Kwoko lia Yehova hi Lihi ko

1. Kuchi Mose asolwele ufulielo muli Yehova muze achijile A-Izalele mu Engitu?

HAKACHI ka atu waze akutongola mu mukanda wa A-Hepreu, Mose kali chilweza chipema cha ufulielo. (Hepre. 3:2-5; 11:23-25) Iye kasolwele ufulielo muze achijile A-Izalele mu Engitu. Kakechele hanga Falau ni maswalale jenyi amuvwise woma. Mumu lia kujikijila muli Yehova, iye yazawisa A-Izalele mu Kalunga-lwiji Muchila ni kwasongwela mu puya. (Hepre. 11:27-29) Mose kafulielele muli Yehova chipwe muze A-Izalele anji aputukile kuyambashana ha uhashi wenyi wa kwafunga. Alioze ufulielo wa Mose kuwakayile mu meya, mumu kupalikila mu chikomokeso, Zambi yahana kulia ni meya hanga afunge atu jenyi mu puya.a—Kutuhu. 15:22-25; Samu 78:23-25.

2. Mumu liaka Zambi ahulile Mose ngwenyi: ‘Te kwoko lia Yehova hiliahihia nyi?’ (Kwalula 11:21-23)

² Ha amwe mashimbu, muze A-Izalele te halinga mwaka umuwika chize haze atuhukile mu Engitu, Yehova yalakenya kuhana yifwo kuli atu jenyi. Alioze chipwe ngwe Mose kapwile ni ufulielo ukolo, nihindu iye yahamika ha chilakenyo chino cha Yehova. A-Izalele kapwile anji, chikwo nawa mu puya kumwakapwile kulia. Kuchi te Yehova mahasa kuhana yifwo kuli atu apwahaha? Mba akwase Mose, Yehova yamuhula ngwenyi: ‘Te kwoko lia Yehova hiliahihia nyi?’ (Tanga Kwalula 11:21-23.) Hano, liji “kwoko lia Yehova,” linalumbunuka spiritu yenyi yisandu hanji ngwetu, ndundo jize akulinga najo yuma. Kwamba umwenemwene, Yehova te kanahula Mose ngwenyi: ‘Shina unanyongo ngwe yami chichi kuhasa kulinga yize nalakenya?’

3. Mumu liaka chilweza cha Mose ni A-Izalele chili ni ulemu kuli yetu?

³ Shina hiunalihula nyi Yehova makwaha yize unafupu ku musunya hanga ufunge usoko we? Chipwe ngwe hiunalihula chocho hanji ka, nihindu chihula chize Yehova ahulile Mose muchihasa kukukwasa. Ha mutwe uno, mutumonaho yize yatwalile Mose ni A-Izalele kuyambashana ha yize te Yehova mahasa kwalingila. Mutumona nawa jimwe shimbi ja mu Mbimbiliya jize mujitukwasa kufuliela chinji ngwo, kwoko lia Yehova hi lihi ko.

LILONGESE HA CHILWEZA CHA MOSE NI A-IZALELE

4. Yika yalingiwile kuli A-Izalele anji muze apwile mu puya?

⁴ Mumu liaka A-Izalele anji aputukile kunyonga ngwo, Yehova kechi kuhasa kwaha yize anafupu ku musunya? A-Izalele ‘hamwe ni atu akwo waze alichingile no,’ kalingile mashimbu anji mu puya muze te anakatuka ku Engitu ni kuya ku Chifuchi cha Chilakenyo. (Kutuhu. 12:38; Shimbi 8:15) Atu jacho hamwe ni A-Izalele akwo, yaputuka kulinyenyeta ha kulia wika manaa. (Kwa. 11:4-6) Ayo yaputuka kwivwa usona wa yuma yize apwile ni kulia mu Engitu. Amu te analinyenyeta hali Mose, iye yanyonga ngwenyi, katamba kwaha yifwo, alioze kakanyingikine chize machilinga.—Kwa. 11:13, 14.

5-6. Kuchi yitanga ya atu akwo yakwachile hali A-Izalele, mba yika mutuhasa kulilongesa?

