MUTWE WA KULILONGESA 16
MWASO 87 Tweyenu! Nuhwime
Kupwa ni Usepa Upema ni Mandumbu Jetu Chakutuyukisa!
“Talenu cho kupema, cho kuwaha, muze mandumbu matwama hamuwika ni mbunge yimuwika.”—SAMU 133:1.
YIZE MUTULILONGESA
Mutumona chize mutuhasa kukolesa usepa ni mandumbu jetu ni yiwape yize mutuzuka ha kuchilinga.
1-2. Chuma chika chikwete ulemu kuli Yehova, mba yika iye anazange hanga tulinge?
SHINA unanyingika ngwe, chuma chilemu kuli Yehova chili mutapu uze twakutwama ni akwetu? Yesu kalongesele ngwenyi, twatamba kuzanga enyembo jetu ngwe chize twakulizanga yetu ene. (Mateu 22:37-39) Maliji wano kanasolola ngwo, twatamba kusolola utu chipwe kuli atu waze keshi kulingila Yehova. Nyi twachilinga, mutwimbulula Zambi yetu yoze ‘wakuvumbula tangwa hali api ni apema ni kunokesa vula hali akwa-ululi ni yihenge.’—Mateu 5:45.
2 Yehova kakuzanga atu eswe, alioze kakuzanga chinji atu waze akulinga yuma yalita. (Yoa. 14:21) Iye kanazange hanga tumwimbulule. Kashika anatukolweza hanga ‘tulizange chinji’ umwe ni mukwo, chekwamba kuzanga mandumbu jetu a mapwo ni a malunga. (1 Petu. 4:8; Roma 12:10) Maliji wano kanatale ha zango lize twakusolwela asoko jetu, hanji masepa waze twazanga chinji.
3. Yika twatamba kwiuluka hakutwala ku zango?
3 Ngwe chizechene twatamba kufunga umwe mutondo uze twatumba hanga ukole kanawa, twatamba nawa kusa tachi hanga tukolese zango mukachi ketu. Postolo Paulu kakolwezele Akwa-Kristu ngwenyi: “Nungenu ni kusolola zango lienu lia undumbu.” (Hepre. 13:1) Yehova kanazange hanga zango lize tukwete hali mandumbu jetu linunge ni kukola. Kashika ha mutwe uno, mutumonaho yize yatamba kututwala tukolese zango lietu hali mandumbu ni chize mutuhasa kununga ni kuchilinga.
MUMU LIAKA TWATAMBA KUZANGA CHINJI MANDUMBU JETU?
4. Kulita ni Samu 133:1, kuchi mutuhasa kufunga kulinunga chize tukwete mukachi ketu? (Tala nawa yizulie.)
4 Tanga Samu 133:1. Yetu twakutayiza maliji a mukwa-kwimba samu yoze wambile ngwenyi: “Cho kupema, cho kuwaha,” ha kupwa masepa ja waze akulingila Yehova. Alioze kuli yimwe ponde. Ngwe chizechene umwe mutu mahasa kulengulula chuma chize akumona chinji hanji kuhona kuchilemesa, ni yetu nawa mumu lia kupwa ni mandumbu jetu mashimbu eswe mutuhasa kulengulula hanji kuvulama kulinunga chize tukwete mukachi ketu. Kuchi mutuhasa kufunga kulinunga chacho? Zango lize tukwete hali mandumbu jetu, mulikola nyi mutusa mashimbu hanga tunyonge ha ulemu uze ndumbu ni ndumbu akwete mu chikungulwila ni hali yetu.
Kanda ulelesa kulinunga chize tukwete ni mandumbu jetu (Tala paragrafu 4)
