo wacho. Mwaka ha mwaka, tununu twa atu waze akulilongesa Mbimbiliya, kakuya ha Chiwanyino cha Kwiuluka Kufwa cha Yesu. Mba hakachi ka atu jacho, anji kakwapapachisa ni kulichinga ni yetu mu mulimo wa kwambujola. Kutwanyingikine unji wa atu waze manunga ni kutayiza sango jipema. Alioze chuma tunanyingika chili ngwo, Yehova kanakungu mbunga yinene ya atu waze makalilamwina ha luyinda munene. (Uso. 7:9, 14) Yehova Mwenya munda kananyingika ngwenyi, kuchili atu anji waze matayiza sango jipema, kashika yetu mutununga ni kwambujola.

18. Yika tunazange hanga atu anyingike hakutwala kuli yetu?

¹⁸ Chuma chimwe chize chapwile ni kukwasa atu kunyingika tumbaji twa Yesu, chapwile kulihana cho mu mulimo wa kwambujola. Ngwe chilweza, apostolo kambulwile sango jipema ni hamu hamwe ni chiseke, chocho atu yanyingika ngwo, o “kapwile hamwe ni Yesu.” (Yili. 4:13) Musono, ni yetu tunazange kulihana chinji mu mulimo wa kwambujola hanga atu anyingike ngwo, tunembulula kulihana cha Yesu.