⁵ A-Izalele kembulwile yitanga ya atu waze alichingile no ha kuhona kusakwilila. Ni yetu nawa, mutuhasa kwimbulula yitanga ya akwetu ya kuhona kuwahilila ni kusakwilila ha yize Yehova akutwaha. Yino muyihasa kulingiwa nyi twatala kunyima ni kwivwa usona wa yuma yize twapwile nayo, hanji kuvwila yuma ya akwetu chipululu. Alioze nyi twapwa ni mbunge ya kusakwilila, mutuwahilila ni yeswe yize tuli nayo.

⁶ A-Izalele katambile kwiuluka ngwo, Yehova kalakenyene ngwenyi, mapwa ni yuma yinji yipema muze maheta mu chifuchi chize anayi. Chilakenyo chino, te muchimanunuka wika mu Chifuchi cha Chilakenyo, hi mu puya ko. Chizechene nawa, shimbu tulihulikile ha yuma yize kutushi nayo mu chifuchi chino, muchilita kulihulikila ha yize Yehova analakenya kutwaha mu chifuchi chaha. Mutuhasa nawa kupukuna ha yisoneko yize muyihasa kutukwasa kwokesa ujikijilo wetu muli Yehova.

7. Mumu liaka mutuhasa kupwa ni shindakenyo ngwetu kwoko lia Yehova kuliahihile?

⁷ Alioze muhasa kulihula ngwe, mumu liaka Yehova ahulile Mose ngwenyi: ‘Te kwoko lia Yehova hiliahihia nyi?’ Kota Yehova kazangile kukwasa Mose anyonge hi wika ko ha kwoko lienyi lia ndundo, alioze ni ha yize kwoko liacho mulihasa kulinga. Zambi te mahasa kuhana yifwo yinji kuli A-Izalele, chipwe ngwe kapwile mu puya muze te kumushi nichimwe. ‘Ni kwoko lia tachi nawa lia kuzoza,’ Zambi yasolola ndundo jenyi. (Samu 136:11, 12) Kashika, muze mutupalika mu yeseko, kutwatambile kukakajana ha ukwaso wa kwoko lia Yehova.—Samu 138:6, 7.

8. Yika muyitukwasa kwehuka upi uze A-Izalele alingile mu puya? (Tala nawa chizulie.)

⁸ Yehova yalinga yize alakenyene, yatumina atu jenyi ngwali anji. Chipwe chocho, A-Izalele kakasakwililile Zambi ha chikomokeso chino. Shimbu achilinge, anji a kuli ayo, yapwa ni mbunge ya kuzo, yakalakala tangwa liamuundu ni chipinji hanga akwate ngwali anji. Yehova ‘yatenuka,’ chocho yonwona atu eswe waze asolwele yitanga ya kuzo. (Kwa. 11:31-34) Yika mutuhasa kulilongesa ha chilweza chino? Twatamba kukanyama hanga tuhone kupwa akwa-kuzo. Chipwe ngwe tuli pichi hanji yiswale, twatamba kutulikila ‘upite wetu mu malilu’ ha kupwa ni usepa upema ni Yehova hamwe ni Yesu. (Mateu 6:19, 20; Luka 16:9) Nyi twachilinga, mutuhasa kupwa ni shindakenyo ngwetu, Yehova matwaha yeswe yize tunafupu.

9. Ha yikuma yika mutuhasa kupwa ni shindakenyo ngwetu Yehova matukwasa?

⁹ Musono, Yehova kakuzoza kwoko lienyi hanga akwase tuvumbi twenyi. Alioze, chino kuchalumbunukine ngwo, kutuchi kuhona mbongo hanji yuma ya kulia.b Chipwe chocho, tujikijilenu muli Yehova ngwetu, manunga ni kutwaha yeswe yize mutufupa. Iye matukwasa muze mutupalika mu kapinda. Kashika twatamba kufuliela ngwetu, Yehova mazoza kwoko lienyi hanga atukwase ha yeswe yize mutufupa ku musunya. Mutumona yikuma yaali yize muyitukwasa kusolola ufulielo wacho: (1) muze mutuhona mbongo, ni (2) muze mutululieka yize mutukafupa kulutwe lia matangwa.