5. Yika muyihasa kulingiwa kuli atu waze keshi kuwayila Yehova nyi mamona zango lize twakulisolwela?
5 Atu waze akukunguluka ni yetu ha chisuho chitangu, kakukomoka chinji ha kumona zango lize twakulisolwela. Ha yisuho yimwe, zango liacho liakwakwasa anyingike ngwo, kawana umwenemwene. Yesu kambile ngwenyi: “Nyi munulizanga umwe ni mukwo, atu eswe makanyingika ngwo yenu nuli tumbaji twami.” (Yoa. 13:35) Tutalenu chilweza cha Chaithra, umwe longi wa ku shikola yinene yoze wapwile ni kulilongesa Mbimbiliya ni Yela ja Yehova. Iye katayijile konvite ya kuya ku kukunguluka cha mambonge. Muze akungulukile ha tangwa litangu, yalweza longeshi yenyi wa Mbimbiliya ngwenyi: “Yisemi jami kanda achingukangayika kama. Alioze ha kukunguluka chino, namona zango lia Yehova kupalikila muli mandumbu. Kashika ni yami ngunazange kupwa mu usoko uno.” Kukatuka haze, Chaithra yanunga ni kujama ku ufulielo mba yamupapachisa ha 2024. Chilweza chino chinasolola ngwo, kanji-kanji muze atu akumona yitanga yetu yipema ni zango lize tukwete mukachi ketu, no kakuzanga kulingila Yehova.—Mateu 5:16.
6. Kuchi kuzanga chinji mandumbu jetu chakutufunga?
6 Kuzanga chinji mandumbu jetu, muchihasa kutufunga. Paulu kakolwezele Akwa-Kristu ngwenyi: “Nungenu ni kulikolweza umwe ni mukwo tangwa ha tangwa . . . hanga niumwe wa kuli yenu ahone kukalisa mbunge yenyi mumu lia ndundo ja kwonga cha shili.” (Hepre. 3:13) Ha mashimbu amwe, mutuhasa kunenganyana ni kuputuka kuhichika majila ja Yehova, alioze iye mahasa kutuma umwe ndumbu hanga atukwase ha yize tunafupu. (Samu 73:2, 17, 23) Chochene, ukwaso ni utakamiso wacho wakutuvwisa kuwaha.
7. Kuchi zango linalite ni sambukila? (A-Kolosu 3:13, 14)
7 Yetu tuli mu usoko wa atu waze akusa tachi hanga alizange umwe ni mukwo, chino chakutunehena yiwape yinji. (1 Yoa. 4:11) Ngwe chilweza, zango liakutukwasa “kulihumikiza umwe ni mukwo,” chino chakutukwasa tupwe ni sambukila mukachi ketu. (Tanga A-Kolosu 3:13, 14; Efwe. 4:2-6) Hano hashi, yetu wika e twakusolola zango ni sambukila ha kukunguluka chetu.
TULILEMESENU UMWE NI MUKWO
8. Yika Yehova akulinga hanga atukwase tulinunge ni mandumbu jetu?
8 Kulinunga chize tukwete ni mandumbu jetu a hashi heswe, chili chikomokeso cha kuli Yehova. Mumu liaka tunambe chocho? Mumu tuli yihenge. (1 Kori. 12:25) Mbimbiliya yakwamba ngwo, Zambi mwe wakutulongesa hanga ‘tulizange umwe ni mukwo.’ (1 Tesa. 4:9) Mu maliji akwo, mutuhasa kwamba ngwetu kupalikila mu Liji lienyi, Yehova kakutusolwela yize twatamba kulinga hanga tulizange chinji umwe ni mukwo. Mba Zambi anunge ni kutulongesa, twatamba kukaula ni mbunge yeswe yize akutulongesa ni kuyisa mu yitanga. (Hepre. 4:12; Tia. 1:25) Yino ye Yela ja Yehova akusa tachi hanga alinge.
9. Yika twalilongesa ha A-Roma 12:9-13 hakutwala ku kulilemesa umwe ni mukwo?
9 Kuchi Mbimbiliya yakutulongesa kupwa ni usepa ukolo umwe ni mukwo? Tutalenu yize Paulu ambile ha A-Roma 12:9-13. (Tanga.) Chikuma chilemu ha maliji wano chili ngwo, yetu eswe twatamba ‘kulianga kulilemesa umwe ni mukwo.’ Yika maliji wano analumbunuka? Kanalumbunuka ngwo, umwe ni umwe wa kuli yetu, katamba ‘kulianga kuzanga’ mandumbu jenyi. Chino mutuhasa kuchilinga mu majila eka ni eka. Ngwe chilweza, ha kukonekena mandumbu jetu, kwazumbula ku mazuwo jetu ni kulianyina no yuma yize tuli nayo. (Efwe. 4:32) Kutwatambile kushimbwila ndumbwetu hanga aliange kukundama kuli yetu, alioze twatamba kulianga kukundama kuli iye. Nyi twachilinga, mutumona ngwetu Yesu kahanjikile umwenemwene muze ambile ngwenyi: “Kuhana chakuneha uwahililo unji kuhiana kutambula.”—Yili. 20:35.