MUZE MUTUHONA MBONGO

10. Yika muyihasa kutunehena kapinda wa mbongo?

¹⁰ Amu songo lia chifuchi chino linakundama, mutuhasa kushimbwila ngwetu, yuma muyipihia chinji. Mbwaja mu yuma ya mafwefwe, jita, luyinda wa chisemewa ni misongo, muyihasa kwokese unji wa mbongo jize mutufupiwa, kutokesa milimo, yikumba hanji mazuwo jetu. Mba tununge ni kufunga asoko jetu, yika muyihasa kutukwasa kukwata yiyulo yize muyisolola ngwo, twakujikijila ha kwoko lia Yehova?

11. Yika muyihasa kutukwasa kukumba kapinda wa mbongo? (Luka 12:29-31)

¹¹ Chuma chipema kulinga chili kukunjika yipikalo ye kuli Yehova. (Yishi. 16:3) Mwite mana waze unafupu hanga ukwate yiyulo yipema ni kupwa ni mbunge ya kulihumikiza hanga uhone kulipikala chinji ha yize unapalika. (Tanga Luka 12:29-31.) Mwite akukwase hanga uwahilile ni yize uli nayo. (1 Timo. 6:7, 8) Hengwola mu mikanda yetu hanga unyingike yize muhasa kulinga muze unahono mbongo. Atu anji hanayuku ha yikuma yili ha site jw.org, yize yakuhanjika hakutwala ku kuhona mbongo.

12. Yihula yika muyihasa kukwasa Mukwa-Kristu kukwata chiyulo chize muchiyukisa usoko wenyi?

¹² Atu anji mba awane mulimo, kakuhichika asoko jo ni kuya ku yihela ya kusuku. Alioze, kanji-kanji o kakunyingika ngwo, kakwachile chiyulo chipi. Kashika shimbu kanda uchitayiza umwe mulimo, kanda unyonga wika ha mbongo jize muzukako, alioze watamba kunyonga nawa ha yize mutokesa ku ufulielo. (Luka 14:28) Lihule ngwe: ‘Kuchi ulo wami muupwa, nyi naya ni kutwama kusuku ni mutu yoze nalimbata nenyi? Shina kwaluka chino muchingwaha mashimbu a kukunguluka, kuya mu munda ni kupwa hamwe ni mandumbu?’ Nyi uli ni ana, watamba kulihula ngwe: ‘Kuchi munguhasa kulela ana jami “mu fumbo ni shimbi ja Yehova,” nyi chapwile no hakamwihi? (Efwe. 6:4) Kwata yiyulo yize yinalite ni kunyonga cha Yehova hi yize ko muyilita ni kunyonga cha asoko ni masepa je waze keshi kuvumbika shimbi ja mu Mbimbiliya.c Tony, yoze watwama ku Ásia, kamusanyikine ha yisuho yinji hanga aye ni kukalakala mu chifuchi cheka muze te mamufweta mbongo jinji. Alioze, hanyima lia kulemba ni kuhanjika chikuma chacho ni mukwo-pwo, iye yalituna mulimo wacho ni kwalumuna yimwe mu usoko hanga atepulule yize apwile ni kulanda. Muze akunyonga kunyima, Tony yamba ngwenyi: “Napwile ni chiwape cha kukwasa atu anji anyingike Yehova, nawa ana jetu kakuzanga chinji umwenemwene. Usoko wetu walilongesele ngwo, nyi twatwama kulita ni maliji ali ha Mateu 6:33, Yehova matufunga.”

MUZE MUTULULIEKA YIZE MUTUKAFUPA KULUTWE LIA MATANGWA

13. Yika mutuhasa kulinga haliapwila hanga yikatukwase kulutwe lia matangwa?

¹³ Ujikijilo wetu ha kwoko lia Yehova, muuhasa nawa kupwa mu cheseko muze mutunyonga ha chize mwono wetu muukapwa ku ushinakaji. Mbimbiliya yakutukolweza tuhondangane milimo hanga tupwe ni yize muyikatukwasa kulutwe lia matangwa. (Yishi. 6:6-11) Kashika nyi tuli ni uhashi, muchilita kutulika yimwe yize muyikatukwasa kulutwe. Mbimbiliya yakwamba nawa ngwo, mbongo jakutufunga. (Chilu. 7:12) Chipwe chocho, kutwatambile kwecha hanga kufupa mbongo ni yikumba chipwe chuma chilemu chinji ku mwono wetu.