10. Kuchi mutuhasa kupwa ‘yikilikita ha kulilemesa umwe ni mukwo’? (Tala nawa chizulie.)
10 Hanyima lia kuhanjika hakutwala ku kulianga kulilemesa umwe ni mukwo, Paulu yamba ngwenyi: “Pwenu yikilikita, kanda nupwa yileya.” Mutu yoze wapwa chikilikita nyi mamwaha umwe mulimo, kakuulinga ni mbunge yimuwika. Mukanda wa Yishima 3:27, 28, unatukolweza ngwo: “Kanda umina chuma chipema kuli yoze chatamba kumwahacho nyi muchihasa.” Kashika, muze twakumona ngwetu umwe mutu kanafupu ukwaso, twakumukwasa ha shimbu lizeliene. Kutushi kwamba ngwetu, mutukamukwasa ha shimbu likwo hanji ngwetu atu akwo mamukwasa.—1 Yoa. 3:17, 18.
Lihane hanga ukwase mandumbu muze mafupa ukwaso (Tala paragrafu 10)
11. Yika muyihasa kutukwasa kupwa ni usepa upema ni mandumbu jetu?
11 Jila yikwo yakulemeselamo mandumbu jetu, yili kwakonekena kawashi-washi muze matulemeka ku mbunge. A-Efwesu 4:26 unambe ngwo: “Kanda nwivwa uli ndo ku kutoka cha tangwa.” Mumu liaka maliji wano kali alemu? Mumu ngwe chize versu 27 yinasolola, kununga ni kwivwa uli muchihasa kututwala tuhane “Ndiapu unjililo.” Chikwo nawa, kupalikila mu Mbimbiliya, Yehova kakutukolweza mashimbu eswe hanga tulikonekene umwe ni mukwo. A-Kolosu 3:13, unambe ngwo: ‘Twatamba kulikonekena umwe ni mukwo ni mbunge yeswe.’ Kuvulama yuma yipi yize umwe atulinga, yili jila yipema ya kukoleselamo usepa uze tukwete ni mutu wacho. Muze twakuchilinga, twakufunga “kulinunga chetu chize twazukile kupalikila mu spiritu yisandu.” (Efwe. 4:3) Mu maliji akehe, muze twakukonekena akwetu, twakukwasa ululikiso wa Yehova upwe ni sambukila ni kulinunga.
12. Kuchi Yehova akutukwasa kukonekena akwetu?
12 Tunanyingika ngwetu, muchihasa kupwa chikalu kukonekena mutu yoze watulemeka ku mbunge. Alioze ni ukwaso wa spiritu yisandu ya Zambi, mutuhasa kuchilinga. Hanyima lia kwamba ngwo: ‘Twatamba kulizanga umwe ni mukwo ni kupwa yikilikita,’ Mbimbiliya yinatukolweza nawa ngwo: “Echenu hanga spiritu yisandu yinwehe tachi.” Maliji wano kanasolola ngwo, spiritu yisandu muyihasa kutukwasa kupwa ni zango lia kulinga yimwe ni kuwahilila. Pundu lume, spiritu yisandu muyihasa kutukwasa kuzanga mandumbu jetu ni kwakonekena ni mbunge yeswe, muze matulemeka ku mbunge. Kashika, tunungenu ni kwita ukwaso kuli Yehova hanga tuhase kuchilinga.—Luka 11:13.
“KANDA NULIHANDUNUNA, ALIOZE NUKALINUNGE HAMUWIKA”
13. Yuma yika muyihasa kutuhandununa?
13 Mu ululikiso wa Yehova muli “atu a mutapu weswe.” (1 Timo. 2:3, 4) Mutu ni mutu kali ni chize amulelele ni yize apalikile ku mwono wenyi. Yino yakutukwasa kumona mumu liaka twakukwata yiyulo yalisa ha yikuma yize yinatale ha mutapu wa kuzala, kulilulieka hanji kusakula yiheho yize mututala ni uukiso uze mututambula. Kashika, nyi kutwakeyele, kalisa wacho mahasa kuhandununa chikungulwila. (Roma 14:4; 1 Kori. 1:10) Alioze Mbimbiliya yakutulongesa ngwo, mutu yoze ‘ukwete zango’ keshi kulilamba ha pambo ngwenyi, yuma yize iye akulinga ye yipema kuhiana ya akwo.—Fwili. 2:3.