14. Kuchi A-Hepreu 13:5 unatukwase hanga tuhone kulipikala chinji ha yize mutukafupa kulutwe lia matangwa?

¹⁴ Yesu katele chishima chize chinasolola ngwo, chili uhepuke kufupa chinji mbongo, chakuhona kupwa “pichi kumeso ja Zambi.” (Luka 12:16-21) Kukushi niumwe yoze unanyingika yize muyikalingiwa hamene. (Yishi. 23:4, 5; Tia. 4:13-15) Chikwo nawa, twakupalika mu kapinda mumu lia kupwa tumbaji twa Kristu. Yesu kambile ngwenyi, mba tupwe tumbaji twenyi, twatamba ‘kuhichika’ yikumba yetu yeswe. (Luka 14:33) Yino ye yalingiwile kuli Akwa-Kristu ku sekulu yitangu mu Yundeya. Ayo kanungine ni kuwahilila chipwe ngwe katokesele yikumba yo yeswe. (Hepre. 10:34) Musono, mandumbu jetu anji katokesa yikumba ni milimo yo mumu lia kulituna kulinga yuma ya mafwefwe. (Uso. 13:16, 17) Yika yaakwashile kuchilinga? Ayo kanakajikijila ha chilakenyo cha Yehova, chinambe ngwo: “Chichi kakwehuka, chichi kakumbila.” (Tanga A-Hepreu 13:5.) Twakulinga yize mutuhasa hanga tupwe ni yize mutukafupa kulutwe lia matangwa. Alioze twakufuliela nawa ngwetu, nyi mukulingiwa yimwe susumuku, Yehova matufunga.

15. Kuchi yisemi Akwa-Kristu atamba kumona ana jo? (Tala nawa chizulie.)

¹⁵ Ku minyachi yimwe, waze alimbata kakuzanga kupwa ni ana hanga ana jacho akaafunge muze mapwa tushinakaji. Yisemi jacho kakumona ana jo ngwe chimangu chize muchikaakwasa muze makapwa tushinakaji. Mbimbiliya yakwamba ngwo, yisemi katamba kuhana kuli ana jo yize anafupu. (2 Kori. 12:14) Ewa, yisemi mahasa kutambula ukwaso kuli ana jo muze anayi ni kupwa tushinakaji, chikwo nawa, ana anji kakuwahilila ha kuchilinga. (1 Timo. 5:4) Alioze yisemi waze akujikijila muli Yehova, kananyingika ngwo uwahililo unene kuushi kwiza ha kulela ana hanga akaafupile mbongo, alioze wakwiza ha kwakwasa apwe tuvumbi twa Yehova.—3 Yoa. 4.

16. Kuchi yisemi mahasa kululieka ana jo hanga akalifunge ku musunya? (A-Efwesu 4:28)

¹⁶ Muze unalongesa ana je chize mahasa kulifunga ku musunya, asolwele kupalikila mu chilweza che ngwo, wakujikijila muli Yehova. Chize ku wanuke wo, asolwele ulemu wa kupwa yikilikita. (Yishi. 29:21; tanga A-Efwesu 4:28.) Chikwo nawa, muze anayi ni kukola, akwase apwe alongi apema ku shikola. Chili chipema kuli yisemi Akwa-Kristu kuhengwola shimbi ja mu Mbimbiliya, hanga akwase ana jo akwate yiyulo ya mana hakutwala ku kulilongesa shikola. Chikuma chilemu chatamba kupwa, kukwasa ana hanga akahase kulifunga ene ni kulihana chinji mu mulimo wa kwambujola, hanji lume kupwa pionelu.

17. Shindakenyo yika mutuhasa kupwa nayo?

¹⁷ Tuvumbi twa Yehova ashishika mahasa kupwa ni shindakenyo ngwo, iye kanazange kwakwasa, nawa kali ni uhashi wa kwafunga ku musunya. Amu tunakundama ku songo lia chifuchi chino, twatamba kujikijila chinji muli Yehova. Chipwe ngwe mukulingiwa yuma yeswayo, twatamba kufuliela muli Yehova ngwetu, kupalikila mu ndundo jenyi, matukwasa ha yeswe yize mutufupa ku musunya. Tuli ni shindakenyo ngwetu, kwoko lienyi lia ndundo nawa lia kuzoza, kuliahihile mba lihone kutukwasa.