14. Yuma yika twatamba kulinga mashimbu eswe, mumu liaka twatamba kuyilinga?
14 Mutuhasa nawa kukwasa kulinunga cha chikungulwila, ha kulinga yuma yize muyihuzulula akwetu ku mbunge ni kwatakamisa. (1 Tesa. 5:11) Ha mashimbu wano, atu anji waze azeyele ku ufulielo ni waze achijile mu chikungulwila kafuna. Kashika, tunaatambwisa! (2 Kori. 2:8) Umwe ndumbu wa pwo yoze wazeyele ku ufulielo ha miaka 10, mba hanyima yafuna mu chikungulwila kambile ngwenyi: “Muze nafunyine, mandumbu eswe kangutambwile kanawa. (Yili. 3:19) Kuchi yitanga yino ya zango yakwachile hali ndumbwetu? Iye yanunga ngwenyi: “Nalivwile ngwami, Yehova kanangufunyisa mu jila ya sambukila.” Kashika, nyi twasa tachi hanga tukolweze akwetu mashimbu eswe, Kristu mahasa kutukalakalisa hanga tukwase waze ‘akukilikita chikolo ni kumbata yilemu.’—Mateu 11:28, 29.
15. Yika nawa muyihasa kutukwasa hanga tupwe ni kulinunga mukachi ketu? (Tala nawa chizulie.)
15 Yize twakulinga muyihasa nawa kutukwasa hanga tulinunge ni mandumbu jetu. Mukanda wa Yombi 12:11, wakwamba ngwo: “Twitwi kuliakweseka maliji chizechene ngwe limi liakupanjika kulia.” Muze kanda achizambula kulia, mukwa-kuteleka mupema kakupaka hanji kupanjika kulia chacho nyi chinayeme. Chizechene nawa, shimbu kanda tuchihanjika chuma nichimwe, twatamba kunyonga kanawa. (Samu 141:3) Tunazange kupwa ni shindakenyo mashimbu eswe ngwetu, yuma yize mutwamba muyihuzulula, ‘muyitakamisa ni kuyukisa waze mayivwa.’—Efwe. 4:29.
Nyonga kanawa shimbu kanda uchihanjika (Tala paragrafu 15)
16. Aya atamba kukeya chinji ha yize mahanjika?
16 Ha chikuma chino, chipi-chipi malunga waze hanambata ni yisemi, katamba kukeya chinji ha yize mahanjika. Mumu liaka? Mumu katamba kuhanjika yuma yize muyitakamisa asoko jo. (Kolo. 3:19, 21; Titu 2:4) Makulwana a mu chikungulwila no, mumu lia kupwa tufunga, katamba kuhuzulula ni kutakamisa mapanga ambala a Yehova. (Iza. 32:1, 2; Ngala. 6:1) Mashimbu eswe, twatamba kwiuluka maliji ali ha Yishima 15:23, anambe ngwo: ‘Liji lia ha ola yalita, kuwahalio.’
SOLOLA ZANGO ‘LIAMWENEMWENE MU YITANGA’
17. Kuchi mutuhasa kuzanga mandumbu jetu ni mbunge yeswe?
17 Postolo Yoano kanatukolweza ngwenyi: ‘Zango lietu kuliatambile kusoloka wika ha yize twakwamba, alioze liatamba kusoloka nawa mu yitanga ni kupwa liamwenemwene.’ (1 Yoa. 3:18) Twatamba kuzanga mandumbu jetu ni mbunge yeswe. Kuchi mutuhasa kuchilinga? Nyi mutupalikisa mashimbu anji ni mandumbu jetu, chino muchitukwasa kukundama kuli ayo ni kwazanga chinji. Kashika, tufupenu uhashi wa kupwa hamuwika ni mandumbu jetu. Mutuhasa kuchilinga ha kupwa no ha kukunguluka ni kutuhuka no mu munda. Tusenu mashimbu hanga tuye ni kwameneka. Nyi twalinga yuma yino, mutusolola pundu ngwetu, Zambi kakutulongesa hanga ‘tulizange umwe ni mukwo.’ (1 Tesa. 4:9) Chikwo nawa, mutununga ni kwivwa ‘kuwaha mumu lia kutwama hamuwika ni mbunge yimuwika.’—Samu 133:1.
MWASO 90 Tulikolwezenu Umwe ni Mukwo